பெரிய திருமொழி
ஐந்தாம் பத்து
மூன்றாம் திருமொழி
வென்றி மாமழு வேந்தி, முன் மண்
மிசை மன்னரை மூவெழு கால்
கொன்ற தேவ ! * நின் குரைகழல் தொழுவது
ஓர்வகை எனக்கருள் புரியே *
மன்றில் மாம்பொழில் நுழைதந்து
மல்லிகை மெளவலின் போது அலர்த்தித் *
தென்றல் மாமணம் கமழ் தரவரு
திருவெள்ளறை நின்றானே ! 5.3.1 திருவெள்ளறை
வசைஇல் நான்மறை கெடுத்த, அம்மலரயற்கு
அருளி * முன் பரிமுகமாய்
இசை கொள் வேத நூலென்றிவை பயந்தவனே !
எனக்கு அருள் புரியே *
உயர் கொள் மாதவிப் போதொடுலாவிய
மாருதம் வீதியின் வாய் *
திசை யெல்லாம் கமழும் பொழில் சூழ்
திருவெள்ளறை நின்றானே ! 5.3.2 திருவெள்ளறை
வெய்யனாய் உலகேழுடன் நலிந்தவன்
உடலகம் இரு பிளவாக் *
கையில் நீளுகிர்ப் படையது வாய்த்தவனே !
எனக்கு அருள் புரியே *
மையினார் தரு வராலினம் பாய
வண்தடத்திடைக் கமலங்கள் *
தெய்வ நாறும் ஒண் பொய்கைகள் சூழ்
திருவெள்ளறை நின்றானே ! 5.3.3 திருவெள்ளறை
வாம்பரியுக மன்னர்தம் உயிர்செக
ஐவர்கட்கு அரசளித்த *
காம்பினார் திருவேங்கடப் பொருப்ப !
நின் காதலை அருள் எனக்கு *
மாம்பொழில் தளிர் கோதிய
மடக்குயில் வாயது துவர்ப்பெய்தத் *
தீம்பலங்கனித் தேனது நுகர்
திருவெள்ளறை நின்றானே ! 5.3.4 திருவெள்ளறை,
திருவேங்கடம் திருப்பதி
மானவே லொண்கண் மடவரல்
மண்மகள் அழுங்க * முந்நீர்ப் பரப்பில்
ஏனமாகி அன்று இருநிலம் இடந்தவனே !
எனக்கு அருள் புரியே *
கானமா முல்லைக் கழைக் கரும்பேறி
வெண்முறுவல் செய்து அலர்கின்ற *
தேனின் வாய் மலர் முருகுகுக்கும்
திருவெள்ளறை நின்றானே ! 5.3.5 திருவெள்ளறை
பொங்கு நீள்முடி அமரர்கள் தொழுதெழ
அமுதினைக் கொடுத்தளிப்பான் *
அங்கு ஓராமையதாகிய ஆதி !
நின்னடிமையை அருள் எனக்குத் *
தங்கு பேடையோ டூடிய மதுகரம்
தையலார் குழலணைவான் *
திங்கள் தோய் சென்னிமாடம் சென்றணை
திருவெள்ளறை நின்றானே! 5.3.6 திருவெள்ளறை
ஆறினோடொரு நான்குடை நெடுமுடி
அரக்கன் தன் சிரமெல்லாம் *
வேறு வேறுக வில்லது வளைத்தவனே !
எனக்கு அருள் புரியே *
மாறில் சோதிய மரதகப் பாசடைத்
தாமரை மலர் வார்ந்த *
தேறல் மாந்தி வண்டு இன்னிசை முரல்
திருவெள்ளறை நின்றானே ! 5.3.7 திருவெள்ளறை
முன் இவ்வேழுலகு உணர்வின்றி இருள்மிக
உம்பர்கள் தொழுதேத்த *
அன்னமாகி அன்றருமறை பயந்தவனே !
எனக்கு அருள் புரியே *
மன்னு கேதகை சூதகம் என்றிவை
வனத்திடைச் சுரும்பினங்கள் *
தென்னவென்று வண்டு இன்னிசை முரல்
திருவெள்ளறை நின்றானே! 5.3.8 திருவெள்ளறை
ஆங்கு மாவலி வேள்வியில் இரந்து சென்று
அகலிடம் முழுதினையும் *
பாங்கினால் கொண்ட பரம ! நின் பணிந்தெழுவேன்
எனக்கு அருள் புரியே *
ஓங்கு பிண்டியின் செம்மலரேறி
வண்டுழிதர * மாவேறித்
தீங்குயில் மிழற்றும் படப்பைத்
திருவெள்ளறை நின்றானே ! 5.3.9 திருவெள்ளறை
மஞ்சுலா மணிமாடங்கள் சூழ் திருவெள்ளறையதன் மேய *
அஞ்சனம் புரையும் திருவுருவனை ஆதியை அமுதத்தை *
நஞ்சுலாவிய வேல் வலவன் கலிகன்றி சொல் ஐயிரண்டும் *
எஞ்சலின்றி நின்று ஏத்த வல்லார் இமையோர்க் கரசு ஆவர்களே. 5.3.10 திருவெள்ளறை
