स्वर्गारोहणपर्वम् अध्यायः 01-05
श्रीः श्रीमहाभारतम् ||१८ स्वर्गारोहणपर्वम् || 001-अध्यायः–स्वर्गारोहणपर्व स्वर्गे नारदवाक्यम् जनमेजय उवाच|| स्वर्गं त्रिविष्टपं प्राप्य मम पूर्वपितामहाः | पाण्डवा धार्तराष्ट्राश्च कानि स्थानानि भेजिरे ||१|| एतदिच्छाम्यहं श्रोतुं सर्वविच्चासि मे मतः | महर्षिणाभ्यनुज्ञातो व्यासेनाद्भुतकर्मणा ||२|| वैशम्पायन उवाच|| स्वर्गं त्रिविष्टपं प्राप्य तव पूर्वपितामहाः | युधिष्ठिरप्रभृतयो यदकुर्वत तच्छृणु ||३|| स्वर्गं त्रिविष्टपं प्राप्य धर्मराजो युधिष्ठिरः | दुर्योधनं श्रिया जुष्टं ददर्शासीनमासने ||४|| भ्राजमानमिवादित्यं […]
