ಶ್ರೀಮತೇ ರಾಮಾನುಜಾಯ ನಮ:
ತಸ್ಮೈ ರಾಮಾನುಜಾರ್ಯಾಯ ನಮಃ ಪರಮಯೋಗಿನೇ |
ಯಃ ಶ್ರುತಿಸ್ಮೃತಿಸೂತ್ರಾಣಾಂ ಅನ್ತರ್ಜ್ವರಮಶೀಶಮತ್ ||
ಶ್ರೀಭಗವದ್ರಾಮಾನುಜವಿರಚಿತ:
ನಿತ್ಯಗ್ರನ್ಥ:
(ಭಗವದಾರಾಧನಪ್ರಯೋಗಾತ್ಮಕಃ)
- ಅಥ ಪರಮೈಕಾನ್ತಿನೋ ಭಗವದಾರಾಧನಂ ವಕ್ಷ್ಯೇ || 1 ||
- ಭಗವತ್ಕೈಙ್ಕರ್ಯೈಕರತಿ: ಪರಮೈಕಾನ್ತೀ ಭೂತ್ವಾ,
- ಭಗವಾನೇವ, ಸ್ವಶೇಷಭೂತೇನ ಮಯಾ, ಸ್ವಕೀಯೈರೇವ ಕಲ್ಯಾಣತಮೈರೌಪಚಾರಿಕಸಾಂಸ್ಪರ್ಶಿಕಾಭ್ಯವಹಾರಿಕೈಃ ಭೋಗೈಃ, ಅಖಿಲಪರಿಜನಪರಿಚ್ಛದಾನ್ವಿತಂ ಸ್ವಾತ್ಮಾನಂ ಪ್ರೀತಂ ಕಾರಯಿತುಮುಪಕ್ರಮತೇ – ಇತ್ಯನುಸನ್ಧಾಯ,
(ಸ್ನಾನಾದಿ)
- ತೀರ್ಥಂ ಗತ್ವಾ,
- ಶುಚೌ ದೇಶೇ ಪಾದೌ ಪ್ರಕ್ಷಾಲ್ಯ,
- ಆಚಮ್ಯ,
- ತೀರಂ ಸಂಶೋಧ್ಯ,
- ಶುಚೌ ದೇಶೇ ಮೂಲಮನ್ತ್ರೇಣ ಮೃದಮಾದಾಯ, ದ್ವಿಧಾ ಕೃತ್ವಾ ಶೋಧಿತತೀರೇ ನಿಧಾಯ,
- ಏಕೇನ ಅಧಿಕಮೃದ್ಭಾಗೇನ ದೇಹಮಲಪ್ರಕ್ಷಾಲನಂ ಕೃತ್ವಾ,
- ನಿಮಜ್ಜ್ಯ, ಆಚಮ್ಯ, ಪ್ರಾಣಾಯಾಮತ್ರಯಮ್ ಕೃತ್ವಾ,
- ಆಸೀನಃ ಭಗವನ್ತಂ ಧ್ಯಾಯನ್,
- ಅನ್ಯ ಮೃದ್ಭಾಗಮಾದಾಯ, ವಾಮಪಾಣಿತಲೇ ತ್ರಿಧಾಕೃತ್ವಾ,
- ಪೃಥಕ್ಪೃಥಕ್ ಸಂಪ್ರೋಕ್ಷ್ಯ, ಅಭಿಮನ್ತ್ರ್ಯ,
- ಏಕೇನ ದಿಗ್ಬನ್ಧನಮಸ್ತ್ರಮನ್ತ್ರೇಣ ಕುರ್ಯಾತ್ || 2 ||
- ಅನ್ಯೇನ ತೀರ್ಥಸ್ಯ ಪೀಠಮ್ || 3 ||
- ಇತರೇಣ ಗಾತ್ರಾನುಲೇಪನಮ್ || 4 ||
- ತತ: ಪಾಣೀ ಪ್ರಕ್ಷಾಲ್ಯ,
- ಉದಕಾಞ್ಜಲಿಮಾದಾಯ,
- ತೀರ್ಥಸ್ಯಾರ್ಘ್ಯಮುತ್ಕ್ಷಿಪ್ಯ,
- ಭಗವದ್ವಾಮಪಾದಾಙ್ಗುಷ್ಠ-ವಿನಿಸ್ಸೃತಗಙ್ಗಾಜಲಂ ಸಂಕಲ್ಪಿತಪೀಠೇ ಆವಾಹ್ಯ,
- ಅರ್ಘ್ಯಂ ದತ್ವಾ,
- ಮೂಲಮನ್ತ್ರೇಣೋದಕಮಭಿಮನ್ತ್ರ್ಯ, ಉದಕಾಞ್ಜಲಿಮಾದಾಯ,
- ಸಪ್ತಕೃತ್ವಃ ಅಭಿಮನ್ತ್ರ್ಯ ಸ್ವಮೂರ್ಧ್ನಿ ಸಿಞ್ಚೇತ್ || 5 ||
- ಏವಂ ತ್ರಿ:, ಪಞ್ಚಕೃತ್ವ:, ಸಪ್ತಕೃತ್ವೋ ವಾ || 6 ||
- ದಕ್ಷಿಣೇನ ಪಾಣಿನಾ ಜಲಮಾದಾಯ, ಅಭಿಮನ್ತ್ರ್ಯ ಪೀತ್ವಾ ಆಚಮ್ಯ,
- ಸ್ವಾತ್ಮಾನಂ ಪ್ರೋಕ್ಷ್ಯ, ಪರಿಷಿಚ್ಯ
- ತೀರ್ಥೇ ನಿಮಜ್ಞಃ ಭಗವತ್ಪಾದಾರವಿನ್ದವಿನ್ಯಸ್ತಶಿರಸ್ಕಃ,
- ಯಾವಚ್ಛಕ್ತಿ ಮೂಲಮನ್ತ್ರಂ ಜಪಿತ್ವಾ,
- ಉತ್ತೀರ್ಯ, ಶುಕ್ಲವಸ್ತ್ರಧರಃ, ಧೃತೋತ್ತರೀಯಃ, ಆಚಮ್ಯ,
- ಊರ್ಧ್ವಪುಣ್ಡ್ರಾಂಸ್ತತ್ತನ್ಮನ್ತ್ರೇಣ ಧಾರಯಿತ್ವಾ,
- ಭಗವನ್ತಮನುಸ್ಮೃತ್ಯ,
- ತತ್ತನ್ಮನ್ತ್ರೇಣ ಭಗವತ್ಪರ್ಯನ್ತಾಭಿಧಾಯಿನಾ, ಮೂಲಮನ್ತ್ರೇಣ ಚ ಜಲಂ ಪೀತ್ವಾ,
- ಆಚಮ್ಯ, ಪ್ರೋಕ್ಷ್ಯ, ಪರಿಷಿಚ್ಯ, ಉದಕಾಞ್ಜಲಿಂ ಭಗವತ್ಪಾದಯೋರ್ನಿಕ್ಷಿಪ್ಯ,
- ಪ್ರಾಣಾನಾಯಮ್ಯ, ಭಗವನ್ತಂ ಧ್ಯಾತ್ವಾ,
- ಅಷ್ಟೋತ್ತರಶತಂ ಮೂಲಮನ್ತ್ರಮಾವರ್ತ್ಯ,
- ಪರಿಕ್ರಮ್ಯ, ನಮಸ್ಕೃತ್ಯ, ಆಧಾರಶಕ್ತ್ಯಾದಿಪೃಥಿವ್ಯನ್ತಂ ತರ್ಪಯಿತ್ವಾ,
- ಶ್ರೀವೈಕುಣ್ಠಾದಿ ಪಾರಿಷದಾನ್ತಂ ತರ್ಪಯಿತ್ವಾ,
- ದೇವಾನೃಷೀನ್ ಪಿತೃನ್ ಭಗವದಾತ್ಮಕಾನ್ ಧ್ಯಾತ್ವಾ ಸಂತರ್ಪ್ಯ,
- ಶುಚೌ ದೇಶೇ ವಸ್ತ್ರಂ ಸಂಪೀಡ್ಯ, ಆಚಮ್ಯ,
- ಆವಾಹಿತತೀರ್ಥಂ ಮೂಲಮನ್ತ್ರೇಣಾತ್ಮನಿ ಸಮಾಹೃತ್ಯ,
- Fಯಾಗಭೂಮಿಂ ಗಚ್ಛೇತ್ || 7 ||
(ಯಾಗಭೂಮಾೌ ಶರಣವರಣಂ)
- ಸುಪ್ರಕ್ಷಾಲಿತಪಾಣಿಪಾದ:, ಸ್ವಾಚಾನ್ತ:,
- ಶುಚೌ ದೇಶೇಽತಿಮನೋಹರೇ ನಿಶ್ಶಬ್ದೇ ಭುವಂ ಸಂಗೃಹ್ಯ, ತಾಂ ಶೋಷಣಾದಿಭಿರ್ವಿಶೋಧ್ಯ,
- ಗುರುಪರಂಪರಯಾ ಪರಮಗುರುಂ ಭಗವನ್ತಮುಪಗಮ್ಯ,
- ತಮೇವ ಪ್ರಾಪ್ಯತ್ವೇನ ಪ್ರಾಪಕತ್ವೇನಾನಿಷ್ಟನಿವಾರಕತ್ವೇನೇಷ್ಟಪ್ರಾಪಕತ್ವೇನ ಚ ಯಥಾವಸ್ಥಿತಸ್ವರೂಪರೂಪಗುಣವಿಭೂತಿಲೀಲೋಪಕರಣವಿಸ್ತಾರಂ ಅನುಸನ್ಧಾಯ,
- ತಮೇವ ಶರಣಮುಪೂಗಚ್ಛೇತ್ ‘ಅಖಿಲೇ’ ತ್ಯಾದಿನಾ || 8 ||
- ಏವಂ ಶರಣಮುಪಗಮ್ಯ, ತತ್ಪ್ರಸಾದೋಪಬೃಂಹಿತಮನೋವೃತ್ತಿ:,
- ತಮೇವ ಭಗವನ್ತಂ ಸರ್ವೇಶ್ವರೇಶ್ವರಮಾತ್ಮನಸ್ಸ್ವಾಮಿತ್ವೇನ ಅನುಸನ್ಧಾಯ,
- ಅತ್ಯರ್ಥಪ್ರಿಯ ಅವಿರತ ವಿಶದತಮ ಪ್ರತ್ಯಕ್ಷರೂಪ ಅನುಧ್ಯಾನೇನ ಧ್ಯಾಯನ್ನಾಸೀತ || 9 ||
- ತತಸ್ತದನುಭವಜನಿತಾತಿಮಾತ್ರಪ್ರೀತಿಕಾರಿತಪರಿಪೂರ್ಣ-ಕೈಙ್ಕರ್ಯರೂಪಪೂಜಾಂ ಆರಭೇತ || 10 ||
- ‘ ಭಗವಾನೇವ ಸ್ವನಿಯಾಮ್ಯಸ್ವರೂಪಸ್ಥಿತಿಪ್ರವೃತ್ತಿಸ್ವಶೇಷತೈಕರಸೇನಾನೇನಾತ್ಮನಾ ಸ್ವಕೀಯೈಶ್ಚ ದೇಹೇನ್ದ್ರಿಯಾನ್ತ: ಕರಣೈ: ಸ್ವಕೀಯಕಲ್ಯಾಣತಮದ್ರವ್ಯಮಯಾನೌಪಚಾರಿಕಸಾಂಸ್ಪರ್ಶಿಕಾಭ್ಯವಹಾರಿಕಾದಿಸಮಸ್ತಭೋಗಾನ್ ಅತಿಪ್ರಭೂತಾನ್ ಅತಿಸಮಗ್ರಾನತಿಪ್ರಿಯತಮಾನ್ ಅತ್ಯನ್ತಭಕ್ತಿಕೃತಾನ್ ಅಖಿಲಪರಿಜನಪರಿಚ್ಛದಾನ್ವಿತಾಯ ಸ್ವಸ್ಮೈ ಸ್ವಪ್ರೀತಯೇ ಸ್ವಯಮೇವ ಪ್ರತಿಪಾದಯಿತುಮುಪಕ್ರಮತೇ ’ ಇತ್ಯನುಸನ್ಧಾಯ |
- ಸ್ವದೇಹೇ ಪಞ್ಚೋಪನಿಷನ್ಮನ್ತ್ರಾನ್ ಸಂಹಾರಕ್ರಮೇಣ ನ್ಯಸ್ಯ,
- ಪ್ರಾಣಾಯಾಮೇನೈಕೇನ, ದಕ್ಷಿಣೇನ ಪಾಣಿನಾ ನಾಭಿದೇಶೇ ಮೂಲಮನ್ತ್ರಂ ನ್ಯಸ್ಯ,
- ಮನ್ತ್ರೋದ್ಭೂತಚಣ್ಡವಾಯ್ವಾಪ್ಯಾಯಿತನಾಭಿದೇಶಸ್ಥವಾಯುನಾ ಶರೀರಮನ್ತರ್ಬಹಿಶ್ಚ ಸರ್ವತತ್ತ್ವಮಯಂ ತತ್ತ್ವಕ್ರಮೇಣ ವಿಶೋಷ್ಯ,
- ಪುನಃ ಪ್ರಾಣಾಯಾಮೇನೈಕೇನ ಹೃದ್ದೇಶೇ ಮೂಲಮನ್ತ್ರಂ ನ್ಯಸ್ಯ,
- ಮನ್ತ್ರೋದ್ಭೂತ ಚಕ್ರಾಗ್ನಿಜ್ವಾಲೋಪಬೃಂಹಿತಜಾಠರಾಗ್ನಿನಾ ದಗ್ಧವಾ ತತ್ತತ್ಸಮಷ್ಟಿಪ್ರಲೀನಸರ್ವತತ್ತ್ವಸರ್ವಕಿಲ್ಬಿಷಸರ್ವಾಜ್ಞಾನತದ್ವಾಸನೋ ಭೂತ್ವಾ,
- ಭಗವದ್ದಕ್ಷಿಣಪಾದಾಙ್ಗುಷ್ಠೇ ಮೂಲಮನ್ತ್ರೇಣ ಸ್ವಾತ್ಮಾನಂ ಪ್ರವೇಶಯೇತ್ || 11 ||
- ಅಪರೇಣ ಪ್ರಾಣಾಯಾಮೇನ ಭಗವತ್ಪ್ರಸಾದೇನ ಭಗವತ್ಕಿಙ್ಕರತ್ವಯೋಮ್ಯತಾಮಾಪಾದ್ಯ,
- ತಸ್ಮಾದಾದಾಯ, ತದ್ವಾಮಪಾದಾಙ್ಗುಷ್ಠಾದಧಸ್ತಾತ್ ಮೂಲಮನ್ತ್ರೇಣಾತ್ಮಾನಂ ವಿನ್ಯಸ್ಯ,
- ದೇವವಾಮಪಾದಾಙ್ಗುಷ್ಠನಖಶೀತಾಂಶುಮಣ್ಡಲಾದ್ ಗಳದಿವ್ಯಾಮೃತರಸೈರಾತ್ಮಾನಮಭಿಷಿಞ್ಚೇತ್,
- ಏವಮಾತ್ಮಾನಂ ಅಭಿಷಿಚ್ಯ, ಭಗವತ್ಪ್ರಸಾದೇನ ತದಮೃತಮಯಂ ಸರ್ವಕೈಙ್ಕರ್ಯಮನೋಹರಂ ಸರ್ವಕೈಙ್ಕರ್ಯಯೋಗ್ಯಂ ಶರೀರಂ ಲಬ್ಧ್ವಾ,
- ತಸ್ಮಿನ್ ಶರೀರೇ ಪಞ್ಚೋಪನಿಷನ್ಮನ್ತ್ರಾನ್ ಸೃಷ್ಟಿಕ್ರಮೇಣ ವಿನ್ಯಸೇತ್ ।| 12 ||
- ‘ಓಂ ಷೌಂ ನಮ: ಪರಾಯ ಪರಮೇಷ್ಠ್ಯಾತ್ಮನೇ ನಮ:’ ಇತಿ ಮೂರ್ಧ್ನಿ ಸ್ಪೃಶೇತ್ ।| 13 ||
- ‘ಓಂ ಯಾಂ ನಮ:, ಪರಾಯ ಪುರುಷಾತ್ಮನೇ ನಮಃ’ ಇತಿ ನಾಸಿಕಾಗ್ರೇ || 14 ||
- ‘ಓಂ ರಾಂ ನಮ:, ಪರಾಯ ವಿಶ್ವಾತ್ಮನೇ ನಮಃ’ ಇತಿ ಹೃದಯೇ || 15 ||
- ‘ಓಂ ವಾಂ ನಮ:, ಪರಾಯ ನಿವೃತ್ತ್ಯಾತ್ಮನೇ ನಮಃ’ ಇತಿ ಗುಹ್ಯೇ || 16 ||
- ‘ಓಂ ಲಾಂ ನಮ:, ಪರಾಯ ಸರ್ವಾತ್ಮನೇ ನಮಃ’ ಇತಿ ಪಾದಯೋ: || 17 ||
- ಏವಂ ನ್ಯಾಸಂ ಕುರ್ವಂನ್, ತತ್ತಚ್ಛಕ್ತಿಮಯಮುದ್ಭೂತದೇಹಂ ಧ್ಯಾಯೇತ್ || 18 ||
- ಪುನರಪಿ ಪ್ರಾಣಾಯಾಮೇನೈಕೇನ ದೇವವಾಮಪಾದಾಙ್ಗುಷ್ಠವಿನಿಸ್ಸೃತಾಮೃತಧಾರಯಾಽಽತ್ಮಾನಮಭಿಷಿಚ್ಯ,
- ಕೃತಲಾಞ್ಛನೋ ಧೃತೋರ್ಧ್ವಪುಣ್ಡ್ರಃ ಭಗವದ್ಯಾಗಮಾರಭೇತ || 19 ||
(ಸಾತ್ವಿಕತ್ಯಾಗಹ್ರಧ್ಯಾಗೌ)
- ‘ಭಗವಾನೇವ ಸರ್ವಂ ಕಾರಯತತಿ ’ ಇತಿ ಪೂರ್ವವತ್ ಧ್ಯಾತ್ವಾ, ಹೃದ್ಯಾಗಂ ಕೃತ್ವಾ,
(ಬಾಹ್ಯಯಾಗಾರ್ಥಮ್ ಅರ್ಘ್ಯಾದಿಪರಿಕಲ್ಪನಂ)
- ಸಂಭಾರಾನ್ ಸಂಭೃತ್ಯಾತ್ಮನೋ ವಾಮಪಾರ್ಶ್ವೇ ಜಲಭಾಜೇನ ತೋಯಮುತ್ಪೂರ್ಯ,
- ಗನ್ಧಪುಷ್ಪಯುತಂ ಕೃತ್ವಾ, ಸಪ್ತಕೃತ್ವಃ ಅಭಿಮನ್ತ್ರ್ಯ, ವಿಶೋಷ್ಯ, ದಗ್ಧ್ವಾ,
- ದಿವ್ಯಾಮೃತಮಯಂ ತೋಯಮುತ್ಪಾದ್ಯ, ಅಸ್ತ್ರಮನ್ತ್ರೇಣ ರಕ್ಷಾಂ ಕೃತ್ವಾ, ಸುರಭಿಮುದ್ರಾಂ ಪ್ರದರ್ಶ್ಯ,
- ಅನ್ಯಾನಿ ಪೂಜಾದ್ರವ್ಯಾಣಿ ದಕ್ಷಿಣಪಾರ್ಶ್ವೇ ನಿಧಾಯ,
- ಆತ್ಮನ: ಪುರಸ್ತಾತ್ ಸ್ವಾಸ್ತೀರ್ಣೇ ಪೀಠೇ ಕ್ರಮೇಣಾಗ್ನೇಯಾದಿಷು ಕೋಣೇಷು ಅರ್ಘ್ಯಪಾದ್ಯಾಚಮನೀಯಸ್ನಾನೀಯಪಾತ್ರಾಣಿ ನಿಧಾಯ,
- (ಅಸ್ತ್ರ) ಮನ್ತ್ರೇಣ ಪ್ರಕ್ಷಾಲ್ಯ, ಶೋಷಣಾದಿನಾ ಪಾತ್ರಾಣಿ ವಿಶೋಧ್ಯ,
- ಸಂಸ್ಕೃತತೋಯೇನ ತಾನಿ ಚ ಪೂರಯಿತ್ವಾ,
- ಅರ್ಘ್ಯಪಾತ್ರೇ – ಸಿದ್ಧಾರ್ಥಕ ಗನ್ಧಪುಷ್ಪಕುಶಾಗ್ರಾಕ್ಷತಾದೀನಿ ನಿಕ್ಷಿಪೇತ್ || 20 ||
- ದೂರ್ವಾಂ, ವಿಷ್ಣುಪರ್ಣೀಂ ಶ್ಯಾಮಾಕಂ ಪದ್ಮಕಂ ಪಾದ್ಯಪಾತ್ರೇ || 21 ||
- ಏಲಾ ಲವಙ್ಗ ತಕ್ಕೋಲ ಲಾಮಜ್ಜಕ-ಜಾತೀಪುಷ್ಪಾಣ್ಯಾಚಮನೀಯೇ || 22 ||
- ದ್ವೇ ಹರಿದ್ರೇ ಮುರಾಶೈಲೇಯ ತಕ್ಕೋಲ ಜಟಾಮಾಂಸಿ ಮಲಯಜಗನ್ಧಚಮ್ಪಕಪುಷ್ಪಾಣಿ ಸ್ನಾನೀಯೇ || 23 ||
- ಅನ್ಯಸ್ಮಿನ್ ಪಾತ್ರೇ ಸರ್ವಾರ್ಥತೋಯಂ ಪರಿಕಲ್ಪ್ಯ,
- ತತೋಽರ್ಘ್ಯಪಾತ್ರಂ ಪಾಣಿನಾ ಸ್ಪೃಷ್ಟ್ವಾ, ಮೂಲಮನ್ತ್ರೇಣಾ ಅಭಿಮನ್ತ್ರ್ಯ,
- ‘ಓಂ ನಮೋ ಭಗವತೇಽರ್ಘ್ಯಂ ಪರಿಕಲ್ಪಯಾಮಿ ‘ ಇತ್ಯರ್ಘ್ಯಂ ಪರಿಕಲ್ಪಯೇತ್ || 24 ||
- ಏವಮೇವ ‘ ಪಾದ್ಯಂ ಪರಿಕಲ್ಪಯಾಮಿ ‘ ಇತಿ ಪಾದ್ಯಮ್ || 25 ||
- ‘ ಆಚಮನೀಯಂ ಪರಿಕಲ್ಪಯಾಮಿ ’ ಇತಿ ಆಚಮನೀಯಮ್ || 26 ||
- ‘ ಸ್ನಾನೀಯಂ ಪರಿಕಲ್ಪಯಾಮಿ ’ ಇತಿ ಸ್ನಾನೀಯಮ್ || 27 ||
- ‘ ಶುದ್ಧೋದಕಂ ಪರಿಕಲ್ಪಯಾಮಿ ’ ಇತಿ ಶುದ್ಧೋದಕಮ್ || 28 ||
(ಪ್ರೋಕ್ಷಣಂ )
- ತತೋಽರ್ಘ್ಯಜಲಮ್ ಅನ್ಯೇನ ಪಾತ್ರೇಣಾದಾಯ, ಯಾಗಭೂಮಿಂ ಸರ್ವಾಣಿ ಚ ಯಾಗದ್ರವ್ಯಾಣ್ಯಾತ್ಮಾನಂ ಚ ಪ್ರತ್ಯೇಕಂ ಸಂಪ್ರೋಕ್ಷ್ಯಾಸನಂ ಪರಿಕಲ್ಪಯೇತ್|| 29 ||
(ಆಧಾರಶಕ್ತ್ಯಾದಿಸತ್ಕರಣಂ )
- 1. ‘ ಓಂ ಆಧಾರಶಕ್ತ್ಯೈ ನಮ:’
- ‘ ಓಂ ಪ್ರಕೃತ್ಯೈ ನಮ:’,
- ‘ ಓಂ ಅಖಿಲಜಗದಾಧಾರಾಯ ಕೂರ್ಮರೂಪಿಣೇ ನಾರಾಯಣಾಯ ನಮ:’
- ‘ ಓಂ ಭಗವತೇಽನನ್ತಾಯ ನಾಗರಾಜಾಯ ನಮ:’
- ‘ ಓಂ ಭೂಂ ಭೂಮ್ಯೈ ನಮ:’
- ಇತಿ ಯಥಾಸ್ಥಾನಮುಪರ್ಯುಪರಿ ಧ್ಯಾತ್ವಾ ಪ್ರಣಮ್ಯ,
- 6. ‘ ಓಂ ಶ್ರೀವೈಕುಣ್ಠಾಯ ದಿವ್ಯಲೋಕಾಯ ನಮ:’ ಇತಿ ದಿವ್ಯಲೋಕಂ ಪ್ರಣಮ್ಯ,
- 7. ‘ ಓಂ ಶ್ರೀವೈಕುಣ್ಠಾಯ ದಿವ್ಯಜನಪದಾಯ ನಮ:’ ಇತಿ ದಿವ್ಯಜನಪದಂ ಪ್ರಣಮ್ಯ,
- 8. ‘ ಓಂ ಶ್ರೀವೈಕುಣ್ಠಾಯ ದಿವ್ಯನಗರಾಯ ನಮ:’ ಇತಿ ದಿವ್ಯನಗರಂ ಪ್ರಣಮ್ಯ,
- 9. ‘ ಓಂ ಶ್ರೀವೈಕುಣ್ಠಾಯ ದಿವ್ಯವಿಮಾನಾಯ ನಮ:’ ಇತಿ ದಿವ್ಯವಿಮಾನಂ ಪ್ರಣಮ್ಯ,
- 10. ‘ ಓಂ ಆನನ್ದಮಯಾಯ ದಿವ್ಯಮಣ್ಟಪರತ್ನಾಯ ನಮ:’ ಇತಿ ಮಣ್ಟಪರತ್ನಂ ಪ್ರಣಮ್ಯ,
- ತಸ್ಮಿನ್,
- ‘ ಓಂ ಅನನ್ತಾಯ ನಮ:’ ಇತ್ಯಾಸ್ತರಣಂ ಪ್ರಣಮ್ಯ,
- ತಸ್ಮಿನ್ನುಪರಿ,
- ‘ ಓಂ ಧರ್ಮಾಯ ನಮ:’ ಇತ್ಯಾಗ್ನೇಯ್ಯಾಂ ಪಾದಂ ವಿನ್ಯಸ್ಯ,
- ‘ ಓಂ ಜ್ಞಾನಾಯ ನಮ:’ ಇತಿ ನೈರ್ಋತ್ಯಾಮ್,
- ‘ ಓಂ ವೈರಾಗ್ಯಾಯ ನಮ:’ ಇತಿ ವಾಯವ್ಯಾಮ್,
- ಓಂ ಐಶ್ವರ್ಯಾಯ ನಮ: ಇತ್ಯೈಶಾನ್ಯಾಮ್,
- 16. ‘ ಓಂ ಅಧರ್ಮಾಯ ನಮ:’ ಇತಿ ಪ್ರಾಚ್ಯಾಂ ಪೀಠಗಾತ್ರಂ ವಿನ್ಯಸ್ಯ,
- ‘ಓಂ ಅಜ್ಞಾನಾಯ ನಮ:’ ಇತಿ ದಕ್ಷಿಣಸ್ಯಾಮ್,
- ‘ ಓಂ ಅವೈರಾಗ್ಯಾಯ ನಮ:’ ಇತಿ ಪ್ರತೀಚ್ಯಾಮ್,
- ‘ ಓಂ ಅನೈಶ್ವರ್ಯಾಯ ನಮ:’ ಇತ್ಯುತ್ತರಸ್ಯಾಮ್,
- ಏಭಿ: ಪರಿಚ್ಛಿನ್ನತನುಂ, ಪೀಠಭೂತಂ ಸದಾತ್ಮಕಮನನ್ತಂ ವಿನ್ಯಸ್ಯ,
- ಪಶ್ಚಾತ್ ಸರ್ವಕಾರ್ಯೋನ್ಮುಖಂ ವಿಭುಮನನ್ತಮ್ –
- ‘ ಓಂ ಅನನ್ತಾಯ ನಮ:’ ಇತಿ ವಿನ್ಯಸ್ಯ,
- ತಸ್ಮಿನ್ನುಪರಿ –
- ‘ ಓಂ ಪದ್ಮಾಯ ನಮ:’ ಇತಿ ಪದ್ಮಂ ವಿನ್ಯಸ್ಯ,
- ತತ್ಪೂರ್ವಪತ್ರೇ
- ‘ ಓಂ ವಿಮಲಾಯೈ (ಚಾಮರಹಸ್ತಾಯೈ) ನಮ:’ ಇತಿ ವಿಮಲಾಂ ಚಾಮರಹಸ್ತಾಂ ವಿನ್ಯಸ್ಯ,
- ತತ ಆರಭ್ಯ ಪ್ರಾದಕ್ಷಿಣ್ಯೇನೈಶಾನಾನ್ತಂ ಪತ್ರೇಷು
- ‘ ಓಂ ಉತ್ಕರ್ಷಿಣ್ಯೈ ಚಾಮರಹಸ್ತಾಯೈ ನಮ:’
- ‘ ಓಂ ಜ್ಞಾನಾಯೈ ಚಾಮರಹಸ್ತಾಯೈ ನಮ:’
- ‘ ಓಂ ಕ್ರಿಯಾಯೈ ಚಾಮರಹಸ್ತಾಯೈ ನಮ:’
- ‘ ಓಂ ಯೋಗಾಯೈ ಚಾಮರಹಸ್ತಾಯೈ ನಮ:
- ‘ ಓಂ ಪ್ರಹ್ವ್ಯೈ ಚಾಮರಹಸ್ತಾಯೈ ನಮ:’
- ‘ ಓಂ ಸತ್ಯಾಯೈ ಚಾಮರಹಸ್ತಾಯೈ ನಮ:’
- ‘ ಓಂ ಈಶಾನಾಯೈ ಚಾಮರಹಸ್ತಾಯೈ ನಮ:’
– ಇತಿ ಅಷ್ಟ ಶಕ್ತೀಶ್ಚಾಮರಹಸ್ತಾ ವಿನ್ಯಸ್ಯ,
- 30. ‘ ಓಂ ಅನುಗ್ರಹಾಯೈ ಚಾಮರಹಸ್ತಾಯೈ ನಮ:’ ಇತಿ ಕರ್ಣಿಕಾಪೂರ್ವಭಾಗೇಽನುಗ್ರಹಾಂ ಚಾಮರಹಸ್ತಾಂ ವಿನ್ಯಸೇತ್ |
- 31. ‘ ಓಂ ಜಗತ್ಪ್ರಕೃತಯೇ ಯೋಗಪೀಠಾಯ ನಮ:’ ಇತಿ ಯೋಗಪೀಠಂ ಸಂಕಲ್ಪ್ಯ,
- 32. ‘ ಓಂ ದಿವ್ಯಾಯ ಯೋಗಪರ್ಯಙ್ಕಾಯ ನಮಃ’ ಇತಿ ದಿವ್ಯಯೋಗಪರ್ಯಙ್ಕಾಯ ವಿನ್ಯಸ್ಯ,
- ತಸ್ಮಿನ್ನನನ್ತಂ ನಾಗರಾಜಂ ಸಹಸ್ರಫಣಾಶೋಭಿತಮ್,
- ‘ ಓಂ ಅನನ್ತಾಯ ನಾಗರಾಜಾಯ ನಮ:’ ಇತಿ ವಿನ್ಯಸ್ಯ,
- 34. ‘ ಓಂ ಅನನ್ತಾಯ ನಮ:’ ಇತಿ ಪುರಸ್ತಾತ್ ಪಾದಪೀಠಂ ವಿನ್ಯಸ್ಯ,
- ಸರ್ವಾಣ್ಯಾಧಾರಶಕ್ತ್ಯಾದೀನಿ ಪೀಠಾನ್ತಾನಿ ತತ್ತ್ವಾನಿ ಪ್ರತ್ಯೇಕಂ ಗನ್ಧಪುಷ್ಪಧೂಪದೀಪೈಃ ಸಂಪೂಜ್ಯ,
- ಸರ್ವಪರಿವಾರಾಣಾಂ ತತ್ತತ್ಸ್ಥಾನೇಷು ಪದ್ಮಾಸನಾನಿ ಸಂಕಲ್ಪ್ಯ,
- ಅನನ್ತ ಗರುಡ ವಿಷ್ವಕ್ಸೇನಾನಾಂ ಸಪೀಠಕಂ ಪದ್ಮಂ ವಿನ್ಯಸ್ಯ,
- ಸರ್ವತ: ಪುಷ್ಪಾಕ್ಷತಾದೀನಿ ವಿಕೀರ್ಯ,
- ಯೋಗಪೀಠಸ್ಯ ಪಶ್ಚಿಮೋತ್ತರದಿಗ್ಭಾಗೇ
- ‘ ಓಂ ಅಸ್ಮದ್ಗುರುಭ್ಯೋ ನಮ:’ ಇತಿ ಗುರೂನ್ ಗನ್ಧ ಪುಷ್ಪ ಧೂಪ ದೀಪೈಃ ಅಭ್ಯರ್ಚ್ಯ,
- ಪ್ರಣಮ್ಯ ಅನುಜ್ಞಾಪ್ಯ ಭಗವದ್ಯಾಗಮಾರಭೇತ || 30 ||
[ ಭಗವಧ್ಯಾನಯಾಚನೇ ]
- ಕಲ್ಪಿತೇ ನಾಗಭೋಗೇ ಸಮಾಸೀನಂ ಭಗವನ್ತಂ ನಾರಾಯಣಂ ಪುಣ್ಡರೀಕತದಲಾಮಲಾಯತಾಕ್ಷಂ ಕಿರೀಟಹಾರಕೇಯೂರಕಟಕಾದಿಸರ್ವಭೂಷಣೈರ್ಭೂಷಿತಂ ಆಕುಞ್ಚಿತದಕ್ಷಿಣಪಾದಂ ಪ್ರಸಾರಿತವಾಮಪಾದಂ ಜಾನುನ್ಯಸ್ತ-ಪ್ರಸಾರಿತದಕ್ಷಿಣಭುಜಂ ನಾಗಭೋಗೇ ವಿನ್ಯಸ್ತವಾಮಭುಜಮ್ ಊರ್ಧ್ವಭುಜದ್ವಯೇನ ಶಙ್ಖಚಕ್ರಧರಂ ಸರ್ವೇಷಾಂ ಸೃಷ್ಟಿಸ್ಥಿತಿ-ಪ್ರಲಯಹೇತುಭೂತಮಞ್ಜನಾಭಂ ಕೌಸ್ತುಭೇನ ವಿರಾಜಮಾನಂ ಚಕಾಸತಮ್ ಉದಗ್ರಪ್ರಬುದ್ಧಸ್ಫುರದಪೂರ್ವಾಚಿನ್ತ್ಯ-ಪರಮಸತ್ತ್ವಪಞ್ಚಶಕ್ತಿಮಯವಿಗ್ರಹಂ ಪಞ್ಚೋಪನಿಷದೈರ್ಧ್ಯಾತ್ವಾ,
- ‘ ಆರಾಧನಾಭಿಮುಖೋ ಭವ ’ ಇತಿ ಮೂಲಮನ್ತ್ರೇಣ ಪ್ರಾರ್ಥ್ಯ,
- ಮೂಲಮನ್ತ್ರೇಣ ದಣ್ಡವತ್ಪ್ರಣಮ್ಯ, ಉತ್ಥಾಯ, ಸ್ವಾಗತಂ ನಿವೇದ್ಯ,
- ಯಾವದಾರಾಧನಸಮಾಪ್ತಿಸಾನ್ನಿಧ್ಯಯಾಚನಂ ಕುರ್ಯಾತ್ || 31 ||
( ಕ್ವಾಚಿಕ್ತಾವಾಹನಪ್ರಕಾರಃ )
- ಅನ್ಯತ್ರ ಸ್ವಾಭಿಮತೇ ದೇಶೇ ಪೂಜಾ ಚೇದೇವಮಾವಾಹನಮ್
‘ ಮನ್ತ್ರಯೋಗಸ್ಸಮಾಹ್ವಾನಂ ಕರಪುಷ್ಪೋಪದರ್ಶನಮ್ ।
ಬಿಮ್ಬೋಪವೇಶನಂ ಚೈವ ಯೋಗವಿಗ್ರಹಚಿನ್ತನಮ್ ||
ಪ್ರಣಾಮಶ್ಚ ಸಮುತ್ಥಾನಂ ಸ್ವಾಗತಂ ಪುಷ್ಪಮೇವ ಚ ।
ಸಾನ್ನಿಧ್ಯಯಾಚನಂ ಚೇತಿ ತತ್ರಾ ಆಹ್ವಾನಸ್ಯ ಸತ್ಕ್ರಿಯಾ:’|| ಇತಿ || 32 ||
- ತತೋ ಭಗವನ್ತಂ ಪ್ರಣಮ್ಯ,
- ದಕ್ಷಿಣತ: -1. ‘ಓಂ ಶ್ರೀಂ ಶ್ರಿಯೈ ನಮಃ’ ಇತಿ ಶ್ರಿಯಮಾವಾಹ್ಯ ಪ್ರಣಮ್ಯ,
- ವಾಮೇ – 2. ‘ ಓಂ ಭೂಂ ಭೂಮ್ಯೈ ನಮಃ’ ಇತಿ ಮನ್ತ್ರೇಣ ಭುವಮಾವಾಹ್ಯ,
- ತತ್ರೈವ – 3. ‘ ಓಂ ನೀಂ ನೀಲಾಯೈ ನಮಃ’ ಇತಿ ನೀಲಾಮಾವಾಹ್ಯ,
- 4. ‘ ಓಂ ಕಿರೀಟಾಯ ಮಕುಟಾಘಿಪತಯೇ ನಮಃ’ ಇತ್ಯುಪರಿ ಭಗವತ: ಪಶ್ಚಿಮಪಾರ್ಶ್ವೇ – ಚತುರ್ಭುಜಂ ಚತುರ್ವಕ್ತ್ರಂ ಕೃತಾಞ್ಜಲಿಪುಟಂ ಮೂರ್ಧ್ನಿ ಭಗವತ್ಕಿರೀಟಂ ಧಾರಯನ್ತಂ ಕಿರೀಟಾಖ್ಯದಿವ್ಯಭೂಷಣಂ ಪ್ರಣಮ್ಯ,
- ಏವಮೇವ- 5. ಔಂ ಕಿರೀಟಮಾಲಾಯೈ ಆಪೀಡಾತ್ಮನೇ ನಮಃ’ – ಇತ್ಯಾಪೀಡಕಂ ತತ್ರೈವ ಪುರಸ್ತಾತ್ ಪ್ರಣಮ್ಯ,
- 6. ‘ ಓಂ ದಕ್ಷಿಣಕುಣ್ಡಲಾಯ ಮಕರಾತ್ಮನೇ ನಮ:’ ಇತಿ ದಕ್ಷಿಣಕುಣ್ಡಲಂ ದಕ್ಷಿಣತ: ಪ್ರಣಮ್ಯ,
- 7. ‘ ಓಂ ವಾಮಕುಣ್ಡಲಾಯ ಮಕರಾತ್ಮನೇ ನಮ:’ ಇತಿ ವಾಮಕುಣ್ಡಲಂ ವಾಮತ: ಪ್ರಣಮ್ಯ,
- 8. ‘ ಓಂ ವೈಜಯನ್ತ್ಯೈ ವನಮಾಲಾಯೈ ನಮಃ’ ಇತಿ ವೈಜಯನ್ತೀಂ ಪುರತ: ಪ್ರಣಮ್ಯ,
- 9. ‘ ಓಂ ಶ್ರೀಮತ್ತುಲಸ್ಯೈ ನಮಃ’ ಇತಿ ತುಲಸೀಂ ದೇವೀಂ ಪುರಸ್ತಾತ್ ಪ್ರಣಮ್ಯ,
- 10. ‘ ಓಂ ಶ್ರೀವತ್ಸಾಯ ಶ್ರೀನಿವಾಸಾಯ ನಮಃ’ ಇತಿ ಶ್ರೀವತ್ಸಂ ಪುರತ: ಪ್ರಣಮ್ಯ,
- 11. ‘ ಓಂ ಹಾರಾಯ ಸರ್ವಾಭರಣಾಧಿಪತಯೇ ನಮಃ’ ಇತಿ ಹಾರಂ ಪುರತ: ಪ್ರಣಮ್ಯ,
- 12. ‘ ಓಂ ಶ್ರೀಕೌಸ್ತುಭಾಯ ಸರ್ವರತ್ನಾಧಿಪತಯೇ ನಮ ಇತಿ ಕೌಸ್ತುಭಂ ಪುರತ: ಪ್ರಣಮ್ಯ,
- 13. ‘ ಓಂ ಕಾಞ್ಚೀಗುಣೋಜ್ಜ್ವಲಾಯ ದಿವ್ಯಪೀತಾಮ್ಬರಾಯ ನಮಃ’ ಇತಿ ಪೀತಾಮ್ಬರಂ ಪುರತ: ಪ್ರಣಮ್ಯ,
- 14. ‘ ಓಂ ಸರ್ವೇಭ್ಯೋ ಭಗವದ್ಭೂಷಣೇಭ್ಯೋ ನಮಃ’ ಇತಿ ಸರ್ವಭೂಷಣಾನಿ ಸರ್ವತ: ಪ್ರಣಮ್ಯ,
- 15. ‘ ಓಂ ಸುದರ್ಶನಾಯ ಹೇತಿರಾಜಾಯ ನಮಃ’ ಇತಿ ಸುದರ್ಶನಾತ್ಮಾನಂ ರಕ್ತವರ್ಣಂ, ರಕ್ತನೇತ್ರಂ (ದ್ವಿ) ಚತುರ್ಭುಜಂ ಕೃತಾಞ್ಜಲಿಪುಟಂ ಭಗವನ್ತಮಾಲೋಕಯನ್ತಂ ತದ್ದರ್ಶನಾನನ್ದೋಪಬೃಂಹಿತಮುಖಂ ಮೂರ್ಧ್ನಿ ಭಗವಚ್ಚಕ್ರಂ ಧಾರಯನ್ತಂ ದಕ್ಷಿಣತ: ಪ್ರಣಮ್ಯ,
- 16. ‘ ಓಂ ನನ್ದಕಾಯ ಖಡ್ಗಾಧಿಪತಯೇ ನಮಃ’ ಇತಿ ನನ್ದಕಾತ್ಮಾನಂ ಶಿರಸಿ ಭಗವತ್ಖಡ್ಗಂ ಧಾರಯನ್ತಂ ಪ್ರಣಮ್ಯ,
- 17. ‘ ಓಂ ಪದ್ಮಾಯ ನಮಃ’ ಇತಿ ಪದ್ಮಾತ್ಮಾನಂ ಶಿರಸಿ ಪದ್ಮಂ ಧಾರಯನ್ತಂ ಪ್ರಣಮ್ಯ,
- 18. ‘ ಓಂ ಪಾಞ್ಚಜನ್ಯಾಯ ಶಙ್ಖಾಧಿಪತಯೇ ನಮಃ’ ಇತಿ ಶಙ್ಖಾತ್ಮಾನಂ ಶ್ವೇತವರ್ಣಂ ರಕ್ತನೇತ್ರಂ ದ್ವಿಭುಜಂ ಕೃತಾಞ್ಜಲಿಪುಟಂ ಶಿರಸಿ ಶಙ್ಖಂ ಧಾರಯನ್ತಂ ವಾಮತ: ಪ್ರಣಮ್ಯ – ತತ್ರೈವ
- 19. ‘ ಓಂ ಕೌಮೋದಕ್ಯೈ ಗದಾಧಿಪತಯೇ ನಮಃ’ ಇತಿ ಗದಾಮ್ ದೇವೀಂ ಪ್ರಣಮ್ಯ,
- 20. ತತ್ರೈವ – ‘ ಓಂ ಶಾರ್ಙ್ಗಾಯ ಚಾಪಾಧಿಪತಯೇ ನಮಃ’ ಇತಿ ಶಾರ್ಙ್ಗಾತ್ಮಾನಂ ಪ್ರಣಮ್ಯ,
- 21. ‘ ಓಂ ಸರ್ವೇಭ್ಯೋ ಭಗವದ್ದಿವ್ಯಾಯುಧೇಭ್ಯೋ ನಮಃ’ ಇತಿ ಸರ್ವಾಣಿ ಭಗವದಾಯುಧಾನಿ ಪರಿತ: ಪ್ರಣಮ್ಯ,
- 22. ‘ ಓಂ ಸರ್ವಾಭ್ಯೋ ಭಗವತ್ಪಾದಾರವಿನ್ದಸಂವಾಹಿನೀಭ್ಯೋ ನಮಃ’ – ಇತಿ ದಿವ್ಯಪಾದಾರವಿನ್ದಸಂವಾಹಿನೀಸ್ಸಮನ್ತತ: ಪ್ರಣಮ್ಯ,
- 23. ‘ ಓಂ ಅನನ್ತಾಯ ನಾಗರಾಜಾಯ ನಮಃ’ ಇತಿ ಪೃಷ್ಠತೋಽನನ್ತಂ (ಭಗವನ್ತಂ) ನಾಗರಾಜಂ ಚತುರ್ಭುಜಂ ಹಲಮುಸಲಧರಂ ಕೃತಾಞ್ಜಲಿಪುಟಂ ಫಣಾಮಣಿಸಹಸ್ರಮಣ್ಡಿತೋತ್ತಮಾಙ್ಗಂ ಭಗವದ್ದರ್ಶನಾನನ್ದಬೃಂಹಿತಸರ್ವಾಙ್ಗಂ ಧ್ಯಾತ್ವಾ, ಪ್ರಣಮ್ಯ,
- 24. ಓಂ ಸರ್ವೇಭ್ಯೋ ಭಗವತ್ಪರಿಜನೇಭ್ಯೋ ನಮಃ’ ಇತ್ಯನುಕ್ತಾನನ್ತಪರಿಜನಾನ್ ಸಮನ್ತತ: ಪ್ರಣಮ್ಯ,
- 25. ‘ ಓಂ ಭಗವತ್ಪಾದುಕಾಭ್ಯಾಂ ನಮಃ’ ಇತಿ ಭಗವತ್ಪಾದುಕೇ ಪುರತ: ಪ್ರಣಮ್ಯ,
- 26. ‘ ಓಂ ಸರ್ವೇಭ್ಯೋ ಭಗವತ್ಪರಿಚ್ಛದೇಭ್ಯೋ ನಮಃ’ ಇತಿ ಸರ್ವಪರಿಚ್ಛದಾನ್ ಸಮನ್ತತ: ಪ್ರಣಮ್ಯ,
- 27. ‘ ಓಂ ವೈನತೇಯಾಯ ನಮಃ’ ಇತ್ಯಗ್ರತೋ ಭಗವತೋ ಭಗವನ್ತಂ ವೈನತೇಯಮಾಸೀನಂ ದ್ವಿಭುಜಂ ಕೃತಾಞ್ಜಲಿಪುಟಂ ಧ್ಯಾತ್ವಾ ಪ್ರಣಮ್ಯ,
- 28. ‘ ಓಂ ಶ್ರೀಮತೇ ವಿಷ್ವಕ್ಸೇನಾಯ ನಮಃ’ ಇತಿ ಭಗವತ: ಪ್ರಾಗುತ್ತರಪಾರ್ಶ್ವೇ ದಕ್ಷಿಣಾಭಿಮುಖಂ ಭಗವನ್ತಂ ವಿಷ್ವಕ್ಸೇನಮಾಸೀನಂ ಚತುರ್ಭುಜಂ ಶಙ್ಖಚಕ್ರಧರಂ ನೀಲಮೇಘನಿಭಂ ಧ್ಯಾತ್ವಾ ಪ್ರಣಮ್ಯ,
- 29. ‘ಓಂ ಗಂ ಗಜಾನನಾಯ ನಮ:’
- ‘ಓಂ ಜಂ ಜಯತ್ಸೇನಾಯ ನಮ:’
- ‘ ಓ ಹಂ ಹರಿವಕ್ತ್ರಾಯ ನಮ:’
- ‘ ಓಂ ಕಂ ಕಾಲಪ್ರಕೃತಿಸಂಜ್ಞಾಯ ನಮ:’
- ‘ ಓಂ ಸರ್ವೇಭ್ಯೋ ಶ್ರೀ ವಿಷ್ವಕ್ಸೇನಪರಿಜನೇಭ್ಯೋ ನಮ:’ ಇತಿ ವಿಷ್ವಕ್ಸೇನಪರಿಜನಾನ್ ಪ್ರಣಮ್ಯ,
- 34. ‘ ಓಂ ಚಣ್ಡಾಯ ದ್ವಾರಪಾಲಾಯ ನಮ:’
- ‘ ಓಂ ಪ್ರಚಣ್ಡಾಯ ದ್ವಾರಪಾಲಾಯ ನಮ:’ ಇತಿ ಪೂರ್ವದ್ವಾರಪಾರ್ಶ್ವಯೋ: ಪ್ರಣಮ್ಯ,
- 36. ‘ ಓಂ ಭದ್ರಾಯ ದ್ವಾರಪಾಲಾಯ ನಮ:’
- ‘ ಓಂ ಸುಭದ್ರಾಯ ದ್ವಾರಪಾಲಾಯ ನಮ:’ ಇತಿ ದಕ್ಷಿಣದ್ವಾರಪಾರ್ಶ್ವಯೋ: ಪ್ರಣಮ್ಯ,
- 38. ‘ ಓಂ ಜಯಾಯ ದ್ವಾರಪಾಲಾಯ ನಮ:’
- ‘ ಓಂ ವಿಜಯಾಯ ದ್ವಾರಪಾಲಾಯ ನಮ:’ ಇತಿ ಪಶ್ಚಿಮದ್ವಾರಪಾರ್ಶ್ವಯೋಃ ಪ್ರಣಮ್ಯ,
- 40. ‘ ಓಂ ಧಾತ್ರೇ ದ್ವಾರಪಾಲಾಯ ನಮ:’
- ‘ ಓಂ ವಿಧಾತ್ರೇ ದ್ವಾರಪಾಲಾಯ ನಮ:’ – ಇತ್ಯುತ್ತರದ್ವಾರಪಾರ್ಶ್ವಯೋ: ಪ್ರಣಮೇತ್ || 34 ||
- ಏತೇ ದ್ವಾರಪಾಲಾಸ್ಸರ್ವೇ ಶಙ್ಖಚಕ್ರಗದಾಧರಾಃ ಆಜ್ಞಾಮುದ್ರಾಧರಾಃ ಧ್ಯಾತವ್ಯಾ: || 35 ||
- 42. ‘ ಓಂ ಸರ್ವೇಭ್ಯೋ ದ್ವಾರಪಾಲೇಭ್ಯೋ ನಮಃ’ ಇತಿ ಸರ್ವದ್ವಾರೇಷು ಸರ್ವದ್ವಾರಪಾಲಾನ್ ಪ್ರಣಮ್ಯ,
- 43. ‘ ಓಂ ಕುಮುದಾಯ ಗಣಾಧಿಪತಯೇ ಸವಾಹನಪರಿವಾರಪ್ರಹರಣಾಯ ನಮಃ’ ಇತಿ ಪೂರ್ವಸ್ಯಾಂ ದಿಶಿ, ಪಾರ್ಷದೇಶ್ವರಂ ಕುಮುದಂ ಪ್ರಣಮ್ಯ,
- 44. ‘ ಓಂ ಕುಮುದಾಕ್ಷಾಯ ಗಣಾಧಿಪತಯೇ ಸವಾಹನಪರಿವಾರಪ್ರಹರಣಾಯ ನಮಃ’ ಇತ್ಯಾಗ್ನೇಯ್ಯಾಂ, ಕುಮುದಾಕ್ಷಂ ಪ್ರಣಮ್ಯ,
- 45. ‘ ಓಂ ಪುಣ್ಡರೀಕಾಯ ಗಣಾಧಿಪತಯೇ ಸವಾಹನಪರಿವಾರಪ್ರಹರಣಾಯ ನಮ ಇತಿ ದಕ್ಷಿಣಸ್ಯಾಂ ಪುಣ್ಡರೀಕಂ ಪ್ರಣಮ್ಯ,
- 46. ‘ ಓಂ ವಾಮನಾಯ ಗಣಾಧಿಪತಯೇ ಸವಾಹನಪರಿವಾರಪ್ರಹರಣಾಯ ನಮಃ’ ಇತಿ ನೈರ್ಋತ್ಯಾಂ ವಾಮನಂ ಪ್ರಣಮ್ಯ,
- 47. ‘ ಓಂ ಶಙ್ಕುಕರ್ಣಾಯ ಗಣಾಧಿಪತಯೇ ಸವಾಹನಪರಿವಾರಪ್ರಹರಣಾಯ ನಮಃ’ ಇತಿ ಪಶ್ಚಿಮಾಯಾಂ ಶಙ್ಕುಕರ್ಣಂ ಪ್ರಣಮ್ಯ,
- 48. ‘ ಓಂ ಸರ್ಪನೇತ್ರಾಯ ಗಣಾಧಿಪತಯೇ ಸವಾಹನಪರಿವಾರಪ್ರಹರಣಾಯ ನಮಃ’ ಇತಿ ವಾಯವ್ಯಾಂ ಸರ್ಪನೇತ್ರಂ ಪ್ರಣಮ್ಯ,
- 49. ‘ ಓಂ ಸುಮುಖಾಯ ಗಣಾಧಿಪತಯೇ ಸವಾಹನಪರಿವಾರಪ್ರಹರಣಾಯ ನಮಃ’ ಇತ್ಯುದೀಚ್ಯಾಂ ಸುಮುಖಂ ಪ್ರಣಮ್ಯ,
- 50. ‘ ಓಂ ಸುಪ್ರತಿಷ್ಠಿತಾಯ ಗಣಾಧಿಪತಯೇ ಸವಾಹನಪರಿವಾರಪ್ರಹರಣಾಯ ನಮಃ’ ಇತ್ಯೈಶಾನ್ಯಾಂ ಸುಪ್ರತಿಷ್ಠಿತಂ ಪ್ರಣಮ್ಯ,
- 51. ‘ ಓಂ ಸರ್ವೇಭ್ಯೋ ಭಗವತ್ಪಾರ್ಷದೇಭ್ಯೋ ನಮಃ’ ಇತಿ ಸರ್ವಸ್ಮಾದ್ಬಹಿ: ಪ್ರಣಮೇತ್ || 36 ||
- 1. ಅನ್ಯತ್ರಾವಾಹ್ಯ ಪೂಜಾಯಾಮಾವಾಹನಸ್ಥಾನಾನಿ ಪರಮವ್ಯೋಮಕ್ಷೀರಾರ್ಣವಾದಿತ್ಯಮಣ್ಡಲಹೃದಯಾನಿ ಮಥುರಾ- ದ್ವಾರಕಾಗೋಕುಲಾಯೋಧ್ಯಾದೀನಿ ದಿವ್ಯಾವತಾರಸ್ಥಾನಾನಿ ಚಾನ್ಯಾನಿ ಪೌರಾಣಿಕಾನಿ ಶ್ರೀರಙ್ಗಾದೀನಿ ಚ ಯಥಾರುಚಿ || 37 ||
- ಏವಂ ಭಗವನ್ತಂ ನಾರಾಯಣಂ ದೇವೀಭೂಷಣಾಯುಧ ಪರಿಜನ ಪರಿಚ್ಛದದ್ವಾರಪಾಲಪಾರ್ಷದೈಸ್ಸೇವ್ಯಮಾನಂ, ಸ್ವಾಧೀನ ತ್ರಿವಿಧಚೇತನಾಚೇತನ ಸ್ವರೂಪಸ್ಥಿತಿ ಪ್ರವೃತ್ತಿಭೇದಂ, ಕ್ಲೇಶಕರ್ಮಾದ್ಯಶೇಷ ದೋಷಾಸಂಸ್ಪೃಷ್ಟಂ, ಸ್ವಾಭಾವಿಕಾನವಧಿಕಾತಿಶಯ ಜ್ಞಾನ ಬಲೈಶ್ವರ್ಯ ವೀರ್ಯ ಶಕ್ತಿತೇಜ: ಪ್ರಭೃತ್ಯಸಂಖ್ಯೇಯ ಕಲ್ಪಾಣಗುಣಗಣೌಘಮಹಾರ್ಣವಂ ಧ್ಯಾತ್ವಾ, ಪ್ರಣಮ್ಯ,
- ಮೂಲಮನ್ತ್ರೇಣ ಸ್ವಾತ್ಮಾನಂ ದೇವಾಯ ನಿವೇದ್ಯ,
- ಪ್ರಣಮ್ಯಾನುಜ್ಞಾಪ್ಯ, ಭಗವತ್ಪೂಜಾಮಾರಭೇತ || 38 ||
[ ಮನ್ತ್ರಾಸನಂ ]
- ಪಾತ್ರೇಣ (ಉದ್ಧರಿಣ್ಯಾ) ಪೂರ್ವಸ್ಥಿತಾತ್ ಅರ್ಘ್ಯಪಾತ್ರಾದರ್ಘ್ಯಜಲಮಾದಾಯ, ಪಾಣಿಭ್ಯಾಂ (ಘ್ರಾಣ) ಮುಖಸಮಮುದ್ಧೃತ್ಯ,
- ‘ ಭಗವನ್! ಇದಂ ಪ್ರತಿಗೃಹ್ಣೀಷ್ವ’ ಇತಿ ಚಿನ್ತಯನ್ ಭಗವನ್ಮುಖೇ ದರ್ಶಯಿತ್ವಾ,
- ಭಗವದ್ದಕ್ಷಿಣಹಸ್ತೇ ಕಿಂಚಿತ್ಪ್ರದಾಯಾರ್ಘ್ಯಂ ಪ್ರತಿಗ್ರಹಪಾತ್ರೇ ಪ್ರಕ್ಷಿಪೇತ್ || 39 ||
- ಹಸ್ತೌ ಪ್ರಕ್ಷಾಲ್ಯ, ಪಾದಯೋ: ಪುಷ್ಪಾಣಿ ಸಮರ್ಪ್ಯ,
- ಪಾದ್ಯಪಾತ್ರಾತ್ಪಾದ್ಯಜಲಮಾದಾಯ ಪಾದಯೋ: ಕಿಂಚಿತ್ ಸಮರ್ಪ್ಯ, ಮನಸಾ ಪಾದೌ ಪ್ರಕ್ಷಾಲಯನ್, ಪಾದ್ಯಂ ಪ್ರತಿಗ್ರಹಪಾತ್ರೇ ನಿಕ್ಷಿಪೇತ್ || 40 ||
- ಹಸ್ತೌ ಪ್ರಕ್ಷಾಲ್ಯ, ವಸ್ತ್ರೇಣ ಪಾದೌ ಸಂಮೃಜ್ಯ ಗನ್ಧಪುಷ್ಪಾಣಿ ದತ್ವಾ,
- ಆಚಮನೀಯಪಾತ್ರಾದಾಚಮನೀಯಮಾದಾಯ, ಭಗವದ್ದಕ್ಷಿಣಹಸ್ತೇ ಕಿಂಚಿತ್ ಸಮರ್ಪ್ಯ, ‘ಭಗವದ್ವದನೇ ಆಚಮನೀಯಂ ಸಮರ್ಪಿತಮ್ ’ ಇತಿ ಮನಸಾ ಭಾವಯನ್, ಶೇಷಮಾಚಮನೀಯಂ ಪ್ರತಿಗ್ರಹಪಾತ್ರೇ ಪ್ರಕ್ಷಿಪೇತ್ || 41 ||
- ತತ: ಗನ್ಧ ಪುಷ್ಪ ಧೂಪ ದೀಪ ಆಚಮನ ಮುಖವಾಸ ತಾಮ್ಬೂಲಾದಿ ನಿವೇದನಂ ಕೃತ್ವಾ, ಪ್ರಣಮ್ಯ,
- ‘ಆತ್ಮಾನಮಾತ್ಮೀಯಂ ಚ ಸರ್ವಂ, ಭಗವನ್ ! ನಿತ್ಯಕಿಂಕರತ್ವಾಯ ಸ್ವೀಕುರು’ ಇತಿ ಭಗವತೇ ನಿವೇದಯೇತ್ || 42 ||
( ಸ್ನಾನಾಸನಂ )
- ತತ: ಸ್ನಾನಾರ್ಥಮಾಸನಮಾನೀಯ, ಗನ್ಧಾದಿಭಿರಭ್ಯರ್ಚ್ಯ, ಭಗವನ್ತಂ ಪ್ರಣಮ್ಯ ಅನುಜ್ಞಾಪ್ಯ, ಪಾದುಕೇ ಪ್ರದಾಯ,
- ತತ್ರೋಪವಿಷ್ಟೇ – ಮಾಲ್ಯಭೂಷಣವಸ್ತ್ರಾಣ್ಯಪನೀಯ, ವಿಷ್ವಕ್ಸೇನಾಯ ದತ್ವಾ,
- ಸ್ನಾನಶಾಟಿಕಾಂ ಪ್ರದಾಯ,
- ಅರ್ಘ್ಯಪಾದ್ಯಾಚಮನೀಯ ಪಾದಪೀಠಪ್ರದಾನ ದನ್ತಕಾಷ್ಠ ಜಿಹ್ವಾನಿರ್ಲೇಹನಗಣ್ಡೂಷ-ಮುಖಪ್ರಕ್ಷಾಲನ ಆಚಮನಾದರ್ಶಪ್ರದರ್ಶನ ಹಸ್ತಪ್ರಕ್ಷಾಲನ ಮುಖವಾಸ ತಾಮ್ಬೂಲ ತೈಲಾಭ್ಯಙ್ಗೋದ್ವರ್ತನ ಆಮಲಕತೋಯ ಕಙ್ಕ-ತಪ್ಲೋತದೇಹಶೋಧನ ಶಾಟಿಕಾಪ್ರದಾನ ಹರಿದ್ರಾಲೇಪನ ಪ್ರಕ್ಷಾಲನ ವಸ್ತ್ರೋತ್ತರೀಯ ಯಜ್ಞೋಪವೀತಪ್ರದಾನ ಪಾದ್ಯಾಚಮನ ಪವಿತ್ರಪ್ರದಾನ ಗನ್ಧ ಪುಷ್ಪ ಧೂಪ ದೀಪಾಚಮನ ನೃತ್ತಗೀತ ವಾದ್ಯಾದಿ ಸರ್ವಮಙ್ಗಲ ಸಂಯುಕ್ತಾಭಿಷೇಕ ನೀರಾಜನಾಚಮನ ದೇಹಶೋಧನ ಪ್ಲೋತವಸ್ತ್ರೋತ್ತರೀಯ ಯಜ್ಞೋಪವೀತಾಚಮನ ಕೂರ್ಚಪ್ರಸಾರಣ ಸಹಸ್ರಧಾರಾಭಿಷೇಕ -ನೀರಾಜನಾಚಮನ ದೇಹಶೋಧನ ಪ್ಲೋತ-ವಸ್ತ್ರೋತ್ತರೀಯ ಯಜ್ಞೋಪವೀತಾಚಮನಾನಿ ದದ್ಯಾತ್ || 43 ||
( ಅಲ್ನ್ಕಾರಾಸನಂ )
- ತತೋಽಲಙ್ಕಾರಾಸನಮಭ್ಯರ್ಚ್ಯ, ಪ್ರಣಮ್ಯಾನುಜ್ಞಾಪ್ಯ,
- ಪಾದುಕೇ ಪ್ರದಾಯ, ತತ್ರೋಪವಿಷ್ಟೇ –
- ಪೂರ್ವವತ್ ಸ್ನಾನೀಯವರ್ಜ್ಯಂಮರ್ಘ್ಯಪಾದ್ಯಾ ಆಚಮನೀಯಶುದ್ಧೋದಕಾನಿ ಮನ್ತ್ರೇಣ ಕಲ್ಪಯಿತ್ವಾ,
- ಭಗವತೇ ಅರ್ಘ್ಯಪಾಧ್ಯಾ ಆಚಮನೀಯಾನಿ ದತ್ವಾ,
- ಗನ್ಧಪುಷ್ಪಪಾದಸಮ್ಮರ್ದನವಸ್ತ್ರೋತ್ತರೀಯಭೂಷಣೋಪವೀತಾರ್ಘ್ಯ – ಪಾದ್ಯಾಚಮನೀಯಾನಿ ದತ್ವಾ
- ಸಮಸ್ತಪರಿವಾರಾಣಾಂ ಸ್ನಾನವಸ್ತ್ರಾದಿಭೂಷಣಾನ್ತಂ ದತ್ವಾ,
- ಗನ್ಧಾದೀನ್ ದೇವಾನನ್ತರಂ ಸರ್ವಪರಿವಾರಾಣಾಂ ಪ್ರತ್ಯೇಕಂ ಪ್ರದಾಯ,
- ಧೂಪದೀಪಾಚಮನಾನ್ತಂ ದದ್ಯಾತ್ || 44 ||
- ಅಥವಾ ಸರ್ವಪರಿವಾರಾಣಾಂ ಗನ್ಧಾದೀನೇವ ದದ್ಯಾತ್ || 45 ||
- ಗನ್ಧ ಪುಷ್ಪ ಪ್ರದಾನಾಲಙ್ಕಾರ ಅಞ್ಜನೋರ್ಧ್ವಪುಣ್ಡ್ರಾದರ್ಶ ಧೂಪ ದೀಪಾಚಮನ ಧ್ವಜ ಛತ್ರ ಚಾಮರ ವಾಹನ ಶಙ್ಖ ಚಿಹ್ನಕಾಹಲ- ಭೇರ್ಯಾದಿ ಸಕಲನೃತ್ತಗೀತವಾದ್ಯಾದಿಭಿರಭ್ಯರ್ಚ್ಯ,
- ಮೂಲಮನ್ತ್ರೇಣ ಪುಷ್ಪಂ ಪ್ರದಾಯ, ಪ್ರತ್ಯಕ್ಷರಂ ಪುಷ್ಪಂ ಪ್ರದಾಯ
- ದ್ವಾದಶಾಕ್ಷರೇಣ ವಿಷ್ಣುಷಡಕ್ಷರೇಣ ವಿಷ್ಣುಗಾಯತ್ರ್ಯಾ ಪಞ್ಚೋಪನಿಷದೈ: ಪುರುಷಸೂಕ್ತಋಗ್ಭಿಃ ಪುಷ್ಪಂ ಪ್ರದಾಯ ಅನ್ಯೈಶ್ಚ ಭಗವನ್ಮನ್ತ್ರೈಶ್ಶಕ್ತಷ್ಟೋತ್ಪುಷ್ಪಂ ಪ್ರದಾಯ,
- ದೇವ್ಯಾದಿದಿವ್ಯಪಾರಿಷದಾನ್ತಂ ತತ್ತನ್ಮನ್ತ್ರೇಣ ಪುಷ್ಪಂ ದತ್ವಾ ಪ್ರಣಮ್ಯ,
- ಪ್ರತಿದಿಶಂ ಪ್ರದಕ್ಷಿಣಪ್ರಣಾಮಪೂರ್ವಕಂ ಭಗವತೇ ಪುಷ್ಪಾಞ್ಜಲಿಂ ದತ್ವಾ ಪುರತ: ಪ್ರಣಮ್ಯ,
- ಶ್ರುತಿಸುಖೈ: ಸ್ತೋತ್ರೈ: ಸ್ತುತ್ವಾ,
- ಸ್ವಾತ್ಮಾನಂ ನಿತ್ಯಕಿಂಕರತಯಾ ನಿವೇದ್ಯ, ತಥೈವ ಧ್ಯಾತ್ವಾ,
- ಯಥಾಶಕ್ತಿ ಮೂಲಮನ್ತ್ರಂ ಜಪಿತ್ವಾ,
- ಸರ್ವಭೋಗಪ್ರಪೂರಣೀಂ ಮಾತ್ರಾಂ ದತ್ವಾ,
- ಮುಖವಾಸತಾಮ್ಬೂಲೇ ಪ್ರದಾಯ, ಅರ್ಘ್ಯಂ ದತ್ವಾ,
( ಭೋಜ್ಯಾಸನಂ )
- ಭೋಜ್ಯಾಸನಮಭ್ಯರ್ಚ್ಯ, ಪ್ರಣಮ್ಯಾನುಜ್ಞಾಪ್ಯ ಪಾದುಕೇ ಪ್ರದಾಯ,
- ತತ್ರೋಪವಿಷ್ಟೇ – ಪಾದ್ಯಾಚಮನೀಯಾರ್ಹಣೀಯಾನಿ ದತ್ವಾ,
- ಗುಡಂ, ಮಾಕ್ಷಿಕಂ ಸರ್ಪಿರ್ದಧಿ ಕ್ಷೀರಂ ಚೇತಿ ಪಾತ್ರೇ ನಿಕ್ಷಿಪ್ಯ
- ಶೋಷಣಾದಿಭಿರ್ವಿಶೋಧ್ಯ, ಅರ್ಘ್ಯಜಲೇನ ಸಂಪ್ರೋಕ್ಷ್ಯ, ಮಧುಪರ್ಕಮ್
- ಅವನತಶಿರಾಃ ಹರ್ಷೋತ್ಫುಲ್ಲನಯನಃ ಹೃಷ್ಟಮನಾಃ ಭೂತ್ವಾ ಪ್ರದಾಯ
- ಆಚಮನೀಯಂ ದದ್ಯಾತ್ || 46 ||
- ಯತ್ಕಿಂಚಿದ್ದ್ರವ್ಯಂ ಭಗವತೇ ದೇಯಮ್ ; ತತ್ಸರ್ವಂ ಶೋಷಣಾದಿಭಿರ್ವಿಶೋಧ್ಯಾರ್ಘ್ಯಜಲೇನ ಸಂಪ್ರೋಕ್ಷ್ಯ ದದ್ಯಾತ್ || 47 ||
- ತತಶ್ಚ ಗಾಂ ಸ್ವರ್ಣರತ್ನಾದಿಕಂ ಚ ಯಥಾಶಕ್ತಿ ದದ್ಯಾತ್ || 48 ||
- ತತಸ್ಸುಸಂಸ್ಕೃತಾನ್ನಮಾಜ್ಯಾಢ್ಯಂ ದಧಿಕ್ಷೀರಮಧೂನಿ ಚ ಫಲಮೂಲವ್ಯಞ್ಜನಾನಿ ಮೋದಕಾಂಶ್ಚಾನ್ಯಾನಿ ಚ ಲೋಕೇ ಪ್ರಿಯತಮಾನ್ಯಾತ್ಮನಶ್ಚೇಷ್ಟಾನಿ ಶಾಸ್ತ್ರಾವಿರುದ್ಧಾನಿ ಸಂಭೃತ್ಯ
- ಶೋಷಣಾದಿ ಕೃತ್ವಾ, ಅರ್ಘ್ಯಜಲೇನ ಸಂಪ್ರೋಕ್ಷ್ಯ
- ಅಸ್ತ್ರಮನ್ತ್ರೇಣ ರಕ್ಷಾಂ ಕೃತ್ವಾ, ಸುರಭಿಮುದ್ರಾಂ ಪ್ರದರ್ಶ್ಯ
- ಅರ್ಹಾಣಪೂರ್ವಕಂ ಹವಿರ್ನಿವೇದಯೇತ್ || 49 ||
- ‘ ಅತಿಪ್ರಭೂತಮ್ ಅತಿಸಮಗ್ರಮತಿಪ್ರಿಯತಮಮತ್ಯನ್ತಭಕ್ತಿಕೃತಮಿದಂ ಸ್ವೀಕುರು’ ಇತಿ ಪ್ರಣಾಮಪೂರ್ವಕಮತ್ಯನ್ತ ಸಾಧ್ವಸ ವಿನಯಾವನತೋ ಭೂತ್ವಾ ನಿವೇದಯೇತ್ || 50 ||
- ತತಶ್ಚಾನುಪಾನತರ್ಪಣೇ ಪ್ರದಾಯ
- ಹಸ್ತಪ್ರಕ್ಷಾಲನಾಚಮನ ಹಸ್ತಸಮ್ಮಾರ್ಜನ ಚನ್ದನ ಮುಖವಾಸತಾಮ್ಬೂಲಾದೀನಿ ದತ್ವಾ
- ಪ್ರಣಮ್ಯ ಪುನರ್ಮನ್ತ್ರಾಸನಂ ಕೂರ್ಚೇನ ಮಾರ್ಜಯಿತ್ವಾ,
- ಅಭ್ಯರ್ಚ್ಯಾನುಜ್ಞಾಪ್ಯ ಪಾದುಕೇ ಪ್ರದಾಯ
- ತತ್ರೋಪವಿಷ್ಟೇ – ಮಾಲ್ಯಾದಿಕಮಪೋಹ್ಯ ವಿಷ್ವಕ್ಸೇನಾಯ ದತ್ವಾ,
- ಪಾದ್ಯಾಚಮನ ಗನ್ಧ ಪುಷ್ಪ ಧೂಪ ದೀಪಾಚಮನ ಅಪೂಪ ಫಲಾದೀನಿ ದತ್ವಾ,
- ಮುಖವಾಸ ತಾಂಬೂಲ ನೃತ್ತಗೀತ ವಾದ್ಯಾದಿಭಿಃ ಅಭ್ಯರ್ಚ್ಯ,
- ಪ್ರದಕ್ಷಿಣೀಕೃತ್ಯ ದಣ್ಡವತ್ಪ್ರಣಮ್ಯ,
- ಪರ್ಯಙ್ಕಾಸನಮಭ್ಯರ್ಚ್ಯಾನುಜ್ಞಾಪ್ಯ ಪಾದುಕೇ ಪ್ರದಾಯ,
- ತತ್ರೋಪವಿಷ್ಟೇ – ಪಾದ್ಯಾಚಮನೇ ದತ್ವಾ
- ಮಾಲ್ಯಭೂಷಣವಸ್ತ್ರಾಣ್ಯಪನೀಯ ವಿಷ್ವಕ್ಸೇನಾಯ ದತ್ವಾ
- ಸುಖಶಯನೋಚಿತಂ ಸುಖಸ್ಪರ್ಶಂ ಚ ವಾಸಸ್ತದುಚಿತಾನಿ ಭೂಷಣಾನ್ಯುಪವೀತಂ ಚ ಪ್ರದಾಯ
- ಆಚಮನೀಯಂ ದತ್ವಾ
- ಗನ್ಧ ಪುಷ್ಪ ಧೂಪ ದೀಪಾಚಮನ ಮುಖವಾಸ ತಾಮ್ಬೂಲಾದಿಭಿರಭ್ಯರ್ಚ್ಯ
- ಶ್ರುತಿಸುಖೈ: ಸ್ತೋತ್ರೈರಭಿಷ್ಟೂಯ
- ‘ ಭಗವಾನೇವ ಸ್ವನಿಯಾಮ್ಯ ಸ್ವರೂಪಸ್ಥಿತಿಪ್ರವೃತ್ತಿ ಸ್ವಶೇಷತೈಕರಸೇನ ಅನೇನಾತ್ಮನಾ ಸ್ವಕೀಯೈಶ್ಚ ದೇಹೇನ್ದ್ರಿಯಾನ್ತ:ಕರಣೈ: ಸ್ವಕೀಯಕಲ್ಯಾಣತಮದ್ರವ್ಯಮಯಾನೌಪಚಾರಿಕ ಸಾಂಸ್ಪರ್ಶಿಕ ಆಭ್ಯವಹಾರಿಕಾದಿ ಸಮಸ್ತಭೋಗಾನ್ ಅತಿಪ್ರಭೂತಾನ್ ಅತಿಸಮಗ್ರಾನ್ ಅತಿಪ್ರಿಯತಮಾನ್ ಅತ್ಯನ್ತಭಕ್ತಿಕೃತಾನಖಿಲಪರಿ-ಜನಪರಿಚ್ಛದಾನ್ವಿತಾಯ ಸ್ವಸ್ಮೈ ಸ್ವಪ್ರೀತಯೇ ಸ್ವಯಮೇವ ಪ್ರತಿಪಾದಿತವಾನ್’ ಇತ್ಯನುಸಂಧಾಯ,
- ಭಗವನ್ತಮನುಜ್ಞಾಪ್ಯ
- ಭಗವನ್ನಿವೇದಿತ- ಹವಿಶ್ಶೇಷಾದ್ವಿಷ್ವಕ್ಸೇನಾಯ ಕಿಂಚಿದುದ್ಧೃತ್ಯ ನಿಧಾಯ
- ಅನ್ಯತ್ಸರ್ವಂ ಸ್ವಾಚಾರ್ಯಪ್ರಮುಖೇಭ್ಯೋ ವೈಷ್ಣವೇಭ್ಯೋ ಪ್ರದಾಯ
- ಭಗವದ್ಯಾಗಾವಶಿಷ್ಟೈರ್ಜಲಾದಿಭಿರ್ದ್ರವ್ಯೈರ್ವಿಷ್ವಸೇನಮಭ್ಯರ್ಚ್ಯ
- ಪೂರ್ವೋದ್ಧೃತಂ ಹವಿಶ್ಚ ದತ್ವಾ, ತದರ್ಚನಂ ಪರಿಸಮಾಪ್ಯ,
- ಭಗವನ್ತಮಷ್ಟಾಙ್ಗೇನ ಪ್ರಣಮ್ಯ ಶರಣಮುಪಗಚ್ಛೇತ್ || 51 |
‘ಮನೋಬುದ್ಧ್ಯಭಿಮಾನೇನ ಸಹ ನ್ಯಸ್ಯ ಧರಾತಲೇ ।
ಕೂರ್ಮವಚ್ಚತುರ: ಪಾದಾನ್ ಶಿರಸ್ತತ್ರೈವ ಪಞ್ಚಮಮ್ ||
ಪ್ರದಕ್ಷಿಣಸಮೇತೇನ ತ್ವೇವಂ ರೂಪೇಣ ಸರ್ವದಾ ।
ಅಷ್ಟಾಙ್ಗೇನ ನಮಸ್ಕೃತ್ಯ ಹ್ಯುಪವಿಶ್ಯಾಗ್ರತ: ವಿಭೋ:’ ||
ಇತ್ಯುಕ್ತೋಽಷ್ಟಾಙ್ಗಪ್ರಣಾಮ: । ಶರಣಾಗತಿಪ್ರಕಾರಶ್ಚ ಪೂರ್ವೋಕ್ತ: ||
ತತೋಽರ್ಘ್ಯಜಲಂ ಪ್ರದಾಯ, ಭಗವನ್ತಮನುಜ್ಞಾಪ್ಯ, ಪೂಜಾಂ ಸಮಾಪಯೇತ್ || 52 ||
|| ಇತಿ ಶ್ರೀಭಗವದ್ರಾಮಾನುಜಾಚಾರ್ಯ ವಿರಚಿತ: ನಿತ್ಯಗ್ರನ್ಥಸ್ಸಮಾಪ್ತ: ||
