śrīmadvēdāntācāryaviracitā
mīmāṃsāpādukā
mīmāṃsāpādukā anyapramāṇakatvanirāsādhikaraṇam
dharmastattatkriyādi śrutamidamiha khalvasmadādyakṣavēdyaṃ tasmācchāstraikamānassa kathamiti yadi sthūlamētacchalatvāt . dharmākhyānaṃ kriyādau dhṛtijanakatayā sā ca nādhyakṣavēdyā durdarśārthōpadēśānnigamasaphalatā tēna satsūtrasādhyā . 93 .
dharmē pratyakṣatōktirbhavati ca sugamā siddhasādhyānuvṛttā satsūtraṃ sādhyamātrapravaṇamiti ca tē kalpanā niṣpramāṇā . jñānaṃ tasyōpadēśastviti ca samamidaṃ dviprakārēäpi dharmē sarvaṃ tātparyavṛttyā sughaṭitamiha naḥ paśyatāṃ vṛttikāram . 94 .
dharmaṃ jijñāsamānē bhavabhṛti karaṇāyattabōdhē prasiddhē tasyādhyakṣassa nēti prathayitumuditaṃ laukikādhyakṣalakṣma . nō cētpaśyatyacakṣuḥprabhṛtibahuvidhaśrutyanīkāvamardairluṇṭākī hanta lōkāyatagatiraghṛṇā rudhyatāṃ cōdanābhyaḥ . 95 .
ātmā dēhākṣabuddhiprabhṛtisamadhikō dharmacintādhikṛtyai nirddhāryastvanyathā cētsuragurusayasvairajalpāssvadēran . itthaṃ niścitya sūtrē vyadhikaraṇavibhaktyādibhistattadarthavyāvṛttō dharmakartā taducitaphalabhuksūcitassūtrakāraiḥ . 96 .
anyairātmāvasāyē bhavati viphalatā tatra vēdāntavācāṃ nō cēddēhāditōänyassa kathamiha mataśśrūyatāṃ sāvadhānam . yadyanyairasya bōdhō bhavatu viśadatāvāptirāmnāyavākyaistairēvāsyāvasāyē paramiha kathitastarkatōänugrahassyāt . 97 .
pāṭhē cārthē ca bhēdaṃ vidadhati katicidvṛttikārānuśiṣṭāssyādatrātiprasaktiḥ ka iha nipuṇa ityētadapyatra cintyam . prakhyātō vṛttikārō muniranṛtamasau vyācakārēti mandaṃ bādhē satyānyaparyaṃ kvaciditi tu matirmatsarātaṅkamuktā .. 98 .
pāṭhādatraupavarṣādanupacitaphalā hyanyathā pāṭhyaklṛptissvacchandastvāttasārō viṣayaviṣayivatsaṃprayōgōktilabhyaḥ . yadvṛttaṃ pūrvavākyē na paṭhitamatha ca nyāsi tadvṛttamanyatpāṭhaścārṣō na bhēttuṃ kṣama iti viduṣāṃ vṛttikārōänuvartyaḥ . 99 .
vṛttau ṣaṭ cētpramāṇānyagaṇiṣata na sā mānasaṃkhyā tatassyāttyaktaṃ ṣaṣṭhaṃ ca kaiścidbhavati ca phalinī gōbalīvardanītiḥ . dharmē mānāntarāṇāṃ gatimiha nudatō nātra saṃkhyābhisandhirmānāni trīṇi śōdhyānyamanuta ca manuḥ prēpsatāṃ dharmasiddhim . 100 .
pratyakṣādirna hēturjinasugatamukhaiḥ kalpitānāṃ kathānāmityētatsiddhamatra śrutirapi na hi tanmūlamūhyaṃ virōdhāt . ityapyētadvirōdhādhikaraṇaviditaṃ tēna mōhādiranyairanyairbādhōparōdhau na tu nigamagirāmityupakrāntasiddhiḥ . 101 .
nanvēvaṃ kvāpi rāmāyaṇaparipaṭhitā yuktayaṣpaṭ kathaṃ syurmanvādēstritvavādōäpyatha bhavatu paraṃ nyūnasaṃkhyānivṛttyai . maivaṃ tattadviśēṣaiḥ pṛthaganupaṭhitairarthavaiśadyasiddhyai mānaistattadviśēṣāssaha paripaṭhitāssantu tatrānyathā vā . 102 .
pratyakṣaṃ sāṃkhyabauddhaprabhṛtibhiruditaṃ bhāvanōtthaṃ na vidmassaṃskārāṇāṃ prakarṣassmṛtimupajanayēddṛṣṭamātrē prakṛṣṭām . tasmāddharmē nimittaṃ bhavati na sugatādyāgamaḥ kṣiptamūlaḥ śraddhēyā cōdanaivētyavadhṛtiriyamityatra tātparyasiddham . 103 .
pratyakṣādipramāṇaṃ svaviṣayaniyataṃ darśayan sūtrakāraḥ pratyācaṣṭa pravṛddhān pramitiparibhavē viśvaluṇṭākavādān . paśyantō vṛttimīrṣīṃ tata iha śabarasvāmimukhyāssamīcīṃ cintāvyāghātabhītāścidacidanugatāṃ satyatāṃ sādhayanti . 104 .
. iti anyapramāṇakatvanirāsādhikaraṇam .
