śrīmadvēdāntācāryaviracitā
mīmāṃsāpādukā
mīmāṃsāpādukā dharmapramāṇaparīkṣādhikaraṇam
dharmē vēdaḥ pramāṇaṃ taditaradapi vā nōbhayaṃ vōbhayaṃ vētyēvaṃ sandēhaḍōlāviharaṇavihitānēkadikka(sṛpta)prasaktān . jijñāsūnvēda ēvētyavadhṛtiniyatāvasthitīnkalpayiṣyaṃścakrē sūtraṃ tṛtīyaṃ caṭulamatidaśāvāraṇārambhaṇārtham . 88 .
atrāyōgānyayōgau praśamayitumiyaṃ cōdanāmānatōktissatsūtrādau sphuṭaṃ tatsamasanaviṣayakṣēpaṇīyakramēṇa . adhyāyasthāpyasiddhyai prathamamabhidadhē tannimittē parīṣṭiḥ kartavyā nēti vā syādiha vinigamanā sūtrakṛtkākubhēdāt .89.
mānaṃ dharmē na cintyaṃ durapalapatayētyutthitasyāäästikasya prajñācōraprasūtabhramaparihṛtayē cintyamityuttaraṃ syāt . cintyē yāäsminprayuktē prathanakathanatastatparīṣṭirniṣēddhyā chēkōktissāäpi yasmādakaraṇamiṣatastatparīṣṭiṃ karōti . 90 .
sāmānyānna pramāṇaṃ kṣamamapalapituṃ svōktibādhādidōṣāttatsiddhiśca pramāṇātsvaparaghaṭanatō nānavasthādyataḥ syāt . dharmē mānaṃ tu cintyaṃ prathitamapi bahirvādasaṃkṣōbhaśāntyai nō cēnnāstikyaniṣṭhaiḥ pramitipathajuṣāmatra pārṣṇigrahassyāt . 91 .
vēdō dharmē nimittaṃ svayamapi bhavitā tadvidhānāttathāäpi prāmāṇyaṃ hi prasādhyaṃ prathamasamuditē lakṣaṇē pādabhēdaiḥ . tasmāddharmapramāyāṃ karaṇamiti dhiyā tannamittatvamuktaṃ bhaktyā cōktiḥ praśastiṃ prathayati mahatīṃ mukhyabhāvānurūpām . 92 .
. iti dharmapramāṇaparīkṣādhikaraṇam .
