śrīmadvēdāntācāryaviracitā
mīmāṃsāpādukā
mīmāṃsāpādukā śabdanityatvādhikaraṇam
śabdasyārthēna bandhassahaja iti vacōmātramatra prasaktaṃ sākāṅkṣē hyatra śabdādhikaraṇamuditaṃ nityatāptyai padānām . varṇasthairyōktipakṣē vitathaviphalatē staḥ padasthairyapakṣē sūtrāṇāṃ yōjanaṃ ca svarasagati bhavatpakṣavannātikhēdaḥ . 137 .
vyutyattirvācyavargē hyativiṣamatamā jātiyōgānnirūḍhā śikṣēyaṃ vācakēäpi prathayitumucitā śīlitanyāyavṛttaiḥ . kiṃ cōdāttādibhēdā api vilayabhṛtō vācakēṣūpayuktāstādṛktvēnaiva tēṣāṃ yadi niyamavacastadvadatrēti bhāvyam . 138 .
varṇā nityā yadi syustadapi bhavati kiṃ mānatāänāptavākyē tē cānityā bhavēyuḥ kramavadatha ca sā kiṃ na nirdōṣavāci . vēdaprāmāṇyasiddhyai tadiha bata mudhā varṇanityatvaklṛptirvēdānityatvaśaṅkāṃ prajanayati padānityatāätō niṣēdhyā . 139 .
śabdasparśādihīnāttriguṇajalanidhērūrmijālaikadēśē śrōtrādigrāhyatattadguṇagaṇaghaṭitaśśrāvitō bhūtavargaḥ . śabdasyākāśanāśē laya iti katicitpratyabhijñānurōdhāttairapyāsthāyi nityā padaniyatirasau varṇasājātyayuktā . 140 .
varṇēbhyaḥ kvāpi varṇāntarajanivacasāmanyathāsiddhirastu pratyakṣaṃ tvanyatulyaṃ prathayati jananaṃ tacca nātrāpramāṇam . sūkṣmā paśyantyasau vākkramasamudayanānmadhyamā vaikharīti prāptā bhēdaṃ vicitrākṛtirudayati tatsusthitaṃ varṇajanma . 141 .
ēkākṣagrāhyavargē sahakṛtiniyamō bhāti nimbatvagādau tadvadvarṇaprabhēdapratiniyatamarudbhēda ityapyapāstam . vyaktirnimbatvagādērna bhavati paramudbhūtimātrōpayōgāttādṛkcēdvyaktihēturna kathamiha bhavēdanyathāätiprasaṅgaḥ . 142 .
gandhādau pratyabhijñā bhavati na ca tayā tatra nityatvamiṣṭaṃ sādṛśyāttatpraklṛptissamagatirubhayōrāgṛhītirna cētsyāt . vyaktyānantyaṃ ca dṛṣṭaṃ samamidamubhayōrlāghavōktiśca laghvī tasmādvaiyātyamātrādayamupanihitō varṇanityatvavādaḥ . 143 .
nityaśśabdō yadīṣṭassakathamabhimatō dṛśyamānātiriktaḥ pratyakṣē śabdavargē dhvanibhirapi paraṃ tādṛśairvyaktirastu . aśraddhēyāätra vaiyākaraṇasaraṇirityarthamarthāpayadbhirnityatvaṃ varṇaniṣṭhaṃ bhavatu ca kathitaṃ lāghavaṃ lakṣayadbhiḥ . 144 .
vāyōrēkē vikāraṃ katicana jagadussparśabhājāṃ caturṇāṃ pañcānāṃ kēcidūcuḥ katicidabhidadhuḥ pañcamasyaiva dharmam . nityaṃ tatrāpi kēcijjanilayabhiduraṃ śabdamanyē parē tu dravyaṃ varṇākhyamētadgataphalamakhilaṃ śabdamānatvasiddhau . 145 .
kṛtvā rūpāṇi nāmānyapi ca vitanutē nātha ityāgamōktyā nānityatvaṃ padānāṃ punarapi hi yathāpūrvamēva prayuṅktē . bāhyakṣēpāya sūtrairiha kathayatu vā varṇanityatvamāptaḥ klṛptaṃ tadvaibhavātsyānna kathamitarathā naigamānāṃ prakōpaḥ . 146 .
utpattyaiva kramāptiṃ katicidakathayanbōdhakē varṇavargē vyaktyaikēänyē tu tattadvyavahṛtikṛdabhiprāyabhēdādvadanti . yuktaṃ tadyaugapadyaṃ na kathamapi tatassaṃskriyājālajanyasmṛtyārūḍhēṣu varṇēṣvavagatikaraṇaṃ kalpyamēkaṃ yathārham . 147 .
varṇānyaḥ kōäpi vaiyākaraṇanigaditassphōṭasaṃjñastu śabdō na pratyakṣō na kalpyō na ca vacanamitō nānyatōäpi prasiddhaḥ . varṇēṣūktēṣu bōdhē bhajati hi kalahassphōṭabōdhēäpi sāmyaṃ śabdavyutpattisiddhau na ca bhavati mudhā sphōṭasiddhyaiva yōgaḥ . 148 .
vākyasphōṭōävaklṛptaḥ pratiphaṇiti padasphōṭanītyā nirastō vākyē tadgōcarē vā kathamapi hi na nirbhāgatā jāghaṭīti . yadbhēdāṅgaprayuktiprabhṛti tadapi hi tvanmatē durghaṭaṃ syācchabdādarthō vibhātītyapi samuditadhīmūla ēkatvavādaḥ . 149 .
śuddhē siddhāntasūtrē phalavati na tathā varṇapakṣōktabādhau pakṣāṇāṃ ca trikālaprabhavamatibhuvāṃ kā cikitsēti cēnna . chadmaprakṣōbhaṇīyacchalagatiramu(dhu)nā śikṣitaścātra guptyai duṣṭōpanyāsatannistaraṇakathanatastādṛśānyōparōdhāt . 150 .
dṛṣṭau taddhaika ityādyakṛtakaphaṇitau pūrvapakṣōktibhaṅgau tatra svādhyāyapāṭhaḥ phalamiti tu na saddṛṣṭahānādidōṣāt . sūtrēäpyēṣaiva rītirbhavati phalavatī nānyathāätiprasaṅgāt kaḥ pūrvaḥ kaśca pakṣaḥ para iti niyamaḥ svārasikyā pravṛtyā . 151 .
. iti śabdanityatvādhikaraṇam .
