நம்மாழ்வார் அருளிச்செய்த
யஜுர்வேதஸாரமான
திருவாசிரியம்
தனியன்
(அருளாளப்பெருமாளெம்பெருமானார் அருளிச்செய்தது)
காசினியோர் தாம்வாழக் கலியுகத்தே வந்துதித்து
ஆசிரியப்பாவதனால் அருமறைநூல்விரித்தானை*
தேசிகனைப் பராங்குசனைத் திகழ்வகுளத்தாரானை*
மாசடையாமனத்துவைத்து மறவாமல்வாழ்த்துதுமே.
செக்கர் மாமுகிலுடுத்து மிக்க செஞ்சுடர்ப்
பரிதி சூடி * அஞ்சுடர் மதியம் பூண்டு *
பலசுடர் புனைந்த பவளச் செவ்வாய் *
திகழ் பசுஞ்சோதி மரதகக் குன்றம் *
கடலோன் கைம்மிசைக் கண்வளர்வது போல் *
பீதகவாடை முடிபூண் முதலா *
மேதகு பல்கல னணிந்து * சோதி
வாயவும் கண்ணவும் சிவப்ப * மீதிட்டுப்
பச்சை மேனி மிகப் பகைப்ப *
நச்சு வினைக் கவர்தலை யரவின மளியேறி *
எறிகடல் நடுவுள் அறிதுயி லமர்ந்து *
சிவனய னிந்திரனிவர் முதலனைத்தோர் *
தெய்வக் குழாங்கள் கைதொழக் கிடந்த *
தாமரை யுந்தித் தனிப்பெரு நாயக ! *
மூவுலகளந்த சேவடியோயே! 1
உலகு படைத்துண்ட எந்தை * அறை கழல்
சுடர்ப்பூந் தாமரை சூடுதற்கு * அவாவு ஆர்
உயிர் உருகி யுக்க * நேரிய காதல்
அன்பிலின் பீன் தேறல்* அமுத
வெள்ளத்தானாம் சிறப்பு விட்டு * ஒரு பொருட்கு
அசைவோர் அசைக * திருவொடு மருவிய
இயற்கை * மாயாப் பெரு விறலுலகம்
மூன்றினொடு நல்வீடு பெறினும் *
கொள்வ தெண்ணுமோ தெள்ளியோர் குறிப்பே? 2
குறிப்பில் கொண்டு நெறிப்பட * உலகம்
மூன்றுடன் வணங்கு தோன்று புகழ் * ஆணை
மெய் பெற நடாய தெய்வம் மூவரில்
முதல்வனாகிச் * சுடர் விளங் ககலத்து *
வரைபுரை திரை பொரு பெருவரை வெருவர *
உருமுர லொலிமலி நளிர் கடல் படவர
வரசு உடல் தடவரை சுழற்றிய * தனிமாத்
தெய்வத் தடியவர்க்கு இனி நாம் ஆளாகவே
இசையுங் கொல் ? * ஊழிதோறூழி ஓவாதே. 3
ஊழிதோறூழி ஓவாது * வாழிய
வென்று யாம் தொழ இசையுங்கொல் ? *
யாவகை யுலகமும் யாவரு மில்லா *
மேல் வரும் பெரும் பாழ்க் காலத்து * இரும்பொருட்-
கெல்லாம் அரும் பெறல் தனி வித்து * ஒருதா-
னாகித் தெய்வ நான்முகக் கொழுமுளை
யீன்று * முக்கணீசனொடு தேவு பலநுதலி *
மூவுலகம் விளைத்த உந்தி *
மாயக் கடவுள் மாமுதலடியே. 4
மாமுதலடிப் போதொன்று கவிழ்த் தலர்த்தி *
மண்முழுது மகப்படுத்து * ஒண் சுடரடிப் போது
ஒன்று விண் செலீஇ * நான்முகப் புத்தேள்
நாடு வியந்துவப்ப * வானவர் முறைமுறை
வழிபட நெறீஇ * தாமரைக் காடு
மலர்க் கண்ணொடு கனிவாயுடையது-
மாய் * இருநாயிறு ஆயிரம் மலர்ந்தன்ன *
கற்பகக் காவு பற்பல வன்ன *
முடி தோளாயிரந் தழைத்த *
நெடியோய்க் கல்லது அடியதோ உலகே? 5
ஓ ஓ ! உலகினதியல்வே ! * ஈன்றோ ளிருக்க
மணை நீராட்டிப் * படைத்திடந்து உண்டுமிழ்ந்து
அளந்து * தேர்ந்து உலகளிக்கும் முதற் பெரும்
கடவுள் நிற்பப் * புடைப்பல தானறி
தெய்வம் பேணுதல் * தனாது
புல்லறி வாண்மை பொருந்தக் காட்டிக் *
கொல்வன முதலா அல்லன முயலும் *
இனைய செய்கை இன்பு துன்பளி *
தொல் மாமாயப் பிறவியுள் நீங்காப் *
பல்மா மாயத் தழுந்துமா நளிர்ந்தே. 6
நளிர்மதிச் சடையனும் நான்முகக் கடவுளும் *
தளிரொளி யிமையவர் தலைவனும் முதலா *
யாவகை யுலகமும் யாவரும் அகப்பட *
நிலம் நீர் தீ கால் சுடரிரு விசும்பும் *
மலர் சுடர் பிறவும் சிறிதுடன் மயங்க
ஒரு பொருள் புறப்பாடின்றி முழுவதும்
அகப்படக் கரந்து * ஓராலிலைச் சேர்ந்த எம்
பெருமா மாயனை யல்லது *
ஒருமா தெய்வம் மற்றுடையமோ யாமே? 7
திருவாசிரியம் முற்றும்
நம்மாழ்வார் திருவடிகளே சரணம்
