பெரிய திருமொழி
ஐந்தாம் பத்து
ஐந்தாம் திருமொழி
வெருவாதாள் வாய் வெருவி
வேங்கடமே ! வேங்கடமே ! என்கின்றாளால் *
மருவாளால் என்குடங்கால் வாள்நெடுங்கண்
துயில் மறந்தாள் * வண்டார் கொண்டல்
உருவாளன் வானவர் தமுயிராளன்
ஒலிதிரைநீர்ப் பெளவம் கொண்ட
திருவாளன் * என் மகளைச் செய்தனகள்
எங்ஙனம் நான் சிந்திக்கேனே ? 5.5.1 திருவரங்கம்,
திருவேங்கடம் திருப்பதி
கலையாளா அகலல்குல் கனவளையும்
கையாளா என்செய்கேன் நான் ? *
விலையாளா அடியேனை வேண்டுதியோ ?
வேண்டாயோ ? என்னும் * மெய்ய
மலையாளன் வானவர் தம் தலையாளன்
மராமரமேழெய்த வென்றிச்
சிலையாளன் * என் மகளைச் செய்தனகள்
எங்ஙனம் நான் சிந்திக்கேனே ? 5.5.2 திருவரங்கம்,
திருமெய்யம்
மானாய மென்னோக்கி வாள்நெடுங்கண்
நீர்மல்கும், வளையும் சோரும் *
தேனாய நறுந்துழாய் அலங்கலின்
திறம் பேசி, உறங்காள் காண்மின் *
கானாயன் கடிமனையில் தயிருண்டு
நெய்பருக, நந்தன் பெற்ற
ஆனாயன் * என் மகளைச் செய்தனகள்
அம்மனைமீர் அறிகிலேனே ? 5.5.3 திருவரங்கம்
தாய்வாயிற் சொற் கேளாள்
தன்னாயத்தோடு அணியாள் * தடமென் கொங்கை
யே ஆரச்சாந்தணியாள்
எம்பெருமான் ! திருவரங்கம் எங்கே ? என்னும் *
பேய்மாய முலையுண்டு இவ்வுலகுண்ட
பெருவயிற்றன் * பேசில் நங்காய் !
மாமாயன் என்மகளைச் செய்தனகள்
மங்கைமீர் ! மதிக்கிலேனே ? 5.5.4 திருவரங்கம்
பூண்முலைமேல் சாந்தணியாள்
பொருகயல்கண் மையெழுதாள் பூவை பேணாள் *
ஏணறியாள் எத்தனையும்
எம்பெருமான் திருவரங்கம் எங்கே ? என்னும் *
நாண் மலராள் நாயகனாய்
நாமறிய ஆய்ப்பாடி வளர்ந்த நம்பி *
ஆண்மகனாய் என் மகளைச் செய்தனகள்
அம்மனைமீர் ! அறிகிலேனே ? 5.5.5 திருவரங்கம்,
திருவாய்ப்பாடி (கோகுலம்)
தாதாடு வனமாலை தாரானோ ?
என்றென்றே, தளர்ந்தாள் காண்மின் *
யாதானுமொன்று உரைக்கில்
எம்பெருமான் திருவரங்கமென்னும் * பூமேல்
மாதாளன் குடமாடி மதுசூதன்
மன்னர்க்காய் முன்னம் சென்ற
தூதாளன் * என்மகளைச் செய்தனகள்
எங்ஙனம் நான் சொல்லுகேனே? 5.5.6 திருவரங்கம்
வாராளும் இளங்கொங்கை வண்ணம்,
வேறாயினவாறு எண்ணாள் * எண்ணில்
பேராளன் பேரல்லால் பேசாள்
இப்பெண் பெற்றேன் என்செய்கேன் நான் ? *
தாராளன் தண்குடந்தை நகராளன்
ஐவர்க்காய் அமரிலுய்த்த
தேராளன் * என்மகளைச் செய்தனகள்
எங்ஙனம் நான் செப்புகேனே ? 5.5.7 திருவரங்கம்,
திருக்குடந்தை (கும்பகோணம்)
உறவாதும் இலள் என்றென்று
ஒழியாது பலரேசும் அலராயிற்றால் *
மறவாதே எப்பொழுதும்
மாயவனே ! மாதவனே ! என்கின்றாளால் *
பிறவாத பேராளன் பெண்ணாளன் மண்ணாளன்
விண்ணோர் தங்கள்
அறவாளன் * என்மகளைச் செய்தனகள்
அம்மனைமீர் ! அறிகிலேனே ? 5.5.8 திருவரங்கம்
பந்தோடு கழல் மருவாள் பைங்கிளியும்
பாலூட்டாள், பாவை பேணாள் *
வந்தானோ, திருவரங்கன், வாரானோ ?
என்றென்றே வளையும் சோரும் *
சந்தோகன் பெளழியன் ஐந்தழலோம்பு
தைத்திரியன் சாமவேதி *
அந்தோ ! வந்து என் மகளைச் செய்தனகள்
அம்மனைமீர் ! அறிகிலேனே ? 5.5.9 திருவரங்கம்
சேலுகளும் வயல் புடைசூழ்
திருவரங்கத்தம்மானைச் சிந்தை செய்த *
நீலமலர்க்கண் மடவாள் நிறையழிவைத்
தாய் மொழிந்த அதனை * நேரார்
காலவேல் பரகாலன், கலிகன்றி
ஒலிமாலை கற்று வல்லார் *
மாலைசேர் வெண்குடைக்கீழ், மன்னவராய்ப்
பொன்னுலகில் வாழ்வர் தாமே. 5.5.10 திருவரங்கம்
