பெரிய திருமொழி
எட்டாம் பத்து
பத்தாம் திருமொழி
வண்டார் பூமாமலர் மங்கை, மணநோக்க
முண்டானே ! * உன்னை உகந்துகந்து, உன்தனக்கே
தொண்டானேற்கு * என்செய்கின்றாய் ? சொல்லு, நால்வேதம்
கண்டானே ! * கண்ணபுரத்துறை யம்மானே ! 8.10.1 திருக்கண்ணபுரம்
பெருநீரும் விண்ணும், மலையும் உலகேழும் *
ஒரு தாரா நின்னுளொடுக்கிய, நின்னை யல்லால் *
வருதேவர் மற்றுளரென்று, என் மனத்து இறையும்
கருதேன் நான் * கண்ணபுரத்துறை யம்மானே ! 8.10.2 திருக்கண்ணபுரம்
மற்றும் ஓர் தெய்வம் உளதென்று, இருப்பாரோடு
உற்றிலேன் * உற்றதும், உன்னடியார்க் கடிமை *
மற்றெல்லாம் பேசிலும், நின் திருவெட்டெழுத்தும்
கற்று நான் * கண்ணபுரத்துறை யம்மானே ! 8.10.3 திருக்கண்ணபுரம்
பெண் ஆனாள், பேரிளங் கொங்கையி னாரழல் போல் *
உண்ணா நஞ்சுண்டுகந்தாயை, உகந்தேன் நான் *
மண்ணாளா ! வாள் நெடுங் கண்ணி மதுமலராள்
கண்ணாளா ! * கண்ணபுரத்துறை யம்மானே ! 8.10.4 திருக்கண்ணபுரம்
பெற்றாரும் சுற்றமும், என்று இவை பேணேன் நான் *
மற்றாரும் பற்றிலேன், ஆதலால் நின்னடைந்தேன் *
உற்றானென் றுள்ளத்து வைத்து, அருள் செய் கண்டாய் *
கற்றார் சேர், கண்ணபுரத்துறை யம்மானே ! 8.10.5 திருக்கண்ணபுரம்
ஏத்தி உன்சேவடி, எண்ணி யிருப்பாரைப் *
பார்த்திருந்து, அங்கு நமன் தமர் பற்றாது *
சோத்தம் நாமஞ்சுதும் என்று, தொடாமை நீ
காத்தி போல் * கண்ணபுரத்துறை யம்மானே ! 8.10.6 திருக்கண்ணபுரம்
வெள்ளை நீர் வெள்ளத்து, அணைந்த அரவணைமேல் *
துள்ளு நீர் மெள்ளத் துயின்ற, பெருமானே ! *
வள்ளலே ! உன் தமர்க்கு என்றும், நமன் தமர்
கள்ளர் போல் * கண்ணபுரத்துறை யம்மானே ! 8.10.7 திருக்கண்ணபுரம்,
திருப்பாற்கடல்
மாணாகி, வைய மளந்ததுவும் * வாளவுணன்
பூணாகம் கீண்டதுவும், ஈண்டு நினைந்திருந்தேன் *
பேணாத வல்வினையேன், இடரெத்தனையும்
காணேன் நான் * கண்ணபுரத்துறை யம்மானே ! 8.10.8 திருக்கண்ணபுரம்
நாட்டினாய் என்னை, உனக்கு முன் தொண்டாக *
மாட்டினேன் அத்தனையே கொண்டு, என் வல்வினையைப் *
பாட்டினால் உன்னை, என் நெஞ்சத் திருந்தமை
காட்டினாய் * கண்ணபுரத்துறை யம்மானே ! 8.10.9 திருக்கண்ணபுரம்
கண்ட சீர்க், கண்ணபுரத்துறை யம்மானைக் *
கொண்ட சீர்த் தொண்டன், கலியனொலி மாலை *
பண்டமாய்ப் பாடும், அடியவர்க்கு எஞ்ஞான்றும்
அண்டம் போய் * ஆட்சி அவர்க்க தறிந்தோமே. 8.10.10 திருக்கண்ணபுரம்
********
