பெரிய திருமொழி
எட்டாம் பத்து
ஐந்தாம் திருமொழி
தந்தை காலில் விலங்கற வந்து தோன்றிய
தோன்றல் பின் * தமியேன் தன்
சிந்தை போயிற்றுத் திருவரு ளவனிடைப் பெறுமள விருந்தேனை *
அந்தி காவலன் அமுதுறு பசுங் கதிரவை சுட * அதனோடும்
மந்த மாருதம் வனமுலை தடவந்து வலி செய்வதொழியாதே. 8.5.1 திருக்கண்ணபுரம்
மாரிமாக்கடல் வளைவணற்கிளையவன் வரைபுரை திருமார்பில்*
தாரினாசையில் போயின நெஞ்சமும் தாழ்ந்தது ஓர்துணை காணேன் *
ஊரும் துஞ்சிற்று உலகமும் துயின்றது ஒளியவன் விசும்பியங்கும் *
தேரும் போயிற்றுத் திசைகளும் மறைந்தன செய்வதொன்றறியேனே. 8.5.2 திருக்கண்ணபுரம்
ஆயன் மாயமே யன்றி மற்றென் கையில்
வளைகளும் இறை நில்லா *
பேயினாருயிருண்டிடும் பிள்ளை நம் பெண்ணுயிர்க்கு இரங்குமோ ? *
தூய மாமதிக் கதிர் சுடத் துணையில்லை இணைமுலை வேகின்றதால் *
ஆயன் வேயினுக் கழிகின்றது உள்ளமும்
அஞ்சே லென்பா ரில்லையே. 8.5.3 திருக்கண்ணபுரம்
கயங்கொள் புண்தலைக் களிறுந்து வெந்திறல்
கழல் மன்னர் பெரும் போரில்
மயங்க * வெண் சங்கம் வாய் வைத்த மைந்தனும்
வந்திலன் * மறிகடல் நீர்
தயங்கு வெண்திரைத் திவலை நுண்பனி யென்னும்
தழல் முகந்து இளமுலை மேல் *
இயங்கு மாருதம் விலங்கில்
என்னாவியை எனக்கெனப் பெறலாமே. 8.5.4 திருக்கண்ணபுரம்
ஏழு மாமரம் துளை படச் சிலை வளைத்து
இலங்கையை மலங்குவித்த
ஆழியான் * நமக்கருளிய அருளொடும்
பகலெல்லை கழிகின்றதால் *
தோழி ! நாம் இதற்கென் செய்தும் ? துணையில்லை
சுடர்படு முதுநீரில் *
ஆழ ஆழ்கின்ற ஆவியை
அடுவதோர் அந்தி வந்தடைகின்றதே. 8.5.5 திருக்கண்ணபுரம்
முரியும் வெண்திரை முதுகயம் தீப்பட
முழங்கழ லெரியம்பின் *
வரிகொள் வெஞ்சிலை வளைவித்த
மைந்தனும் வந்திலன், என்செய்கேன் ? *
எரியும் வெங்கதிர் துயின்றது
பாவியேன் இணை நெடுங்கண் துயிலா *
கரிய நாழிகை ஊழியில் பெரியன
கழியுமாறு அறியேனே. 8.5.6 திருக்கண்ணபுரம்
கலங்க மாக்கடல் கடைந்தடைத்து
இலங்கையர் கோனது வரையாகம்
மலங்க * வெஞ்சமத்து அடுசரம் துரந்த
எம்மடிகளும் வாரானால் *
இலங்கு வெங்கதி ரிளமதி யதனொடும்
விடைமணி யடும் * ஆயன்
விலங்கல் வேயினது ஓசையுமாய்
இனி விளைவ தொன்றறியேனே. 8.5.7 திருக்கண்ணபுரம்
முழுதிவ் வையகம் முறை கெட மறைதலும்
முனிவனும் முனிவெய்தி *
மழுவினால் மன்னராருயிர் வவ்விய
மைந்தனும் வாரானால் *
ஒழுகு நுண்பனிக் கொடுங்கிய பேடையை
அடங்க அஞ்சிறை கோலி *
தழுவு நள்ளிருள் தனிமையில் கடியது
ஓர் கொடுவினை யறியேனே. 8.5.8 திருக்கண்ணபுரம்
கனஞ்செய் மாமதிள் கணபுரத்தவனொடும்
கனவினில் அவன் தந்த *
மனஞ் செயின்பம் வந்து உள்புக வெள்கி
என் வளை நெக இருந்தேனைச் *
சினஞ்செய் மால்விடைச் சிறுமணி யோசை
என் சிந்தையைச் சிந்துவிக்கும் *
அனந்தல் அன்றிலினரி குரல்
பாவியே னாவியை அடுகின்றதே. 8.5.9 திருக்கண்ணபுரம்
வார் கொள் மென்முலை மடந்தையர்
தடங்கடல் வண்ணனைத் தாள் நயந்து *
ஆர்வத்தால் அவர் புலம்பிய புலம்பலை
அறிந்து, முன் உரை செய்த *
கார்கொள் பைம்பொழில் மங்கையர் காவலன்
கலிகன்றி யொலி வல்லார் *
ஏர்கொள் வைகுந்த மாநகர் புக்கு
இமையவரோடும் கூடுவரே. 8.5.10 திருக்கண்ணபுரம்
