பெரிய திருமொழி
இரண்டாம் பத்து
நான்காம் திருமொழி
அன்றாயர் குலக் கொடியோடு
அணிமா மலர் மங்கையொடு அன்பளவி * அவுணர்க்கு
என்றானும் இரக்க மிலாதவனுக்கு
உறையுமிட மாவது * இரும்பொழில் சூழ்
நன்றாய புனல் நறையூர் திருவாலி குடந்தை
தடம் திகழ் கோவல் நகர் *
நின்றான் இருந்தான் கிடந்தான் நடந்தாற்கு இடம்
மாமலையாவது நீர்மலையே. 2.4.1 திருக்குடந்தை (கும்பகோணம்),
திருவாலி,
திருநறையூர்,
திருக்கோவலூர்,
திருநீர்மலை
காண்டாவன மென்பதோர் காடு
அமரர்க் கரையன்னது கண்டவன் நிற்க * முனே
மூண்டா ரழலுண்ண முனிந்ததுவும், அதுவன்றியும்
முன்னுலகம் பொறை தீர்த்து
ஆண்டான் * அவுணனவன் மார்பகலம்
உகிரால் வகிராக முனிந்து அரியாய்
நீண்டான் * குறளாகி நிமிர்ந்தவனுக்கு இடம்
மாமலையாவது நீர்மலையே. 2.4.2 திருநீர்மலை
அலம் மன்னும் அடல் சுரிசங்க மெடுத்து
அடலாழியினால் * அணியாருருவின்
புலமன்னு வடம் புனை கொங்கையினாள்
பொறை தீர முனாள் * அடுவாளமரில்
பலமன்னர் படச் சுடராழியினைப்
பகலோன் மறையப் பணி கொண்டு * அணிசேர்
நிலமன்னனுமாய் உலகாண்டவனுக்கு இடம்
மாமலையாவது நீர்மலையே. 2.4.3 திருநீர்மலை
தாங்காததோர் ஆளரியாய் அவுணன் தனை
வீட முனிந்து * அவனாலமரும்
பூங்கோதையர் பொங்கெரி மூழ்க விளைத்து
அதுவன்றியும் * வென்றி கொள் வாளமரில்
பாங்காக முன் ஐவரோடு அன்பளவிப்
பதிற்றைந்திரட்டிப் படை வேந்தர் பட *
நீங்காச் செருவில் நிறை காத்தவனுக்கு இடம்
மாமலையாவது நீர்மலையே. 2.4.4 திருநீர்மலை
மாலும் கடலார மலைக் குவடிட்டு, அணைகட்டி
வரம்புருவ * மதிசேர்
கோல மதிளாய இலங்கை கெடப்,
படை தொட்டு ஒருகால் அமரிலதிரக் *
காலமிது வென்று அயன் வாளியினால்
கதிர் நீள் முடிபத்தும் அறுத்து அமரும் *
நீலமுகில் வண்ணன் எமக்கிறைவற்கு இடம்
மாமலையாவது நீர்மலையே. 2.4.5 திருநீர்மலை
பாராருலகும் பனிமால் வரையும்
கடலும் சுடரும் இவை யுண்டும் * எனக்கு
ஆராதென நின்றவன் எம்பெருமான்
அலை நீருலகுக்கு அரசாகிய * அப்
பேரானை முனிந்த முனிக்கரையன் *
பிறரில்லை நுனக்கெனும் எல்லையினான் *
நீரார் பேரான் நெடுமாலவனுக்கு இடம்
மாமலையாவது நீர்மலையே. 2.4.6 திருநீர்மலை
புகராருருவாகி முனிந்தவனைப்
புகழ் வீட முனிந்து உயிருண்டு * அசுரன்
நகராயின பாழ்பட நாமம் எறிந்து, அதுவன்றியும்
வென்றி கொள் வாளவுணன் *
பகராதவ னாயிர நாமம் அடிப்
பணியாதவனைப், பணியால் அமரில் *
நிகராய வன் நெஞ்சிடந்தா னவனுக்கு இடம்
மாமலையாவது நீர்மலையே. 2.4.7 திருநீர்மலை
பிச்சச் சிறுபீலி பிடித்து உலகில்
பிணந்தின் மடவாரவர் போல் * அங்ஙனே
அச்சமிலர் நாணிலரா தன்மையால்
அவர்செய்கை வெறுத்து * அணிமாமலர் தூய்
நச்சி நமனார் அடையாமை நமக்கருள் செய்யென
உள்குழைந்து ஆர்வமொடு *
நிச்சம் நினைவார்க்கு அருள் செய்யுமவற்கு இடம்
மாமலையாவது நீர்மலையே. 2.4.8 திருநீர்மலை
பேசுமளவன்று இது வம்மின் நமர்!
பிறர் கேட்பதன் முன் * பணிவார் வினைகள்
நாசமது செய்திடுமா தன்மையால்
அதுவே நமது உய்விடம் * நாள்மலர் மேல்
வாசமணி வண்டறை பைம்புறவில்
மனமைந்தொடு நைந்துழல்வார் * மதியில்
நீசரவர் சென்றடையாதவனுக்கு இடம்
மாமலையாவது நீர்மலையே. 2.4.9 திருநீர்மலை
நெடுமாலவன் மேவிய நீர்மலைமேல்
நிலவும் புகழ் மங்கையர் கோன் * அமரில்
கடமா களியானை வல்லான்
கலியன் ஒலிசெய் தமிழ்மாலை வல்லார்க்கு * உடனே
விடுமால் வினை, வேண்டிடில் மேலுலகும்
எளிதாயிடும் * அன்றி இலங்கொலி சேர்
கொடுமா கடல் வையக மாண்டு, மதிக்
குடை மன்னவராய் அடி கூடுவரே. 2.4.10 திருநீர்மலை
