பெரிய திருமொழி
இரண்டாம் பத்து
ஒன்பதாம் திருமொழி
சொல்லுவன் சொற்பொருள் தானவையாய்ச்
சுவை ஊறு ஒலி நாற்றமும் தோற்றமுமாய் *
நல்லரண் நான்முகன் நாரணனுக்கு இடம், தான்
தடம் சூழ்ந்து அழகாய கச்சி *
பல்லவன் வில்லவனென்று உலகில்
பலராய்ப் பலவேந்தர் வணங்கு கழல்
பல்லவன் * மல்லையர் கோன் பணிந்த
பரமேச்சுர விண்ணகரமதுவே. 2.9.1 பரமேச்சுர விண்ணகரம்
கார்மன்னு நீள் விசும்பும் கடலும்
சுடரும் நிலனும் மலையும் * தன் உந்தித்
தார்மன்னு தாமரைக் கண்ணனிடம்
தடமாமதிள் சூழ்ந்து அழகாய கச்சி *
தேர்மன்னு தென்னவனை முனையில் செருவில்
திறல் வாட்டிய திண்சிலையோன் *
பார்மன்னு பல்லவர் கோன் பணிந்த
பரமேச்சுரவிண்ணகரமதுவே. 2.9.2 பரமேச்சுர விண்ணகரம்
உரந்தரு மெல்லணைப் பள்ளி கொண்டான்
ஒருகால் முன்னம் மாவுருவாய்க் * கடலுள்
வரந்தரு மாமணி வண்ணனிடம்
மணிமாடங்கள் சூழ்ந்து அழகாய கச்சி *
நிரந்தவர் மண்ணையில் புண்ணுகர் வேல்
நெடுவாயிலுகச் செருவில் முனநாள் *
பரந்தவன் பல்லவர் கோன் பணிந்த
பரமேச்சுரவிண்ணகரமதுவே. 2.9.3 பரமேச்சுர விண்ணகரம்
அண்டமும் எண்திசையும் நிலனும்
அலைநீரொடு வான் எரி கால் முதலா
உண்டவன் * எந்தை பிரானதிடம்
ஒளிமாடங்கள் சூழ்ந்து அழகாய கச்சி *
விண்டவர் இண்டைக் குழாமுடனே
விரைந்தார் இரியச் செருவில் முனிந்து *
பண்டு ஒருகால் வளைத்தான் பணிந்த
பரமேச்சுர விண்ணகரமதுவே. 2.9.4 பரமேச்சுர விண்ணகரம்
தூம்புடைத் திண் கை வன்தாள் களிற்றின்
துயர் தீர்த்து * அரவம் வெருவ முனநாள்
பூம்புனல் பொய்கை புக்கானவனுக்கு இடம், தான்
தடம் சூழ்ந்து அழகாய கச்சி *
தேம்பொழில் குன்றெயில் தென்னவனைத்
திசைப்பச் செருமேல் வியந்து அன்று சென்ற *
பாம்புடைப் பல்லவர் கோன் பணிந்த
பரமேச்சுரவிண்ணகரமதுவே. 2.9.5 பரமேச்சுர விண்ணகரம்
திண்படைக் கோளரியின் உருவாய்த்
திறலோனகலம் செருவில் முனநாள் *
புண்படப் போழ்ந்த பிரானதிடம்
பொருமாடங்கள் சூழ்ந்தழகாய கச்சி *
வெண்குடை நீழல் செங்கோல் நடப்ப
விடை வெல்கொடி வேற்படை முன் உயர்த்த *
பண்புடைப் பல்லவர் கோன் பணிந்த
பரமேச்சுரவிண்ணகரமதுவே. 2.9.6 பரமேச்சுர விண்ணகரம்
இலகிய நீள்முடி மாவலிதன் பெருவேள்வியில்
மாணுருவாய் முனநாள் *
சலமொடு மாநிலங் கொண்டவனுக்கு இடம், தான்
தடம் சூழ்ந்து அழகாய கச்சி *
உலகுடை மன்னவன் தென்னவனைக்
கன்னிமாமதிள் சூழ் கருவூர் வெருவப் *
பலபடை சாய வென்றான் பணிந்த
பரமேச்சுரவிண்ணகரமதுவே. 2.9.7 பரமேச்சுர விண்ணகரம்
குடைத்திறல் மன்னவனாய், ஒருகால்
குரங்கைப் படையா மலையால் கடலை
அடைத்தவன் * எந்தை பிரானதிடம்
மணிமாடங்கள் சூழ்ந்து அழகாய கச்சி *
விடைத்திறல் வில்லவன் நென்மெலியில்
வெருவச் செருவேல் வலங்கைப் பிடித்த *
படைத்திறல் பல்லவர் கோன் பணிந்த
பரமேச்சுரவிண்ணகரமதுவே. 2.9.8 பரமேச்சுர விண்ணகரம்
பிறையுடை வாள் நுதல் பின்னை திறத்து, முன்னே
ஒருகால் செருவில் உருமின் *
மறையுடை மால்விடை ஏழடர்த்தாற்கு இடம், தான்
தடம் சூழ்ந்து அழகாய கச்சி *
கறையுடை வாள் மறமன்னர் கெடக்
கடல் போல் முழங்கும் குரல் கடுவாய் *
பறையுடைப் பல்லவர் கோன் பணிந்த
பரமேச்சுர விண்ணகரமதுவே. 2.9.9 பரமேச்சுர விண்ணகரம்
பார் மன்னு தொல்புகழ்ப் பல்லவர் கோன் பணிந்த
பரமேச்சுர விண்ணகர் மேல் *
கார்மன்னு நீள்வயல் மங்கையர்தம் தலைவன்
கலிகன்றி குன்றாது உரைத்த *
சீர்மன்னு செந்தமிழ் மாலை வல்லார்
திருமாமகள் தன்னருளால் * உலகில்
தேர்மன்னராய் ஒலிமா கடல்சூழ்
செழுநீர் உலகாண்டு திகழ்வர்களே. 2.9.10 பரமேச்சுர விண்ணகரம்
