பெரிய திருமொழி
மூன்றாம் பத்து
இரண்டாம் திருமொழி
ஊன்வாட உண்ணாது உயிர் காவலிட்டு
உடலில் பிரியாப் புலனைந்தும் நொந்து *
தாம் வாட வாடத் தவம் செய்ய வேண்டா
தமதா இமையோ ருலகாள கிற்பீர் ! *
கானாட மஞ்ஞைக் கணமாட மாடே
கயலாடு கானீர்ப் பழனம் புடைபோய்த் *
தேனாட மாடக் கொடியாடு, தில்லைத்
திருச்சித்ரகூடம் சென்று சேர்மின்களே. 3.2.1 சித்திரகூடம்
காயோடு நீடு கனியுண்டு, வீசு
கடுங்கால் நுகர்ந்து நெடுங்காலம் * ஐந்து
தீயொடு நின்று தவம் செய்ய வேண்டா
திருமார்பனைச் சிந்தையுள் வைத்துமென்பீர் ! *
வாயோது வேதம் மல்கின்ற தொல் சீர்
மறையாளர், நாளும் முறையால் வளர்த்த *
தீயோங்க வோங்கப் புகழோங்கு, தில்லைத்
திருச்சித்ரகூடம் சென்று சேர்மின்களே. 3.2.2 சித்திரகூடம்
வெம்பும் சினத்துப் புனக் கேழலொன்றாய்
விரிநீர் முதுவெள்ளம் உள்புக்கழுந்த *
வம்புண் பொழில் சூழ் உலகன்றெடுத்தான்
அடிப்போது அணைவான் விருப்போடு இருப்பீர் ! *
பைம்பொன்னும் முத்தும் மணியும் கொணர்ந்து
படை மன்னவன் பல்லவர் கோன் பணிந்த *
செம்பொன் மணிமாடங்கள் சூழ்ந்த, தில்லைத்
திருச்சித்ரகூடம் சென்று சேர்மின்களே. 3.2.3 சித்திரகூடம்
அருமாநிலம் அன்று அளப்பான் குறளாய்
அவுணன் பெருவேள்வியில் சென்றிரந்த *
பெருமான் திருநாமம் பிதற்றி, நுந்தம்
பிறவித்துயர் நீங்குது மென்ன கிற்பீர் ! *
கருமாகடலுள் கிடந்தான் உவந்து
கவைநா அரவினணைப் பள்ளியின் மேல் *
திருமால் திருமங்கையோடாடு, தில்லைத்
திருச்சித்ரகூடம் சென்று சேர்மின்களே. 3.2.4 சித்திரகூடம்
கோமங்க வங்கக்கடல் வையம் உய்யக்
குலமன்னர் அங்கம் மழுவில் துணியத் *
தாம் அங்கு அமருள் படைதொட்ட, வென்றித்
தவமா முனியைத் தமக்காக்க கிற்பீர் ! *
பூமங்கை தங்கிப் புலமங்கை மன்னிப்
புகழ்மங்கை எங்கும் திகழப் * புகழ்சேர்
சேமம் கொள் பைம்பூம்பொழில் சூழ்ந்த, தில்லைத்
திருச்சித்ரகூடம் சென்று சேர்மின்களே. 3.2.5 சித்திரகூடம்
நெய்வாயழலம்பு துரந்து, முந்நீர்
துணியப் பணி கொண்டு அணியார்ந்து இலங்கு *
மையார் மணிவண்ணனை எண்ணி, நுந்தம்
மனத்தே இருத்தும் படி வாழ வல்லீர் ! *
அவ்வாய் இளமங்கையர் பேசவும் தான்
அருமாமறை அந்தணர் சிந்தை புகச் *
செவ்வாய்க் கிளி நான்மறை பாடு, தில்லைத்
திருச்சித்ரகூடம் சென்று சேர்மின்களே. 3.2.6 சித்திரகூடம்
மெளவல் குழலாய்ச்சி மென்தோள் நயந்து
மகரம் சுழலச் சுழல் நீர் பயந்த *
தெய்வத் திருமாமலர் மங்கை தங்கு
திருமார்பனைச் சிந்தையுள் வைத்துமென்பீர் ! *
கெளவைக் களிற்றின் மருப்பும் பொருப்பில்
கமழ் சந்தும் உந்தி நிவா வலங்கொள் *
தெய்வப் புனல் சூழ்ந்தழகாய, தில்லைத்
திருச்சித்ரகூடம் சென்று சேர்மின்களே. 3.2.7 சித்திரகூடம்
மாவாயினங்கம் மதியாது கீறி
மழை மாமுது குன்றெடுத்து * ஆயர் தங்கள்
கோவாய் நிரை மேய்த்து உலகுண்ட மாயன்
குரைமாகழல் கூடும் குறிப்புடையீர் ! *
மூவாயிரம் நான்மறையாளர், நாளும்
முறையால் வணங்க அணங்காய சோதி *
தேவாதி தேவன் திகழ்கின்ற, தில்லைத்
திருச்சித்ரகூடம் சென்று சேர்மின்களே. 3.2.8 சித்திரகூடம்
செருநீல வேல்கண் மடவார் திறத்துச்
சினத்தோடு நின்று மனத்தால் வளர்க்கும் *
அருநீல பாவம் அகலப் புகழ் சேர்
அமரர்க்கும் எய்தாத அண்டத்திருப்பீர் ! *
பெருநீர் நிவா உந்தி முத்தம் கொணர்ந்து
எங்கும் வித்தும் வயலுள் கயல் பாய்ந்து உகளத் *
திருநீலம் நின்று திகழ்கின்ற, தில்லைத்
திருச்சித்ரகூடம் சென்றுசேர்மின்களே. 3.2.9 சித்திரகூடம்
சீரார் பொழில் சூழ்ந்து அழகாய, தில்லைத்
திருச்சித்ரகூடத்து உறை செங்கண்மாலுக்கு *
ஆராத உள்ளத்தவர் கேட்டு உவப்ப
அலை நீருலகுக்கு அருளே புரியும் *
காரார் புயற்கைக் கலிகன்றி குன்றா வொலிமாலை
ஓரொன்பதோடு ஒன்றும் வல்லார் *
பாராருலக மளந்தான் அடிக்கீழ்ப்
பலகாலம் நிற்கும்படி வாழ்வர் தாமே. 3.2.10 சித்திரகூடம்
