பெரிய திருமொழி
மூன்றாம் பத்து
ஆறாம் திருமொழி
தூவிரிய மலருழக்கித், துணையோடும் பிரியாதே *
பூவிரிய மது நுகரும், பொறிவரிய சிறுவண்டே ! *
தீவிரிய மறை வளர்க்கும், புகழாளர் திருவாலி *
ஏவரி வெஞ்சிலையானுக்கு, என் நிலைமை உரையாயே. 3.6.1 திருவாலி
பிணியவிழும், நறுநீலமலர் கிழியப் * பெடையோடும்
அணிமலர் மேல் மதுநுகரும், அறுகால சிறுவண்டே *
மணிகெழுநீர் மருங்கலரும், வயலாலி மணவாளன் *
பணியறியேன் நீ சென்று, என் பயலை நோய் உரையாயே. 3.6.2 திருவாலி
நீர் வானம் மண் எரி காலாய், நின்ற நெடுமால் * தன்
தாராய நறுந்துளவம், பெறுந்தகையேற்கு அருளானே ! *
சீராரும் வளர் பொழில் சூழ், திருவாலி வயல் வாழும்
கூர்வாய சிறுகுருகே ! குறிப்பறிந்து கூறாயே. 3.6.3 திருவாலி
தானாக நினையானேல், தன்நினைந்து நைவேற்கு * ஓர்
மீனாய கொடி நெடுவேள், வலிசெய்ய மெலிவேனோ ? *
தேன்வாய வரிவண்டே திருவாலி நகராளும் *
ஆனாயற்கு என்னுறு நோய், அறியச் சென்று உரையாயே. 3.6.4 திருவாலி
வாளாய கண்பனிப்ப, மென்முலைகள் பொன்னரும்ப *
நாள் நாளும், நின் நினைந்து நைவேற்கு * ஓ! மண்ணளந்த
தாளாளா ! தண்குடந்தை நகராளா ! * வரையெடுத்த
தோளாளா ! என்தனக்கு ஓர் துணையாள னாகாயே ! 3.6.5 திருக்குடந்தை (கும்பகோணம்),
திருவாலி
தாராய தண்துளவ, வண்டு உழுத வரை மார்பன் *
போரானைக் கொம்பொசித்த, புட்பாகன் என்னம்மான் *
தேராரும் நெடுவீதித், திருவாலி நகராளும்
காராயன் * என்னுடைய, கனவளையும் கவர்வானோ? 3.6.6 திருவாலி
கொண்டு அரவத்திரையுலவு, குரைகடல்மேல் குலவரை போல் *
பண்டு அரவினணைக் கிடந்து, பாரளந்த பண்பாளா ! *
வண்டு அமரும் வளர் பொழில் சூழ், வயலாலி மைந்தா ! * என்
கண்துயில் நீ கொண்டாய்க்கு என் கனவளையும் கடவேனோ ? 3.6.7 திருவாலி
குயிலாலும் வளர் பொழில் சூழ், தண்குடந்தைக் குடமாடீ ! *
துயிலாத கண்ணிணையேன், நின்நினைந்து துயர்வேனோ ? *
முயலாலும் இளமதிக்கே, வளையிழந்தேற்கு * இது நடுவே
வயலாலி மணவாளா ! கொள்வாயோ மணிநிறமே ? 3.6.8 திருக்குடந்தை (கும்பகோணம்),
திருவாலி
நிலையாளா ! நின்வணங்க வேண்டாயே யாகிலும் * என்
முலையாள ஒருநாள், உன் அகலத்தால் ஆளாயே *
சிலையாளா ! மரமெய்த திறலாளா ! திருமெய்ய
மலையாளா ! * நீ ஆள, வளையாள மாட்டோமே. 3.6.9 திருவாலி,
திருமெய்யம்
மையிலங்கு கருங்குவளை, மருங்கலரும் வயலாலி *
நெய்யிலங்கு சுடராழிப் படையானை, நெடுமாலைக் *
கையிலங்கு வேல்கலியன், கண்டுரைத்த தமிழ்மாலை *
ஐயிரண்டும் இவை வல்லார்க்கு, அருவினைகள் அடையாவே. 3.6.10 திருவாலி
