பெரிய திருமொழி
முதல் பத்து
ஆறாம் திருமொழி
வாள்நிலா முறுவல் சிறுநுதல் பெருந்தோள்
மாதரார் வனமுலைப் பயனே
பேணினேன் * அதனைப் பிழையெனக் கருதிப்
பேதையேன் பிறவி நோயறுப்பான் *
ஏணிலேன் இருந்தேன் எண்ணினேன், எண்ணி
இளையவர் கலவியின் திறத்தை
நாணினேன் * வந்து உன் திருவடி அடைந்தேன்
நைமிசாரணியத்துள் எந்தாய் ! 1.6.1 நைமிசாரணியம்
சிலம்படி யுருவிற் கருநெடுங் கண்ணார்
திறத்தனாய், அறத்தையே மறந்து *
புலம் படிந்துண்ணும் போகமே பெருக்கிப்
போக்கினேன் பொழுதினை வாளா *
அலம்புரி தடக்கை ஆயனே ! மாயா !
வானவர்க் கரசனே ! * வானோர்
நலம் புரிந்திறைஞ்சும் திருவடி அடைந்தேன்
நைமிசாரணியத்துள் எந்தாய் ! 1.6.2 நைமிசாரணியம்
சூதினைப் பெருக்கிக் களவினைத் துணிந்து
சுரிகுழல் மடந்தையர் திறத்துக் *
காதலே மிகுத்துக் கண்டவா திரிந்த
தொண்டனேன் * நமன் தமர் செய்யும்
வேதனைக் கொடுங்கி நடுங்கினேன்,
வேலை வெண்திரை யலமரக் கடைந்த
நாதனே !,* வந்து உன் திருவடி அடைந்தேன்
நைமிசாரணியத்துள் எந்தாய் ! 1.6.3 நைமிசாரணியம்
வம்புலாம் கூந்தல் மனைவியைத் துறந்து
பிறர் பொருள் தாரம் என்றிவற்றை *
நம்பினார் இறந்தால் நமன் தமர் பற்றி
எற்றி வைத்து * எரியெழுகின்ற
செம்பினால் இயன்ற பாவையைப்
பாவீ ! தழுவென மொழிவதற்கு அஞ்சி *
நம்பனே ! வந்து உன் திருவடி அடைந்தேன்
நைமிசாரணியத்துள் எந்தாய் ! 1.6.4 நைமிசாரணியம்
இடும்பையா லடர்ப்புண்டு இடுமினோ துற்றென்று
இரந்தவர்க்கு இல்லையே என்று *
நெடுஞ்சொலால் மறுத்த நீசனேன் அந்தோ !
நினைக்கிலேன் வினைப் பயன் தன்னைக் *
கடுஞ்சொலார் கடியார் காலனார் தமரால்
படுவதோர் கொடுமிறைக்கு அஞ்சி *
நடுங்கி நான் வந்து உன் திருவடி அடைந்தேன்
நைமிசாரணியத்துள் எந்தாய் ! 1.6.5 நைமிசாரணியம்
கோடிய மனத்தால் சினத்தொழில் புரிந்து
திரிந்து நாயினத்தொடும் திளைத்திட்டு *
ஓடியும் உழன்றும் உயிர்களே கொன்றேன்
உணர்விலேன் ஆதலால் * நமனார்
பாடியைப் பெரிதும் பரிசழித்திட்டேன்
பரமனே ! பாற்கடல் கிடந்தாய் ! *
நாடி நான் வந்து உன் திருவடி அடைந்தேன்
நைமிசாரணியத்துள் எந்தாய் ! 1.6.6 நைமிசாரணியம்,
திருப்பாற்கடல்
நெஞ்சினால் நினைந்தும் வாயினால் மொழிந்தும்
நீதியல்லாதன செய்தும் *
துஞ்சினார் செல்லும் தொல் நெறி கேட்டே
துளங்கினேன், விளங்கனி முனிந்தாய்! *
வஞ்சனேன் அடியேன் நெஞ்சினில் பிரியா
வானவா! தானவர்க்கென்றும்
நஞ்சனே ! * வந்து உன் திருவடி அடைந்தேன்
நைமிசாரணியத்துள் எந்தாய் ! 1.6.7 நைமிசாரணியம்
ஏவினார் கலியார் நலிக வென்று என்மேல்
எங்ஙனே வாழுமாறு ? * ஐவர்
கோவினார் செய்யும் கொடுமையை மடித்தேன்
குறுங்குடி நெடுங்கடல் வண்ணா ! *
பாவினாரின் சொல் பல்மலர் கொண்டு,
உன் பாதமே பரவி நான் பணிந்து, * என்
நாவினால் வந்து உன் திருவடி அடைந்தேன்
நைமிசாரணியத்துள் எந்தாய் ! 1.6.8 திருக்குறுங்குடி,
நைமிசாரணியம்
ஊனு(னி)டைச் சுவர் வைத்து என்பு தூண் நாட்டி
உரோமம் வேய்ந்து, ஒன்பது வாசல் *
தானுடைக் குரம்பை பிரியும் போது,
உன்தன் சரணமே சரணமென்றிருந்தேன் *
தேனுடைக் கமலத் திருவினுக்கரசே !
திரைகொள் மாநெடுங் கடல் கிடந்தாய் !
நானுடைத் தவத்தால் திருவடி அடைந்தேன்
நைமிசாரணியத்துள் எந்தாய் ! 1.6.9 நைமிசாரணியம்,
திருப்பாற்கடல்
ஏதம் வந்தணுகா வண்ணம் நாம் எண்ணி
எழுமினோ தொழுதுமென்று, * இமையோர்
நாதன் வந்திறைஞ்சும் நைமிசாரணியத்து
எந்தையைச், சிந்தையுள் வைத்துக் *
காதலே மிகுத்த கலியன் வாயொலி செய்
மாலை, தான் கற்று வல்லார்கள் *
ஓதநீர் வையகம் ஆண்டு வெண்குடைக்கீழ்
உம்பருமாகுவர் தாமே. 1.6.10 நைமிசாரணியம்
