பெரிய திருமொழி
நான்காம் பத்து
பத்தாம் திருமொழி
ஆய்ச்சியரழைப்ப வெண்ணெயுண்டு, ஒருகால்
ஆலிலை வளர்ந்த எம்பெருமான் *
பேய்ச்சியை முலையுண்டு இணை மருதிறுத்துப்
பெருநிலம் அளந்தவன் கோயில் *
காய்த்த நீள் கமுகும் கதலியும் தெங்கும்
எங்கும் மாம்பொழில்களின் நடுவே *
வாய்த்த நீர் பாயும் மண்ணியின் தென்பால்
திருவெள்ளியங்குடியதுவே. 4.10.1 திருவெள்ளியங்குடி
ஆநிரை மேய்த்து அன்று அலைகட லடைத்திட்டு
அரக்கர் தம் சிரங்களை யுருட்டிக் *
கார்நிறை மேகம் கலந்ததோருருவக்
கண்ணனார் கருதிய கோயில் *
பூநிரைச் செருந்தி, புன்னை முத்தரும்பிப்
பொதும்பிடை வரிவண்டுமிண்டித் *
தேனிரைத்துண்டு அங்கு இன்னிசை முரலும்
திருவெள்ளியங்குடியதுவே. 4.10.2 திருவெள்ளியங்குடி
கடுவிடமுடைய காளியன் தடத்தைக்
கலக்கி, முன் அலக்கழித்து * அவன்தன்
படமிறப் பாய்ந்து பல் மணி சிந்தப்
பல்நடம் பயின்றவன் கோயில் *
படவரவல்குல் பாவை நல்லார்கள்
பயிற்றிய நாடகத்தொலி போய் *
அடைபுடை தழுவி அண்டம் நின்றதிரும்
திருவெள்ளியங்குடியதுவே. 4.10.3 திருவெள்ளியங்குடி
கறவை முன் காத்துக் கஞ்சனைக் காய்ந்த
காளமேகத் திருவுருவன் *
பறவை முன்னுயர்த்துப் பாற்கடல் துயின்ற
பரமனார் பள்ளிகொள் கோயில் *
துறைதுறை தோறும் பொன்மணி சிதறும்
தொகுதிரை மண்ணியின் தென்பால் *
செறிமணி மாடக்கொடி கதிரணவும்
திருவெள்ளியங்குடியதுவே. 4.10.4 திருவெள்ளியங்குடி,
திருப்பாற்கடல்
பாரினை யுண்டு பாரினை யுமிழ்ந்து
பாரதம் கை யெறிந்து * ஒருகால்
தேரினை யூர்ந்து தேரினைத் துரந்த
செங்கண்மால் சென்றுறை கோயில் *
ஏர்நிரை வயலுள் வாளைகள் மறுகி
எமக்கிடமன்று இதென்றெண்ணிச் *
சீர்மலி பொய்கை சென்றணைகின்ற
திருவெள்ளியங்குடியதுவே. 4.10.5 திருவெள்ளியங்குடி
காற்றிடைப் பூளை கரந்தென அரந்தை
யுறக், கடலரக்கர் தம் சேனை *
கூற்றிடைச் செல்லக் கொடுங்கணை துரந்த
கோல வில்லி ராமன் தன் கோயில் *
ஊற்றிடை நின்ற வாழையின் கனிகள்
ஊழ்த்து வீழ்ந்தன உண்டு மண்டிச் *
சேற்றிடைக் கயல்களுகள் திகழ் வயல் சூழ்
திருவெள்ளியங்குடியதுவே. 4.10.6 திருவெள்ளியங்குடி
ஒள்ளிய கருமம் செய்வனென்றுணர்ந்த
மாவலி வேள்வியில் புக்கு *
தெள்ளிய குறளாய் மூவடி கொண்டு
திக்குற வளர்ந்தவன் கோயில் *
அள்ளியம் பொழில்வாய் இருந்து வாழ்குயில்கள்
அரியரி யென்றவை யழைப்ப *
வெள்ளியார் வணங்க விரைந்து அருள் செய்வான்
திருவெள்ளியங்குடியதுவே. 4.10.7 திருவெள்ளியங்குடி
முடியுடை அமரர்க்கு இடர் செய்யும்
அசுரர் தம்பெருமானை * அன்று அரியாய்
மடியிடை வைத்து மார்வை முன் கீண்ட
மாயனார் மன்னிய கோயில் *
படியிடை மாடத் தடியிடைத் தூணில்
பதித்த, பன்மணிகளி னொளியால் *
விடிபக லிரவென் றறிவரிதாய
திருவெள்ளியங்குடியதுவே. 4.10.8 திருவெள்ளியங்குடி
குடிகுடியாகக் கூடிநின்று, அமரர்
குணங்களே பிதற்றி நின்றேத்த *
அடியவர்க்கருளி அரவணைத் துயின்ற
ஆழியான் அமர்ந்துறை கோயில் *
கடியுடைக் கமலம் அடியிடை மலரக்
கரும்பொடு பெருஞ் செந்நெல் அசைய *
வடிவுடை அன்னம் பெடையொடும் சேரும்
வயல், வெள்ளியங்குடியதுவே. 4.10.9 திருவெள்ளியங்குடி
பண்டு முன் ஏனமாகி, அன்றொருகால்
பாரிடந்து எயிற்றினில் கொண்டு *
தெண்திரை வருடப் பாற்கடல் துயின்ற
திருவெள்ளியங்குடியானை *
வண்டறை சோலை மங்கையர் தலைவன்
மானவேல் கலியன் வாயொலிகள்
கொண்டு * இவை பாடும் தவமுடையார்கள்
ஆள்வர் இக்குரை கடலுலகே. 4.10.10 திருவெள்ளியங்குடி,
திருப்பாற்கடல்
**********
