பெரிய திருமொழி

பதினோராம் பத்து

முதல் திருமொழி

குன்ற மொன்று எடுத்தேந்தி * மாமழை

அன்று காத்த, அம்மான் * அரக்கரை

வென்ற வில்லியார், வீரமே கொலோ ? *

தென்றல் வந்து தீ வீசும், என் செய்கேன் ?           11.1.1

காரும் வார்பனிக் கடலும், அன்னவன் *

தாரும் மார்வமும், கண்ட தண்டமோ ? *

சோரு மாமுகில், துளியினூடு வந்து *

ஈர வாடை தான், ஈரும் என்னையே.     11.1.2

சங்கும் மாமையும், தளரும் மேனி மேல் *

திங்கள் வெங்கதிர் சீறும், என் செய்கேன் ? *

பொங்கு வெண்திரைப், புணரி வண்ணனார் *

கொங்கலர்ந்ததார், கூவும் என்னையே.      11.1.3

அங்கோராய்க் குலத்துள், வளர்ந்து சென்று

அங்கோர் தாயுருவாகி, வந்தவள் *

கொங்கை நஞ்சுண்ட, கோயின்மை கொலோ ?

திங்கள் வெங்கதிர், சீறுகின்றதே,     11.1.4

அங்கு ஓராளரியாய், அவுணனைப்

பங்கமா * இரு கூறு செய்தவன் *

மங்குல் மாமதி, வாங்கவே கொலோ ? *

பொங்கு மா கடல், புலம்புகின்றதே.      11.1.5

சென்று, வார் சிலை வளைத்து * இலங்கையை

வென்ற வில்லியார், வீரமே கொலோ ? *

முன்றில் பெண்ணை மேல், முளரிக் கூட்டகத்து *

அன்றிலின் குரல், அடரும் என்னையே.  11.1.6

பூவை வண்ணனார், புள்ளின் மேல் வர *

மேவி நின்று நான், கண்ட தண்டமோ ? *

வீவி லைங்கணை, வில்லி அம்பு கோத்து *

ஆவியே, இலக்காக எய்வதே !       11.1.7

மால் இனம் துழாய் வரும், என் நெஞ்சகம் *

மாலின் அந்துழாய், வந்து என்னுள் புகக் *

கோல வாடையும் கொண்டு வந்தது, ஓர்

ஆலி வந்தது ஆல் * அரிது காவலே.     11.1.8

கெண்டை யொண்கணும், துயிலும் * என்னிறம்,

பண்டு பண்டு போலொக்கும் * மிக்க சீர்த்

தொண்ட ரிட்ட, பூந்துளவின் வாசமே *

வண்டு கொண்டு வந்து, ஊதுமாகிலே.      11.1.9

அன்று பாரதத்து, ஐவர் தூதனாய்ச் *

சென்ற மாயனைச், செங்கண் மாலினை *

மன்றிலார் புகழ், மங்கை வாள் கலி

கன்றி * சொல் வல்லார்க்கு, அல்லலில்லையே.       11.1.10