பெரிய திருமொழி
பத்தாம் பத்து
மூன்றாம் திருமொழி
ஏத்துகின்றோம் நாத்தழும்ப, இராமன் திருநாமம் *
சோத்த நம்பி சுக்கிரீவா ! உம்மைத் தொழுகின்றோம் *
வார்த்தை பேசீர், எம்மை உங்கள் வானரம் கொல்லாமே *
கூத்தர் போல ஆடுகின்றோம், குழமணி தூரமே. 10.3.1
எம்பிரானே ! என்னை யாள்வாய் ! என்றென்று அலற்றாதே *
அம்பின் வாய்ப் பட்டாற்ற கில்லாது, இந்திரசித் தழிந்தான் *
நம்பி அனுமா ! சுக்கிரீவா ! அங்கதனே ! நளனே ! *
கும்பகர்ணன் பட்டுப் போனான், குழமணி தூரமே. 10.3.2
ஞாலமாளும் உங்கள் கோமான், எங்க ளிராவணற்குக் *
காலனாகி வந்தவா ! கண்டஞ்சிக் * கருமுகில் போல்
நீலன் வாழ்க சுடேணன் வாழ்க, அங்கதன் வாழ்க வென்று *
கோலமாக ஆடுகின்றோம், குழமணி தூரமே. 10.3.3
மணங்கள் நாறும் வார்குழலார், மாதர்க ளாதரத்தைப் *
புணர்ந்த சிந்தைப் புன்மையாளன் பொன்ற, வரிசிலையால் *
கணங்களுண்ண வாளியாண்ட, காவலனுக் கிளையோன் *
குணங்கள் பாடி ஆடுகின்றோம், குழமணி தூரமே. 10.3.4
வென்றி தந்தோம் மானம் வேண்டோம், தானம் எமக்காக *
இன்று தம்மின் எங்கள் வாணாள், எம்பெருமான் தமர்காள் ! *
நின்று காணீர் கண்களார, நீர் எம்மைக் கொல்லாதே *
குன்று போல ஆடுகின்றோம், குழமணி தூரமே. 10.3.5
கல்லின் முந்நீர் மாற்றி வந்து, காவல் கடந்து * இலங்கை
அல்லல் செய்தா னுங்கள் கோமான், எம்மை அமர்க்களத்து *
வெல்ல கில்லா தஞ்சினோம் காண், வெங்கதிரோன் சிறுவா ! *
கொல்ல வேண்டா ஆடுகின்றோம், குழமணி தூரமே. 10.3.6
மாற்றமாவது இத்தனையே வம்மின், அரக்கருள்ளீர் !
சீற்றம் நும்மேல் தீர வேண்டில், சேவகம் பேசாதே *
ஆற்றல் சான்ற தொல் பிறப்பில், அனுமனை வாழ்க வென்று *
கூற்ற மன்னார் காண ஆடீர், குழமணி தூரமே. 10.3.7
கவள யானை பாய் புரவி, தேரோடு அரக்கரெல்லாம்
துவள வென்ற * வென்றியாளன் தன் தமர் கொல்லாமே *
தவள மாட நீடயோத்திக், காவலன் தன் சிறுவன் *
குவளை வண்ணன் காண ஆடீர், குழமணி தூரமே. 10.3.8 திருவயோத்தி
ஏடொத்தேந்தும் நீளிலைவேல், எங்களி ராவணனார்
ஓடிப் போனார் * நாங்கள் எய்த்தோம், உய்வதோர் காரணத்தால் *
சூடிப் போந்தோம் உங்கள் கோமானாணை, தொடரேன்மின் *
கூடிக் கூடி ஆடுகின்றோம், குழமணி தூரமே. 10.3.9
வென்ற தொல்சீர்த், தென்னிலங்கை வெஞ்சமத்து *அன்றரக்கர்
குன்ற மன்னார் ஆடியுய்ந்த, குழமணி தூரத்தை *
கன்றி நெய்ந்நீர் நின்ற வேற்கைக், கலியனொலி மாலை *
ஒன்று மொன்று மைந்தும் மூன்றும், பாடி நின்றாடுமினே. 10.3.10
