திருவாய்மொழி
ஆறாம் பத்து
ஆறாம் திருவாய்மொழி
மாலுக்கு, வையமளந்த மணாளற்கு *
நீலக் கருநிற, மேக நியாயற்குக் *
கோலச், செந்தாமரைக் கண்ணற்கு * என் கொங்கல
ரேலக் குழலி, இழந்தது சங்கே. 6.6.1 திருவேங்கடம் திருப்பதி
சங்கு வில் வாள் தண்டு, சக்கரக் கையற்குச் *
செங்கனி வாய்ச், செய்ய தாமரைக் கண்ணற்குக் *
கொங்கலர் தண்ணந்துழாய், முடியானுக்கு * என்
மங்கை யிழந்தது, மாமை நிறமே. 6.6.2 திருவேங்கடம் திருப்பதி
நிறங் கரியானுக்கு, நீடுலகுண்ட *
திறங் கிளர்வாய்ச் சிறுக் கள்வனவற்குக் *
கறங்கிய சக்கரக், கையவனுக்கு * என்
பிறங்கிருங் கூந்தல், இழந்தது பீடே. 6.6.3 திருவேங்கடம் திருப்பதி
பீடுடை நான்முகனைப், படைத்தானுக்கு *
மாடுடை வையம் அளந்த, மணாளற்கு *
நாடுடை மன்னர்க்குத் தூது செல் நம்பிக்கு * என்
பாடுடை யல்குல், இழந்தது பண்பே. 6.6.4 திருவேங்கடம் திருப்பதி
பண்புடை வேதம் பயந்த, பரனுக்கு*
மண்புரை வையம் இடந்த வராகற்குத் *
தெண் புனற் பள்ளி, எம் தேவ பிரானுக்கு * என்
கண்புனை கோதை, இழந்தது கற்பே. 6.6.5 திருவேங்கடம் திருப்பதி
கற்பகக் காவன, நற்பல தோளற்குப் *
பொற்சுடர்க் குன்றன்ன, பூந்தண் முடியற்கு *
நற்பல தாமரை, நாள் மலர்க் கையற்கு * என்
விற்புருவக் கொடி, தோற்றது மெய்யே. 6.6.6 திருவேங்கடம் திருப்பதி
மெய்யமர் பல்கலன், நன்கணிந்தானுக்குப் *
பையரவினணைப், பள்ளியினானுக்குக் *
கையொடு கால், செய்ய கண்ணபிரானுக்கு * என்
தையல் இழந்தது, தன்னுடைச் சாயே. 6.6.7 திருவேங்கடம் திருப்பதி
சாயக் குருந்தம், ஒசித்த தமியற்கு *
மாயச் சகடம் உதைத்த, மணாளற்குப் *
பேயைப் பிணம் படப், பாலுண் பிரானுக்கு * என்
வாசக் குழலி, இழந்தது மாண்பே. 6.6.8 திருவேங்கடம் திருப்பதி
மாண்பமை கோலத்து, எம்மாயக் குறளற்குச் *
சேண் சுடர்க் குன்றன்ன, செஞ்சுடர் மூர்த்திக்குக் *
காண் பெருந் தோற்றத்து, எம் காகுத்த நம்பிக்கு * என்
பூண்புனை மென்முலை, தோற்றது பொற்பே. 6.6.9 திருவேங்கடம் திருப்பதி
பொற்பமை நீள்முடிப், பூந்தண்துழாயற்கு *
மற்பொரு தோளுடை, மாயப் பிரானுக்கு *
நிற்பன பல்லுருவாய், நிற்கு மாயற்கு * என்
கற்புடை யாட்டி, இழந்தது கட்டே. 6.6.10 திருவேங்கடம் திருப்பதி
கட்டெழில் சோலை, நல் வேங்கட வாணனைக் *
கட்டெழில், தென் குருகூர்ச் சடகோபன் சொல் *
கட்டெழி லாயிரத்து, இப்பத்தும் வல்லவர் *
கட்டெழில், வானவர் போக முண்பாரே. 6.6.11 திருவேங்கடம் திருப்பதி
