திருவாய்மொழி

இரண்டாம் பத்து

பத்தாம் திருவாய்மொழி

கிளரொளி யிளமை, கெடுவதன் முன்னம் *

வளரொளி மாயோன், மருவிய கோயில் *

வளரிளம் பொழில் சூழ், மாலிருஞ்சோலை *

தளர்விலராகில், சார்வது சதிரே.      2.10.1    திருமாலிருஞ்சோலை

சதிரிள மடவார் தாழ்ச்சியை, மதியாது *

அதிர் குரல் சங்கத்து, அழகர் தம் கோயில் *

மதி தவழ் குடுமி, மாலிருஞ்சோலைப்

பதியது * ஏத்தி எழுவது, பயனே.    2.10.2    திருமாலிருஞ்சோலை

பயனல்ல செய்து பயனில்லை, நெஞ்சே !*

புயல் மழை வண்ணர், புரிந்துறை கோயில் *

மயல்மிகு பொழில் சூழ், மாலிருஞ்சோலை *

அயல்மலை யடைவது, அது கருமமே.     2.10.3    திருமாலிருஞ்சோலை

கருமவன் பாசம் கழித்துழன்று, உய்யவே *

பெருமலை யெடுத்தான், பீடுறை கோயில் *

வருமழை தவழும், மாலிருஞ்சோலை *

திருமலை யதுவே, அடைவது திறமே.     2.10.4    திருமாலிருஞ்சோலை

திறமுடை வலத்தால், தீவினை பெருக்காது *

அறமுயலாழிப், படையவன் கோயில் *

மறுவில் வண்சுனை சூழ், மாலிருஞ்சோலை *

புறமலை சாரப், போவது கிறியே.      2.10.5    திருமாலிருஞ்சோலை

கிறியென நினைமின், கீழ்மை செய்யாதே *

உறியமர் வெண்ணெய், உண்டவன் கோயில் *

மறியொடு பிணைசேர் மாலிருஞ்சோலை *

நெறிபட, அதுவே நினைவது நலமே.    2.10.6    திருமாலிருஞ்சோலை

நலமென நினைமின், நரகழுந்தாதே *

நிலமுன மிடந்தான், நீடுறை கோயில் *

மலமறு மதி சேர், மாலிருஞ்சோலை *

வலமுறை யெய்தி, மருவுதல் வலமே.       2.10.7    திருமாலிருஞ்சோலை

வலஞ் செய்து, வைகல் வலங் கழியாதே *

வலஞ் செய்யும், ஆய மாயவன் கோயில் *

வலஞ் செய்யும் வானோர், மாலிருஞ்சோலை *

வலஞ் செய்து, நாளும் மருவுதல் வழக்கே.        2.10.8    திருமாலிருஞ்சோலை

வழக்கென நினைமின், வல்வினை மூழ்காது *

அழக்கொடி யட்டான் அமர் பெருங் கோயில் *

மழக் களிற்றினம் சேர், மாலிருஞ்சோலை *

தொழக் கருதுவதே, துணிவது சூதே.        2.10.9    திருமாலிருஞ்சோலை

சூதென்று, களவும் சூதும் செய்யாதே *

வேத முன் விரித்தான், விரும்பிய கோயில் *

மாதுறு மயில்சேர், மாலிருஞ்சோலை *

போதவிழ் மலையே, புகுவது பொருளே.          2.10.10  திருமாலிருஞ்சோலை

பொருளென்று, இவ்வுலகம் படைத்தவன் புகழ் மேல் *

மருளில் வண் குருகூர், வண் சடகோபன் *

தெருள் கொள்ளச் சொன்ன, ஓராயிரத்துள் இப்பத்து *

அருளுடையவன் தாள், அணைவிக்கும் முடித்தே.    2.10.11  திருமாலிருஞ்சோலை

*************