विषयवाक्यदीपिका तदन्तरप्रतिपत्त्यधिकरणम्

॥ श्रीरस्तु ॥ ॥ श्रीमते रामानुजाय नमः॥ ।। विषयवाक्यदीपिका ।। ।।श्रीरङ्गरामानुजमुनिप्रणीता।। तदन्तरप्रतिपत्त्यधिकरणम् तदन्तरप्रतिपत्तौ रंहति संपरिष्वक्तः प्रश्ननिरूपणाभ्याम् । (ब्र.सू. 3.1.1)छान्दोग्ये पञ्चमप्रपाठके तृतीयखण्डे ॥प्रकृतिविविक्तजीवयाथात्म्यविषयां पंचाग्निविद्यां संसृतिवैराग्याय प्रस्तौति ।।श्वेतकेतुर्हारुणेयः पंचालानाँ समितिमेयाय ।।अरुणस्यापत्यमारुणिः । तस्यापत्यमारुणेयः पंचालानां जनपदानां समितिं सभामाजगाम ।।तँ ह प्रवाहणो जैवलिरुवाच ।।जीवलस्यापत्यं जैवलिः नामतः प्रवाहणः पंचालराज उक्तवान् ।।कुमारानु त्वा शिषत्पितेति ।।हे कुमार त्वां तव पिता अन्वशिषत्किम् । […]