मौसलपर्वम् अध्यायः 01-09

श्रीः श्रीमहाभारतम् ||१६ मौसलपर्वम् || 001-अध्यायः वैशम्पायन उवाच|| षट्त्रिंशे त्वथ सम्प्राप्ते वर्षे कौरवनन्दनः | ददर्श विपरीतानि निमित्तानि युधिष्ठिरः ||१|| ववुर्वाताः सनिर्घाता रूक्षाः शर्करवर्षिणः | अपसव्यानि शकुना मण्डलानि प्रचक्रिरे ||२|| प्रत्यगूहुर्महानद्यो दिशो नीहारसंवृताः | उल्काश्चाङ्गारवर्षिण्यः प्रपेतुर्गगनाद्भुवि ||३|| आदित्यो रजसा राजन्समवच्छन्नमण्डलः | विरश्मिरुदये नित्यं कबन्धैः समदृश्यत ||४|| परिवेषाश्च दृश्यन्ते दारुणाः चन्द्रसूर्ययोः | त्रिवर्णाः श्यामरूक्षान्तास्तथा भस्मारुणप्रभाः ||५|| एते […]