பெரிய திருமொழி
நான்காம் பத்து
மூன்றாம் திருமொழி
பேரணிந்து உலகத்தவர் தொழுதேத்தும்
பேரருளாளன் எம்பிரானை *
வாரணி முலையாள் மலர்மகளோடு
மண்மகளும் உடன் நிற்பச் *
சீரணிமாட நாங்கை நன்னடுவுள்
செம்பொன்செய் கோயிலினுள்ளே *
காரணிமேகம் நின்றதொப்பானைக்
கண்டு கொண்டு உய்ந்தொழிந்தேனே. 4.3.1 செம்பொன்செய் கோயில்
பிறப்பொடு மூப்பொன்றில்லவன் தன்னைப்
பேதியா இன்பவெள்ளத்தை *
இறப்பெதிர்காலக் கழிவுமானானை
ஏழிசையின் சுவை தன்னைச் *
சிறப்புடை மறையோர் நாங்கை நன்னடுவுள்
செம்பொன்செய் கோயிலினுள்ளே *
மறைப் பெரும் பொருளை வானவர் கோனைக்
கண்டு நான் வாழ்ந்தொழிந்தேனே. 4.3.2 செம்பொன்செய் கோயில்
திடவிசும்பெரி நீர் திங்களும் சுடரும்
செழுநிலத்துயிர்களும் * மற்றும்
படர்பொருள்களுமாய் நின்றவன் தன்னைப்
பங்கயத்தய னவனனைய *
திடமொழி மறையோர் நாங்கை நன்னடுவுள்
செம்பொன்செய் கோயிலினுள்ளே *
கடல்நிற வண்ணன் தன்னை நான் அடியேன்
கண்டு கொண்டு உய்ந்தொழிந்தேனே. 4.3.3 செம்பொன்செய் கோயில்
வசையறு குறளாய் மாவலி வேள்வியில்
மண்ணளவிட்டவன் தன்னை *
அசைவறும் அமரரடியிணை வணங்க
அலைகடல் துயின்ற அம்மானைத் *
திசைமுகனனையோர் நாங்கை நன்னடுவுள்
செம்பொன்செய் கோயிலினுள்ளே *
உயர்மணி மகுடம் சூடி நின்றானைக்
கண்டு கொண்டு உய்ந்தொழிந்தேனே. 4.3.4 செம்பொன்செய் கோயில்
தீமனத் தரக்கர் திறலழித்தவனே !
என்று சென்றடைந்தவர் தமக்குத் *
தாய் மனத்திரங்கி அருளினைக் கொடுக்கும்
தயரதன் மதலையை, * சயமே
தேமலர்ப் பொழில்சூழ் நாங்கை நன்னடுவுள்
செம்பொன்செய் கோயிலினுள்ளே *
காமனைப் பயந்தான் தன்னை நான் அடியேன்
கண்டு கொண்டு உய்ந்தொழிந்தேனே. 4.3.5 செம்பொன்செய் கோயில்
மல்லை மாமுந்நீ ரதர்பட, மலையால்
அணை செய்து மகிழ்ந்தவன் தன்னைக் *
கல்லின் மீதியன்ற கடிமதிளிலங்கை
கலங்க, ஓர் வாளி தொட்டானைச் *
செல்வ நான்மறையோர் நாங்கை நன்னடுவுள்
செம்பொன்செய் கோயிலினுள்ளே *
அல்லிமாமலராள் தன்னொடும் அடியேன்
கண்டு கொண்டு அல்லல் தீர்ந்தேனே. 4.3.6 செம்பொன்செய் கோயில்
வெஞ்சினக் களிறும் வில்லொடு மல்லும்
வெகுண்டிறுத் தடர்த்தவன் தன்னைக் *
கஞ்சனைக் காய்ந்த காளையம்மானைக்
கருமுகில் திருநிறத்தவனைச் *
செஞ்சொல் நான்மறையோர் நாங்கை நன்னடுவுள்
செம்பொன்செய் கோயிலினுள்ளே *
அஞ்சனக் குன்றம் நின்றதொப்பானைக்
கண்டு கொண்டு அல்லல் தீர்ந்தேனே. 4.3.7 செம்பொன்செய் கோயில்
அன்றிய வாணனாயிரம் தோளும்
துணிய, அன்று ஆழி தொட்டானை *
மின்திகழ் குடுமி வேங்கட மலைமேல்
மேவிய வேதநல் விளக்கைத் *
தென்திசைத் திலதமனையவர் நாங்கைச்
செம்பொன்செய் கோயிலினுள்ளே *
மன்றது பொலிய மகிழ்ந்து நின்றானை
வணங்கி நான் வாழ்ந்தொழிந்தேனே. 4.3.8 செம்பொன்செய் கோயில்,
திருவேங்கடம் திருப்பதி
களங்கனி வண்ணா ! கண்ணனே ! என்தன்
கார்முகிலே ! என நினைந்திட்டு *
உளங் கனிந்திருக்கும் அடியவர் தங்கள்
உள்ளத்துள் ஊறிய தேனைத் *
தெளிந்த நான்மறையோர் நாங்கை நன்னடுவுள்
செம்பொன்செய் கோயிலினுள்ளே *
வளங்கொள் பேரின்பம் மன்னி நின்றானை
வணங்கி நான் வாழ்ந்தொழிந்தேனே. 4.3.9 செம்பொன்செய் கோயில்
தேனமர் சோலை நாங்கை நன்னடுவுள்
செம்பொன்செய் கோயிலினுள்ளே *
வானவர் கோனைக் கண்டமை சொல்லும்
மங்கையார் வாட் கலிகன்றி *
ஊனமில் பாடல் ஒன்பதோடொன்றும்
ஒழிவின்றிக் கற்று வல்லார்கள் *
மானவெண் குடைக்கீழ் வையகம் ஆண்டு
வானவராகுவர் மகிழ்ந்தே. 4.3.10 செம்பொன்செய் கோயில்
