திருவாய்மொழி
எட்டாம் பத்து
முதல் திருவாய்மொழி
தேவிமாராவார் திருமகள் பூமி ஏவ
மற்றமரர் ஆட்செய்வார் *
மேவிய உலகம் மூன்றவை யாட்சி
வேண்டு வேண்டுருவம் நின்னுருவம் *
பாவியேன் தன்னை அடுகின்ற
கமலக் கண்ணது, ஓர் பவள வாய் மணியே ! *
ஆவியே அமுதே ! அலை கடல் கடைந்த
அப்பனே !, காணுமாறு அருளாய். 8.1.1
காணுமாறருளா யென்றென்றே கலங்கிக்
கண்ண நீர்களலமர * வினையேன்
பேணுமாறெல்லாம் பேணி, நின் பெயரே
பிதற்றுமாறு அருள் எனக்கு அந்தோ ! *
காணுமாறு அருளாய் காகுத்தா ! கண்ணா !
தொண்டனேன் கற்பகக் கனியே ! *
பேணுவாரமுதே ! பெரிய தண் புனல் சூழ்
பெருநில மெடுத்த பேராளா ! 8.1.2
எடுத்த பேராளன் நந்தகோபன் தன்
இன்னுயிர்ச் சிறுவனே ! * அசோதைக்கு
அடுத்த பேரின்பக் குலவிளங் களிறே !
அடியனேன் பெரிய அம்மானே ! *
கடுத்த போரவுண னுடலிரு பிளவாக்
கையுகிராண்ட எங்கடலே ! *
அடுத்த தோருருவாய் இன்று நீ வாராய்
எங்ஙனம் தேறுவர் உமரே? 8.1.3
உமர் உகந்துகந்த உருவம் நின்னுருவமாகி
உன்தனக்கு அன்பரானார் அவர் *
உகந்தமர்ந்த செய்கை உன் மாயை
அறிவொன்றும் சங்கிப்பன் வினையேன் *
அமர்அது பண்ணி அகலிடம் புடைசூழ்
அடுபடை யவித்த அம்மானே ! *
அமரர் தம் அமுதே ! அசுரர்கள் நஞ்சே !
என்னுடை ஆருயிரே ஓ ! 8.1.4
ஆருயிரே ! ஓ ! அகலிட முழுதும்
படைத் திடந்துண்டு மிழ்ந்தளந்த *
பேருயிரே ! ஓ பெரிய நீர் படைத்து அங்குறைந்து
அது கடைந் தடைத் துடைத்த *
சீரியரே! ஓ ! மனிசர்க்குத் தேவர் போலத்
தேவர்க்கும் தேவாவோ ! *
ஓருயிரே ! ஓ ! உலகங்கட் கெல்லாம்
உன்னை நான் எங்கு வந்துறுகோ ? 8.1.5
எங்கு வந்துறுகோ ? என்னை யாள்வானே !
ஏழுலகங்களும் நீயே *
அங்கவர்க் கமைத்த தெய்வமும் நீயே
அவற்றவை கருமமும் நீயே *
பொங்கிய புறம்பால் பொருளுள வேலும்
அவையுமோ, நீ இன்னே யானால் *
மங்கிய அருவாம் நேர்ப்பமும் நீயே
வான்புல னிறந்ததும் நீயே. 8.1.6
இறந்ததும் நீயே எதிர்ந்ததும் நீயே
நிகழ்வதோ நீ, இன்னே யானால் *
சிறந்த நின் தன்மை அதுவிதுவுது வென்று
அறிவொன்றும் சங்கிப்பன் வினையேன் *
கறந்த பால் நெய்யே! நெய்யினின் சுவையே !
கடலினு ளமுதமே ! * அமுதில்
பிறந்த இன் சுவையே ! சுவையது பயனே !
பின்னை தோள் மணந்த பேராயா ! 8.1.7
மணந்த பேராயா ! மாயத்தால் முழுதும்
வல் வினையேனை யீர்கின்ற
குணங்களை யுடையாய் ! * அசுரர் வன்கையர் கூற்றமே !
கொடிய புள்ளுயர்த்தாய் ! *
பணங்களா யிரமுடைய பைந்நாகப் பள்ளியாய் !
பாற்கடற் சேர்ப்பா ! *
வணங்குமாறு அறியேன், மனமும்
வாசகமும் செய்கையும் யானும் நீ தானே. 8.1.8 திருப்பாற்கடல்
யானும் நீ தானே யாவதோ மெய்யே
அருநர கவையும் நீ * ஆனால்
வானுயரின்ப மெய்திலென் ?
மற்றை நரகமே யெய்திலென்? எனிலும் *
யானும் நீ தானாய்த் தெளிதொறும் நன்றும்
அஞ்சுவன் நரகம் நானடைதல் *
வானுயரின்பம் மன்னி வீற்றிருந்தாய் !
அருளு நின் தாள்களை எனக்கே. 8.1.9
தாள்களை எனக்கே தலைத்தலைச் சிறப்பத்
தந்த பேருதவிக் கைம்மாறாத் *
தோள்களை யாரத் தழுவி என்னுயிரை
அறவிலை செய்தனன் சோதீ ! *
தோள்களாயிரத்தாய் ! முடிகளாயிரத்தாய் !
துணைமலர்க் கண்களாயிரத்தாய் ! *
தாள்களாயிரத்தாய் ! பேர்களாயிரத்தாய் !
தமியனேன் பெரிய வப்பனே ! 8.1.10
பெரிய வப்பனைப் பிரமனப்பனை
உருத்திரனப்பனை * முனிவர்க்கு
உரிய வப்பனை அமரரப்பனை
உலகுக்கோர் தனியப்பன் தன்னைப் *
பெரிய வண்குருகூர் வண் சடகோபன்
பேணின ஆயிரத்துள்ளும் *
உரிய சொல்மாலை இவையும் பத்து இவற்றால் *
உய்யலாம் தொண்டீர் ! நங்கட்கே. 8.1.11
