திருவாய்மொழி
இரண்டாம் பத்து
நான்காம் திருவாய்மொழி
ஆடியாடி, அகம் கரைந்து * இசை
பாடிப் பாடிக், கண்ணீர் மல்கி * எங்கும்
நாடி நாடி நரசிங்கா ! என்று *
வாடி வாடும், இவ்வாணுதலே. 2.4.1
வாணுதல் இம்மடவரல் * உம்மைக்
காணும் ஆசையுள் நைகின்றாள் * விறல்
வாணன், ஆயிரம் தோள் துணித்தீர் * உம்மைக்
காண, நீர் இரக்கமிலீரே. 2.4.2
இரக்க மனத்தோடு எரியணை *
அரக்கும் மெழுகும் ஒக்கும் இவள் *
இரக்கமெழீர், இதற்கு என் செய்கேன் ? *
அரக்க னிலங்கை, செற்றீருக்கே. 2.4.3
இலங்கை செற்றவனே ! என்னும் * பின்னும்
வலங் கொள் புள்ளுயர்த்தாய் ! என்னும் * உள்ளம்
மலங்க வெவ்வுயிர்க்கும் * கண்ணீர் மிகக்
கலங்கிக், கை தொழும் நின்று இவளே. 2.4.4
இவள் இராப் பகல் வாய் வெரீஇ * தன
குவளை யொண் கண்ண நீர் கொண்டாள் * வண்டு
திவளும் தண்ணந் துழாய் கொடீர் * என
தவள வண்ணர் தகவுகளே. 2.4.5
தகவுடையவனே! என்னும் * பின்னும்
மிக விரும்பும், பிரான் என்னும் * எனது
அகவுயிர்க்கு அமுதே ! என்னும் * உள்ளம்
உக உருகி நின்று உள்ளுளே. 2.4.6
உள்ளுளாவி உலர்ந்து உலர்ந்து * என
வள்ளலே ! கண்ணனே ! என்னும் * பின்னும்
வெள்ள நீர்க் கிடந்தாய் ! என்னும் * என
கள்வி தான் பட்ட வஞ்சனையே ! 2.4.7
வஞ்சனே ! என்னும், கை தொழும் * தன
நெஞ்சம் வேவ, நெடிதுயிர்க்கும் * விறல்
கஞ்சனை வஞ்சனை செய்தீர் ! * உம்மைத்
தஞ்சமென்று இவள் பட்டனவே. 2.4.8
பட்ட போது, எழு போதறியாள் * விரை
மட்டலர் தண்துழா யென்னும் * சுடர்
வட்ட வாய் நுதி நேமியீர் ! * நுமது
இட்டம் என் கொல், இவ்வேழைக்கே ? 2.4.9
ஏழை பேதை இராப் பகல் * தன
கேழில் ஒண் கண்ண நீர் கொண்டாள் * கிளர்
வாழ்வை வேவ இலங்கை செற்றீர் ! * இவள்
மாழை நோக்கு ஒன்றும் வாட்டேன்மினே. 2.4.10
வாட்டமில் புகழ் வாமனனை * இசை
கூட்டி, வண் சடகோபன் சொல் * அமை
பாட்டு ஓராயிரத்து, இப்பத்தால் * அடி
சூட்டலாகும், அந்தாமமே. 2.4.11
