பெரிய திருமொழி
ஆறாம் பத்து
ஐந்தாம் திருமொழி
கலங்க முந்நீர் கடைந்து அமுதம் கொண்டு, * இமையோர்
துளங்கல் தீர நல்கு சோதிச் சுடராய *
வலங்கை யாழி, இடங்கைச் சங்கம் உடையானூர் *
நலங்கொள் வாய்மை, அந்தணர் வாழும் நறையூரே. 6.5.1 திருநறையூர்
முனையார் சீயமாகி, அவுணன் முரண் மார்வம் *
புனை வாளுகிரால், போழ்பட ஈர்ந்த புனிதனூர் *
சினையார் தேமாஞ், செந்தளிர் கோதிக் குயில் கூவும் *
நனையார் சோலை சூழ்ந்து, அழகாய நறையூரே. 6.5.2 திருநறையூர்
ஆனைப் புரவி, தேரொடு காலாளணி கொண்ட *
சேனைத் தொகையைச் சாடி, இலங்கை செற்றானூர் *
மீனைத் தழுவி, வீழ்ந்தெழும் மள்ளர்க்கு அலமந்து *
நானப் புதலில், ஆமை யொளிக்கும் நறையூரே. 6.5.3 திருநறையூர்
உறியார் வெண்ணெயுண்டு, உரலோடும் கட்டுண்டு *
வெறியார் கூந்தல் பின்னை பொருட்டு, ஆன் வென்றானூர் *
பொறியார் மஞ்ஞை, பூம்பொழில் தோறும் நடமாட *
நறு நாண்மலர் மேல், வண்டு இசைபாடும் நறையூரே. 6.5.4 திருநறையூர்
விடையேழ் வென்று, மென் தோளாய்ச்சிக்கு அன்பனாய் *
நடையால், நின்ற மருதம் சாய்த்த நாதனூர் *
பெடையோடு அன்னம், பெய்வளையார் தம் பின்சென்று *
நடையோடியலி, நாணி யொளிக்கும் நறையூரே. 6.5.5 திருநறையூர்
பகுவாய் வன்பேய் கொங்கை சுவைத்து, ஆருயிருண்டு *
புகுவாய் நின்ற, போதகம் வீழப் பொருதானூர் *
நெகுவாய் நெய்தல், பூமது மாந்திக் * கமலத்தின்
நகுவாய் மலர்மேல், அன்ன முறங்கும் நறையூரே. 6.5.6 திருநறையூர்
முந்து நூலும் முப்புரி நூலும், முன்னீந்த *
அந்தணாளன் பிள்ளையை, அஞ்ஞான்று அளித்தானூர் *
பொந்தில் வாழும் பிள்ளைக்காகிப், புள்ளோடித் *
நந்துவாரும், பைம்புனல் வாவி நறையூரே. 6.5.7 திருநறையூர்
வெள்ளைப் புரவித்தேர் விசயற்காய், விறல் வியூகம்
விள்ள * சிந்துக்கோன் விழ, ஊர்ந்த விமலனூர் *
கொள்ளைக் கொழுமீன், உண்குருகு ஓடிப் பெடையோடும் *
நள்ளக் கமலத் தேறலுகுக்கும் நறையூரே. 6.5.8 திருநறையூர்
பாரை யூரும், பாரம் தீரப் பார்த்தன் தன் *
தேரை யூரும், தேவ தேவன் சேருமூர்
தாரை யூரும் * தண்தளிர் வேலி புடை சூழ *
நாரை யூரும், நல்வயல் சூழ்ந்த நறையூரே. 6.5.9 திருநறையூர்
தாமத் துளப, நீள்முடி மாயன் தான் நின்ற *
நாமத்திரள், மாமாளிகை சூழ்ந்த நறையூர் மேல் *
காமக்கதிர் வேல் வல்லான், கலியனொலி மாலை *
சேமத் துணையாம், செப்புமவர்க்குத் திருமாலே. 6.5.10 திருநறையூர்
