பெரிய திருமொழி

ஆறாம் பத்து

எட்டாம் திருமொழி

மான் கொண்ட தோல் மார்வில், மாணியாய் * மாவலி மண்

தான் கொண்டு, தாளாலளந்த பெருமானைத் *

தேன் கொண்ட சாரல், திருவேங்கடத்தானை *

நான் சென்று நாடி, நறையூரில் கண்டேனே.    6.8.1      திருநறையூர்,

திருவேங்கடம் திருப்பதி

முந்நீரை, முன்னாள் கடைந்தானை * மூழ்த்த நாள்

அந்நீரை மீனாய் அமைத்த பெருமானை *

தென்னாலி மேய திருமாலை, எம்மானை *

நன்னீர் வயல் சூழ், நறையூரில் கண்டேனே.      6.8.2      திருவாலி,

திருநறையூர்

தூவாய புள்ளூர்ந்து, வந்து துறை வேழம் *

மூவாமை நல்கி, முதலை துணித்தானை *

தேவாதி தேவனைச் செங்கமலக் கண்ணானை *

நாவாயுளானை, நறையூரில் கண்டேனே.              6.8.3      திருநறையூர்,

திருநாவாய்

ஓடா அரியாய், இரணியனை ஊனிடந்த *

சேடார் பொழில் சூழ், திருநீர்மலையானை *

வாடா மலர்த்துழாய் மாலை, முடியானை *

நாடோறும் நாடி, நறையூரில் கண்டேனே.            6.8.4      திருநறையூர்,

திருநீர்மலை

கல்லார் மதிள்சூழ், கடியிலங்கைக் காரரக்கன்

வல்லாகம் கீள, வரிவெஞ்சரம் துரந்த

வில்லானை * செல்வ விபீடணற்கு வேறாக

நல்லானை நாடி, நறையூரில் கண்டேனே.          6.8.5      திருநறையூர்

உம்பருலகோடு, உயிரெல்லாம் * உந்தியில்

வம்புமலர் மேல் படைத்தானை, மாயோனை *

அம்பன்ன கண்ணாள், அசோதை தன் சிங்கத்தை *

நம்பனை நாடி, நறையூரில் கண்டேனே.  6.8.6      திருநறையூர்

கட்டேறு நீள் சோலைக் காண்டவத்தை, தீ மூட்டி

விட்டானை * மெய்யம் அமர்ந்த பெருமானை *

மட்டேறு கற்பகத்தை, மாதர்க்காய் * வண்துவரை

நட்டானை நாடி, நறையூரில் கண்டேனே.       6.8.7      திருநறையூர்,

திருமெய்யம்,

துவாரகை (துவரை)

மண்ணின் மீபாரம் கெடுப்பான் * மறமன்னர்

பண்ணின் மேல் வந்த, படையெல்லாம் பாரதத்து *

விண்ணின் மீதேற, விசயன் தேரூர்ந்தானை *

நண்ணி நான் நாடி, நறையூரில் கண்டேனே.      6.8.8      திருநறையூர்

பொங்கேறு நீள்சோதிப், பொன்னாழி தன்னோடும் *

சங்கேறு கோலத் தடக்கைப், பெருமானைக் *

கொங்கேறு சோலைக், குடந்தைக் கிடந்தானை *

நங்கோனை நாடி, நறையூரில் கண்டேனே.       6.8.9      திருக்குடந்தை (கும்பகோணம்),

திருநறையூர்

மன்னு மதுரை வசுதேவர் வாழ் முதலை *

நன்னறையூர், நின்ற நம்பியை * வம்பவிழ் தார்க்

கன்னவிலும் தோளான், கலியனொலி வல்லார் *

பொன்னுலகில் வானவர்க்குப், புத்தேளிராகுவரே.     6.8.10    திருநறையூர்,

வடமதுரை