பெரிய திருமொழி
மூன்றாம் பத்து
ஒன்பதாம் திருமொழி
சலங்கொண்ட இரணியனது அகல்மார்பம் கீண்டு
தடங்கடலைக் கடைந்து அமுதம் கொண்டுகந்த காளை *
நலங்கொண்ட கருமுகில் போல் திருமேனி அம்மான்
நாள்தோறும் மகிழ்ந்து இனிது மருவியுறை கோயில் *
சலங்கொண்டு மலர்சொரியும் மல்லிகை ஒண்செருந்தி
செண்பகங்கள் மணநாறும் வண்பொழிலினூடே *
வலங்கொண்டு கயலோடி விளையாடு நாங்கூர்
வைகுந்த விண்ணகரம் வணங்கு மடநெஞ்சே ! 3.9.1 வைகுந்தவிண்ணகரம்
திண்ணியதோ ரரியுருவாய்த் திசையனைத்தும் நடுங்கத்
தேவரொடு தானவர்கள் திசைப்ப * இரணியனை
நண்ணி அவன் மார்வகலத்து உகிர் மடுத்த நாதன்
நாள்தோறும் மகிழ்ந்து இனிது மருவியுறை கோயில் *
எண்ணில்மிகு பெருஞ் செல்வத்து எழில்விளங்கு மறையும்
ஏழிசையும் கேள்விகளும் இயன்ற பெரும் குணத்தோர் *
மண்ணில் மிகு மறையவர்கள் மலிவெய்து நாங்கூர்
வைகுந்தவிண்ணகரம் வணங்கு மடநெஞ்சே ! 3.9.2 வைகுந்தவிண்ணகரம்
அண்டமும் இவ்வலை கடலும் அவனிகளுமெல்லாம்
அமுது செய்த திருவயிற்றன் * அரன் கொண்டு திரியும்
முண்டமது நிறைத்து அவன்கண் சாபமது நீக்கும்
முதல்வனவன் மகிழ்ந்து இனிது மருவியுறை கோயில் *
எண்திசையும் பெருஞ்செந்நெல் இளந்தெங்கு கதலி
இலைக் கொடி ஒண்குலைக் கமுகோடு இசலி வளம் சொரிய *
வண்டு பல இசைபாட மயிலாலு நாங்கூர்
வைகுந்தவிண்ணகரம் வணங்கு மடநெஞ்சே ! 3.9.3 வைகுந்தவிண்ணகரம்
கலையிலங்கும் அகலல்குல் அரக்கர் குலக்கொடியைக்
காதொடு மூக்குடன் அரியக் * கதறி அவளோடித்
தலையில் அங்கை வைத்து மலையிலங்கை புகச்செய்த
தடந்தோளன் மகிழ்ந்து இனிது மருவியுறை கோயில் *
சிலையிலங்கு மணிமாடத்துச்சி மிசைச்சூலம்
செழுங்கொண்டலகடு இரியச் சொரிந்த செழுமுத்தம் *
மலையிலங்கு மாளிகைமேல் மலிவெய்து நாங்கூர்
வைகுந்தவிண்ணகரம் வணங்கு மடநெஞ்சே ! 3.9.4 வைகுந்தவிண்ணகரம்
மின்னனைய நுண்மருங்குல் மெல்லியற்கா, இலங்கை
வேந்தன் முடியொருபதும் தோளிருபதும் போயுதிரத் *
தன்னிகரில் சிலைவளைத்து அன்று இலங்கை பொடி செய்த
தடந்தோளன் மகிழ்ந்து இனிது மருவியுறை கோயில் *
செந்நெலொடு செங்கமலம் சேல் கயல்கள் வாளை
செங்கழுநீரொடு மிடைந்து கழனி திகழ்ந்து எங்கும் *
மன்னு புகழ் வேதியர்கள் மலிவெய்து நாங்கூர்
வைகுந்த விண்ணகரம் வணங்கு மடநெஞ்சே ! 3.9.5 வைகுந்தவிண்ணகரம்
பெண்மைமிகு வடிவுகொடு வந்தவளைப், பெரிய
பேயினது உருவுகொடு மாள உயிருண்டு *
திண்மைமிகு மருதொடு நற்சகடம் இறுத்தருளும்
தேவனவன் மகிழ்ந்து இனிது மருவியுறை கோயில் *
உண்மைமிகு மறையொடு நற்கலைகள் நிறை பொறைகள்
உதவு கொடையென்று இவற்றினொழிவில்லாப் * பெரிய
வண்மைமிகு மறையவர்கள் மலிவெய்து நாங்கூர்
வைகுந்த விண்ணகரம் வணங்கு மடநெஞ்சே ! 3.9.6 வைகுந்தவிண்ணகரம்
விளங்கனியை இளங்கன்று கொண்டு உதிர எறிந்து
வேல் நெடுங்கணாய்ச்சியர்கள் வைத்த தயிர் வெண்ணெய்
உளம் குளிர அமுது செய்து * இவ்வுலகுண்ட காளை
உகந்தினிது நாள்தோறும் மருவியுறை கோயில் *
இளம்படி நற்கமுகு குலைத்தெங்கு கொடிச் செந்நெல்
ஈன்கரும்பு கண்வளரக் கால் தடவும் புனலால் *
வளங்கொண்ட பெருஞ்செல்வம் வளரு மணி நாங்கூர்
வைகுந்தவிண்ணகரம் வணங்கு மடநெஞ்சே ! 3.9.7 வைகுந்தவிண்ணகரம்
ஆறாத சினத்தின் மிகு நரகனுரம் அழித்த
அடலாழித் தடக்கையன் * அலர்மகட்கும் அரற்கும்
கூறாகக் கொடுத்தருளும் திருவுடம்பன், இமையோர்
குலமுதல்வன் மகிழ்ந்து இனிது மருவியுறை கோயில் *
மாறாத மலர்க் கமலம் செங்கழுநீர் ததும்பி
மதுவெள்ளம் ஒழுக வயலுழவர் மடையடைப்ப *
மாறாத பெருஞ்செல்வம் வளரு மணிநாங்கூர்
வைகுந்தவிண்ணகரம் வணங்கு மட நெஞ்சே ! 3.9.8 வைகுந்தவிண்ணகரம்
வங்கமலி தடங்கடலுள் வானவர்களோடு
மாமுனிவர் பலர் கூடி மாமலர்கள் தூவி *
எங்கள் தனிநாயகனே ! எமக்கு அருளாயென்னும்
ஈசனவன் மகிழ்ந்து இனிது மருவியுறை கோயில் *
செங்கயலும் வாளைகளும் செந்நெலிடைக் குதிப்பச்
சேலுகளும் செழும்பணைசூழ் வீதிதொறும் மிடைந்து *
மங்குல் மதியகடு உரிஞ்சு மணிமாட நாங்கூர்
வைகுந்த விண்ணகரம் வணங்கு மடநெஞ்சே ! 3.9.9 வைகுந்தவிண்ணகரம்
சங்குமலி தண்டு முதல் சக்கரம் முன் ஏந்தும்
தாமரைக்கண் நெடிய பிரான் தானமரும் கோயில் *
வங்கமலி கடலுலகில் மலிவெய்து நாங்கூர்
வைகுந்த விண்ணகர் மேல் * வண்டறையும் பொழில் சூழ்
மங்கையர் தம் தலைவன், மருவலர்தம் உடல்துணிய
வாள்வீசும் பரகாலன் கலிகன்றி சொன்ன *
சங்கமலி தமிழ்மாலை பத்து இவை வல்லார்கள்
தரணியொடு விசும்பாளும் தன்மை பெறுவாரே. 3.9.10 வைகுந்தவிண்ணகரம்
