பெரிய திருமொழி
ஒன்பதாம் பத்து
முதல் திருமொழி
வங்கமா முந்நீர் வரிநிறப் பெரிய வாளரவினணை மேவிச் *
சங்கமார் அங்கைத் தடமலருந்திச் சாமமா மேனி என் தலைவன் *
அங்கமாறு ஐந்து வேள்வி நால் வேதம்
அருங்கலை பயின்று * எரி மூன்றும்
செங்கையால் வளர்க்கும் துளக்கமில் மனத்தோர்
திருக்கண்ணங்குடியுள் நின்றானே. 9.1.1 திருக்கண்ணங்குடி
கவளமா கதத்த கரியுய்யப் பொய்கைக்
கராம் கொளக் கலங்கி * உள் நினைந்து
துவளமேல் வந்து தோன்றி வன்முதலை
துணிபடச் சுடுபடை துரந்தோன் *
குவளைநீள் முளரி குமுதம் ஒண்கழுநீர்
கொய்ம்மலர் நெய்தலொண் கழனி *
திவளும் மாளிகை சூழ் செழுமணிப் புரிசைத்
திருக்கண்ணங்குடியுள் நின்றானே. 9.1.2 திருக்கண்ணங்குடி
வாதை வந்தடர வானமும் நிலனும்
மலைகளும் அலைகடல் குளிப்ப *
மீதுகொண் டுகளும் மீனுருவாகி
விரிபுனல் வரியகட் டொளித்தோன் *
போதலர் புன்னை மல்லிகை மெளவல்
புதுவிரை மதுமல ரணைந்து *
சீதவொண் தென்றல் திசை தொறும் கமழும்
திருக்கண்ணங்குடியுள் நின்றானே. 9.1.3 திருக்கண்ணங்குடி
வென்றி சேர் திண்மை விலங்கல் மாமேனி
வெள்ளெயிற் றொள்ளெரித் தறுகண் *
பன்றியாய் அன்று பார்மகள் பயலை
தீர்த்தவன், பஞ்சவர் பாகன் *
ஒன்றலா உருவத்து உலப்பில் பல் காலத்து
உயர்கொடி ஒளிவளர் மதியம் *
சென்று சேர் சென்னிச் சிகர நன்மாடத்
திருக்கண்ணங்குடியுள் நின்றானே. 9.1.4 திருக்கண்ணங்குடி
மன்னவன் பெரிய வேள்வியில் குறளாய்
மூவடி நீரொடும் கொண்டு *
பின்னும் ஏழுலகும் ஈரடியாகப்
பெருந்திசை யடங்கிட நிமிர்ந்தோன் *
அன்னமென் கமலத்தணி மலர்ப் பீடத்து
அலை புனலிலைக் குடை நீழல் *
செந்நெலொண் கவரி யசைய வீற்றிருக்கும்
திருக்கண்ணங்குடியுள் நின்றானே. 9.1.5 திருக்கண்ணங்குடி
மழுவினால் அவனி யரசை மூவெழுகால்
மணிமுடி பொடி படுத்து * உதிரக்
குழுவுவார் புனலுள் குளித்து,
வெங்கோபம் தவிர்ந்தவன் * குலைமலி கதலிக்
குழுவும் வார் கமுகும் குரவும் நற்பலவும்
குளிர்தரு சூதமாதவியும் *
செழுமையார் பொழில்கள் தழுவும் நன்மாடத்
திருக்கண்ணங்குடியுள் நின்றானே. 9.1.6 திருக்கண்ணங்குடி
வானுளாரவரை வலிமையால் நலியும்
மறிகடல் இலங்கையார் கோனைப் *
பானு நேர் சரத்தால் பனங்கனி போலப்
பருமுடி யுதிர வில் வளைத்தோன் *
கானுலா மயிலின் கணங்கள் நின்றாடக்
கணமுகில் முரசம் நின்றதிரத் *
தேனுலா வரிவண்டு இன்னிசை முரலும்
திருக்கண்ணங்குடியுள் நின்றானே. 9.1.7 திருக்கண்ணங்குடி
அரவு நீள் கொடியோன் அவையுள் ஆசனத்தை
அஞ்சிடாதே யிட * அதற்குப்
பெரிய மாமேனி அண்ட மூடுருவப்
பெருந்திசை யடங்கிட நிமிர்ந்தோன் *
வரையின் மாமணியும் மரதகத் திரளும்
வயிரமும் வெதிருதிர் முத்தும் *
திரைகொணர்ந்துந்தி வயல் தொறும் குவிக்கும்
திருக்கண்ணங்குடியுள் நின்றானே. 9.1.8 திருக்கண்ணங்குடி
பன்னிய பாரம் பார்மகட்கு ஒழியப்
பாரதமா பெரும் போரில் *
மன்னர்கள் மடிய மணிநெடுந் திண்தேர்
மைத்துனற்கு உய்த்த மாமாயன் *
துன்னு மாதவியும் சுரபுனைப் பொழிலும்
சூழ்ந்தெழு செண்பக மலர் வாய் *
தென்ன வென்று அளிகள் முரன்றிசை பாடும்
திருக்கண்ணங்குடியுள் நின்றானே. 9.1.9 திருக்கண்ணங்குடி
கலையுலா வல்குல் காரிகை திறத்துக்
கடற்பெரும் படையொடும் சென்று *
சிலையினால் இலங்கை தீயெழச் செற்ற
திருக்கண்ணங்குடியுள் நின்றானை *
மலைகுலா மாட மங்கையர் தலைவன்
மானவேல் கலியன் வாயொலிகள் *
உலவுசொல் மாலை ஒன்பதோ டொன்றும்
வல்லவர்க்கு இல்லை நல்குரவே. 9.1.10 திருக்கண்ணங்குடி
