பெரிய திருமொழி
ஒன்பதாம் பத்து
பத்தாம் திருமொழி
எங்கள் எம்மிறை எம்பிரான்
இமையோர்க்கு நாயகன் * ஏத்தடியவர்
தங்கள் தம் மனத்துப் பிரியாது, அருள் புரிவான் *
பொங்கு தண்ணருவி புதம் செய்யப்
பொன்களே சிதறும் * இலங்கொளி
செங்கமலம் மலரும் திருக்கோட்டியூரானே. 9.10.1 திருக்கோட்டியூர்
எவ்வ நோய் தவிர்ப்பான் எமக்கிறை இன்நகைத் துவர்வாய் *
நிலமகள் செவ்வி தோய வல்லான் திருமாமகட் கினியான் *
மெளவல்மாலை வண்டாடும் மல்லிகை மாலையோடு மணந்து*மாருதம்
தெய்வநாற வரும் திருக்கோட்டியூரானே. 9.10.2 திருக்கோட்டியூர்
வெள்ளியான் கரியான்
மணிநிற வண்ணன் விண்ணவர் தமக்கிறை * எமக்கு
ஒள்ளியான் உயர்ந்தான் உலகேழும் உண்டு உமிழ்ந்தான் *
துள்ளுநீர் மொண்டு கொண்டு சாமரைக்கற்றை சந்தனமுந்தி வந்தசை *
தெள்ளுநீர்ப் புறவில் திருக்கோட்டியூரானே. 9.10.3 திருக்கோட்டியூர்
ஏறுமேறி இலங்குமொண் மழுப்பற்றும்
ஈசற்கு இசைந்து * உடம்பில் ஓர்
கூறு தான் கொடுத்தான் குலமா மகட்கினியான் *
நாறு செண்பக மல்லிகை மலர் புல்கி இன்னிள வண்டு * நல்நறும்
தேறல் வாய் மடுக்கும் திருக்கோட்டியூரானே. 9.10.4 திருக்கோட்டியூர்
வங்கமா கடல் வண்ணன்
மாமணி வண்ணன் விண்ணவர் கோன் * மதுமலர்த்
தொங்கல் நீள்முடியான் நெடியான் படி கடந்தான் *
மங்குல் தோய் மணிமாட வெண்கொடி மாக மீதுயர்ந்தேறி * வானுயர்
திங்கள் தானணவும் திருக்கோட்டியூரானே. 9.10.5 திருக்கோட்டியூர்
காவல னிலங்கைக் கிறை கலங்கச் சரம் செலவுய்த்து * மற்றவன்
ஏவலம் தவிர்த்தான் என்னை யாளுடை எம்பிரான் *
நாவலம் புவி மன்னர் வந்து வணங்க, மாலுறைகின்றது இங்கெனத் *
தேவர் வந்திறைஞ்சும் திருக்கோட்டியூரானே. 9.10.6 திருக்கோட்டியூர்
கன்று கொண்டு விளங்கனி யெறிந்து
ஆநிரைக்கு அழிவென்று * மாமழை
நின்று காத்துகந்தான் நிலமாமகட்கினியான் *
குன்றின் முல்லையின் வாசமும்
குளிர் மல்லிகை மணமும் அளைந்து * இளந்
தென்றல் வந்துலவும் திருக்கோட்டியூரானே. 9.10.7 திருக்கோட்டியூர்
பூங்குருந்தொசித்து ஆனை காய்ந்து
அரிமாச் செகுத்து அடியேனை யாளுகந்து *
ஈங்கு என்னுள் புகுந்தான் இமையோர்கள் தம்பெருமான் *
தூங்கு தண் பலவின் கனி தொகு வாழையின் கனியொடு * மாங்கனி
தேங்கு தண் புனல் சூழ் திருக்கோட்டியூரானே. 9.10.8 திருக்கோட்டியூர்
கோவையின் தமிழ் பாடுவார் குடமாடுவார் * தடமாமலர் மிசை
மேவு நான்முகனில் விளங்கு புரிநூலர் *
மேவுநான்மறைவாணர் ஐவகை வேள்வி ஆறங்கம் வல்லவர் தொழும்*
தேவ தேவ பிரான் திருக்கோட்டியூரானே. 9.10.9 திருக்கோட்டியூர்
ஆலுமாவலவன் கலிகன்றி மங்கையர்தலைவன் *அணிபொழில்
சேல்கள் பாய் கழனித் திருக்கோட்டியூரானை *
நீலமாமுகில் வண்ணனை நெடுமாலை இன்தமிழால் நினைந்த * இந்
நாலும் ஆறும் வல்லார்க்கு இடமாகும் வானுலகே. 9.10.10 திருக்கோட்டியூர்
*********
