பெரிய திருமொழி
ஒன்பதாம் பத்து
நான்காம் திருமொழி
காவார் மடல் பெண்ணை, அன்றிலரி குரலும் *
ஏவாயினூ டியங்கும், எஃகின் கொடிதாலோ ! *
பூவார் மணம் கமழும், புல்லாணி கை தொழுதேன் *
பாவாய் ! இது நமக்கு, ஓர் பான்மையே யாகாதே. 9.4.1 திருப்புல்லாணி
முன்னம் குறளுருவாய், மூவடி மண் கொண்டளந்த *
மன்னன் சரிதைக்கே மாலாகிப், பொன் பயந்தேன் *
பொன்னங்கழிக் கானல் புள்ளினங்காள் ! புல்லாணி *
அன்னமாய் நூல் பயந்தாற்கு ஆங்கு இதனைச் செப்புமினே. 9.4.2 திருப்புல்லாணி
வவ்வித் துழாயதன் மேல் சென்ற, தனி நெஞ்சம் *
செவ்வி யறியாது, நிற்குங்கொல் ? * நித்திலங்கள்
பவ்வத் திரையுலவு, புல்லாணி கை தொழுதேன் *
தெய்வச் சிலையாற்கு, என் சிந்தை நோய் செப்புமினே. 9.4.3 திருப்புல்லாணி
பரிய இரணியனது ஆகம், அணியுகிரால் *
அரியுருவாய்க் கீண்டான், அருள் தந்தவா ? நமக்குப் *
பொரு திரைகள் போந்துலவு புல்லாணி, கை தொழுதேன் *
அரிமலர்க் கண் நீர் ததும்ப, அந்துகிலும் நில்லாவே. 9.4.4 திருப்புல்லாணி
வில்லால் இலங்கை மலங்கச், சரம் துரந்த *
வல்லாளன் பின்போன நெஞ்சம், வருமளவும் *
எல்லாரும் என் தன்னை, ஏசிலும் பேசிடினும் *
புல்லாணி யெம்பெருமான், பொய் கேட்டிருந்தேனே. 9.4.5 திருப்புல்லாணி
சுழன்றிலங்கு வெங்கதிரோன், தேரோடும் போய் மறைந்தான் *
அழன்று கொடிதாகி, அஞ்சுடரில் தானடுமால் *
செழுந்தடம் பூஞ்சோலை சூழ் புல்லாணி, கை தொழுதேன் *
இழந்திருந்தேன் என் தன், எழில் நிறமும் சங்குமே. 9.4.6 திருப்புல்லாணி
கனையாரிடி குரலின், கார்மணியின் நாவாடல் *
தினையேனும் நில்லாது, தீயிற் கொடிதாலோ *
புனையார் மணிமாடப், புல்லாணி கை தொழுதேன் *
வினையேன் மேல், வேலையும் வெந்தழலே வீசுமே. 9.4.7 திருப்புல்லாணி
தூம்புடைக்கை வேழம், வெருவ மருப்பொசித்த *
பாம்பினணையான், அருள் தந்தவா ? நமக்குப் *
பூஞ்செருந்தி பொன் சொரியும் புல்லாணி, கை தொழுதேன் *
தேம்பல் இளம்பிறையும், என்தனக்கு ஓர் வெந்தழலே. 9.4.8 திருப்புல்லாணி
வேதமும் வேள்வியும், விண்ணும் இரு சுடரும் *
ஆதியுமானான் அருள் தந்தவா ! நமக்குப்
போதலரும் புன்னை சூழ் புல்லாணி, கை தொழுதேன் *
ஓதமும் நானும், உறங்காதிருந்தேனே. 9.4.9 திருப்புல்லாணி
பொன்னலரும் புன்னைசூழ், புல்லாணி யம்மானை *
மின்னிடையார் வேட்கை நோய் கூர, இருந்ததனைக்
கல்நவிலும் திண்தோள், கலியனொலி வல்லார் *
மன்னவராய் மண்ணாண்டு, வானாடும் உன்னுவரே. 9.4.10 திருப்புல்லாணி
