பெரிய திருமொழி
ஒன்பதாம் பத்து
இரண்டாம் திருமொழி
பொன்னிவர் மேனி மரதகத்தின்
பொங்கிளஞ் சோதி யகலத்து ஆரம்
மின் * இவர் வாயில் நல்வேத மோதும்
வேதியர், வானவராவர் தோழி ! *
என்னையும் நோக்கி என்னல்குலும் நோக்கி
ஏந்திளங் கொங்கையும் நோக்குகின்றார் *
அன்னை யென்னோக்கு மென்றஞ்சுகின்றேன்
அச்சோ ஒருவரழகியவா ! 9.2.1 திருநாகை
தோடவிழ் நீலம் மணங் கொடுக்கும்
சூழ்புனல் சூழ் குடந்தைக் கிடந்த *
சேடர் கொலென்று தெரிக்க மாட்டேன்
செஞ்சுட ராழியும் சங்கும் ஏந்திப் *
பாடக மெல்லடியார் வணங்கப்
பன்மணி முத்தொடு இலங்கு சோதி *
ஆடகம் பூண்டு ஒரு நான்கு தோளும்
அச்சோ ஒருவரழகியவா ! 9.2.2 திருக்குடந்தை (கும்பகோணம்),
திருநாகை
வேயிருஞ் சோலை விலங்கல் சூழ்ந்த
மெய்ய மணாளர், இவ்வைய மெல்லாம் *
தாயின நாயகராவர் தோழீ !
தாமரைக் கண்களிருந்தவாறு *
சேயிருங் குன்றம் திகழ்ந்த தொப்பச்
செவ்வியவாகி மலர்ந்த சோதி *
ஆயிரம் தோளொடு இலங்கு பூணும்
அச்சோ ஒருவரழகியவா ! 9.2.3 திருநாகை,
திருமாலிருஞ்சோலை
வம்பவிழும் துழாய் மாலை தோள்மேல்
கையன ஆழியும் சங்கும் ஏந்தி *
நம்பர் நம் இல்லம் புகுந்து நின்றார்
நாகரிகர் பெரிதும் இளையர் *
செம்பவளம் இவர் வாயின் வண்ணம்
தேவரிவரது உருவம் சொல்லில் *
அம்பவளத் திரளேயும் ஒப்பர்
அச்சோ ஒருவரழகியவா ! 9.2.4 திருநாகை
கோழியும் கூடலும் கோயில் கொண்ட
கோவலரே ஒப்பர், குன்றமன்ன *
பாழியந் தோளும் ஓர் நான்குடையர்
பண்டு இவர் தம்மையும் கண்டறியோம் *
வாழியரோ இவர் வண்ணம் எண்ணில்
மாகடல் போன்றுளர் * கையில் வெய்ய
ஆழியொன் றேந்தி ஓர் சங்கு பற்றி
அச்சோ ஒருவரழகியவா ! 9.2.5 திருக்கோழி – உறையூர் (நிசுளா,
திருநாகை,
திருக்கூடல் (தென்மதுரை)
வெஞ்சின வேழம் மருப்பொசித்த
வேந்தர் கொல்? * ஏந்திழையார் மனத்தைத்
தஞ்சுடையாளர் கொல்? யான் அறியேன்
தாமரைக் கண்கள் இருந்தவாறு *
கஞ்சனை யஞ்ச முன் கால் விசைத்த
காளையராவர், கண்டார் வணங்கும் *
அஞ்சன மாமலையேயும் ஒப்பர்
அச்சோ ஒருவரழகியவா ! 9.2.6 திருநாகை
பிணியவிழ் தாமரை மொட்டலர்த்தும்
பேரருளாளர் கொல் ? யான் அறியேன் *
பணியும் என் நெஞ்சமிதென் கொல் ? தோழீ !
பண்டு இவர் தம்மையும் கண்டறியோம் *
அணிகெழு தாமரையன்ன கண்ணும்
அங்கையும் பங்கயம் * மேனி வானத்து
அணிகெழு மாமுகிலேயும் ஒப்பர்
அச்சோ ஒருவரழகியவா ! 9.2.7 திருநாகை
மஞ்சுயர் மாமதி தீண்ட நீண்ட
மாலிருஞ்சோலை மணாளர் வந்து * என்
நெஞ்சுள்ளும் கண்ணுள்ளும் நின்று நீங்கார்
நீர்மலையார் கொல் ? நினைக்க மாட்டேன் *
மஞ்சுயர் பொன்மலை மேல் எழுந்த
மாமுகில் போன்றுளர் வந்து காணீர் *
அஞ்சிறைப் புள்ளுமொன்று ஏறி வந்தார்
அச்சோ ஒருவரழகியவா ! 9.2.8 திருநாகை,
திருமாலிருஞ்சோலை,
திருநீர்மலை
எண்திசையும் எறி நீர்க்கடலும்
ஏழுலகும் உடனே விழுங்கி *
மண்டி ஓராலிலைப் பள்ளி கொள்ளும்
ஆயர் கொல் ? மாயம் அறிய மாட்டேன் *
கொண்டல் நன்மால் வரையேயும் ஒப்பர்
கொங்கலர் தாமரைக் கண்ணும் வாயும் *
அண்டத்தமரர் பணிய நின்றார்
அச்சோ ஒருவரழகியவா ! 9.2.9 திருநாகை
அன்னமும் கேழலும் மீனுமாய
ஆதியை, நாகை அழகியாரைக் *
கன்னிநன் மாமதிள் மங்கை வேந்தன்
காமரு சீர்க் கலிகன்றி * குன்றா
இன்னிசையால் சொன்ன செஞ்சொல் மாலை
ஏழுமிரண்டும் ஓரொன்றும் வல்லார் *
மன்னவராய் உலகாண்டு, மீண்டும்
வானவராய் மகிழ்வெய்துவரே. 9.2.10 திருநாகை
