பெரிய திருமொழி
ஐந்தாம் பத்து
நான்காம் திருமொழி
உந்தி மேல் நான்முகனைப் படைத்தான், உலகுண்டவன்
எந்தை பெம்மான் * இமையோர்கள் தாதைக்கு, இடம் என்பரால் *
சந்தினோடு மணியும் கொழிக்கும் புனல், காவிரி *
அந்தி போலும் நிறத்தார் வயல் சூழ், தென்னரங்கமே. 5.4.1 திருவரங்கம்
வையமுண்டு, ஆலிலை மேவும் மாயன் * மணிநீள்முடிப்
பைகொள் நாகத்தணையான் பயிலும், இடமென்பரால் *
தையல் நல்லார் குழல் மாலையும், மற்றவர் தடமுலைச்
செய்ய சாந்தும் * கலந்திழி புனல் சூழ், தென்னரங்கமே. 5.4.2 திருவரங்கம்,
திருப்பாற்கடல்
பண்டு இவ்வைய மளப்பான் சென்று, மாவலி கையில் நீர்
கொண்ட * ஆழித்தடக்கைக் குறளன், இடமென்பரால் *
வண்டு பாடும் மதுவார் புனல், வந்திழி காவிரி *
அண்டநாறும் பொழில் சூழ்ந்து அழகார், தென்னரங்கமே. 5.4.3 திருவரங்கம்
விளைத்த வெம்போர் விறல் வாளரக்கன் நகர், பாழ்பட *
வளைத்த வல்வில் தடக்கை யவனுக்கு, இடமென்பரால் *
துளைக்கை யானை, மருப்பும் அகிலும் கொணர்ந்துந்தி * முன்
திளைக்கும் செல்வப் புனல் காவிரி சூழ், தென்னரங்கமே. 5.4.4 திருவரங்கம்
வம்புலாம் கூந்தல் மண்டோதரி காதலன் வான்புக *
அம்பு தன்னால் முனிந்த அழகனிட மென்பரால் *
உம்பர் கோனும் உலகேழும், வந்தீண்டி வணங்கும் * நல்
செம்பொனாரும் மதிள் சூழ்ந்து அழகார், தென்னரங்கமே. 5.4.5 திருவரங்கம்
கலையுடுத்த அகலல்குல், வன்பேய்மகள் * தாயென
முலை கொடுத்தாளுயிருண்டவன், வாழிட மென்பரால் *
குலை யெடுத்த கதலிப், பொழிலூடும் வந்து உந்தி * முன்
அலையெடுக்கும் புனல் காவிரிசூழ், தென்னரங்கமே. 5.4.6 திருவரங்கம்
கஞ்சன் நெஞ்சும் கடுமல்லரும், சகடமும், காலினால்
துஞ்ச * வென்ற சுடராழியான், வாழிட மென்பரால் *
மஞ்சுசேர் மாளிகை, நீடகில் புகையும் * மாமறையோர்
செஞ்சொல் வேள்விப் புகையும் கமழும், தென்னரங்கமே. 7 5.4.7 திருவரங்கம்
ஏனம் மீனாமையோடு, அரியும் சிறுகுறளுமாய் *
தானுமாய, தரணித் தலைவனிட மென்பரால் *
வானும் மண்ணும் நிறையப் புகுந்து ஈண்டி வணங்கும் * நல்
தேனும் பாலும் கலந்தன்னவர் சேர், தென்னரங்கமே. 5.4.8 திருவரங்கம்
சேயன் என்றும் மிகப்பெரியன், நுண்நேர்மையினாய * இம்
மாயையை யாரும் அறியா வகையான், இடமென்பரால் *
வேயின் முத்தும் மணியும் கொணர்ந்து ஆர்புனல் காவிரி *
ஆயபொன் மாமதிள் சூழ்ந்து அழகார், தென்னரங்கமே. 5.4.9 திருவரங்கம்
அல்லி மாதரமரும் திருமார்வன், அரங்கத்தைக் *
கல்லின் மன்னு மதிள் மங்கையர் கோன், கலிகன்றி சொல்*
நல்லிசை மாலைகள், நாலிரண்டு மிரண்டும் * உடன்
வல்லவர் தாம் உலகாண்டு, பின் வானுலகாள்வரே. 5.4.10 திருவரங்கம்
