பெரிய திருமொழி
பத்தாம் பத்து
ஒன்பதாம் திருமொழி
புள்ளுருவாகி நள்ளிருள் வந்த பூதனை மாள * இலங்கை
ஒள்ளெரி மண்டியுண்ணப் பணித்த ஊக்கமதனை நினைந்தோ ? *
கள்ளவிழ் கோதை காதலும் எங்கள், காரிகை மாதர் கருத்தும் *
பிள்ளை தன்கையில் கிண்ணமேயொக்கப் பேசுவது எந்தை பிரானே! 10.9.1
மன்றில் மலிந்து கூத்து உவந்தாடி
மால்விடை யேழுமடர்த்து * ஆயர்
அன்று நடுங்க ஆனிரை காத்த
ஆண்மை கொலோ ? அறியேன் நான் *
நின்ற பிரானே ! நீள்கடல் வண்ணா !
நீ இவள் தன்னை * நின் கோயில்
முன்றிலெழுந்த முருங்கையில் தேனாம்
முன் கை வளை கவர்ந்தாயே. 10.9.2 திருவேங்கடம் திருப்பதி
ஆர் மலி ஆழி சங்கொடு பற்றி
ஆற்றலை ஆற்றல் மிகுத்துக் *
கார்முகில் வண்ணா ! கஞ்சனை முன்னம்
கடந்த, நின் கடும் திறல் தானோ? *
நேரிழை மாதை நித்திலத் தொத்தை
நெடுங்கடல் அமுது அனையாளை *
ஆரெழில் வண்ணா ! அங்கையில் வட்டாம்
இவளெனக் கருதுகின்றாயே. 10.9.3
மல்கிய தோளும் மானுரி அதளும்
உடையவர் தமக்கும் * ஓர் பாகம்
நல்கிய நலமோ ? நரகனைத் தொலைத்த
கரதலத்து அமைதியின் கருத்தோ ? *
அல்லியங் கோதை அணிநிறம் கொண்டு, வந்து
முன்னே நின்று போகாய் *
சொல்லி யென் ? நம்பி ! இவளை நீ
உங்கள் தொண்டர் கைத்தண் டென்றவாறே. 10.9.4
செரு வழியாத மன்னர்கள் மாளத்
தேர் வலங் கொண்டு * அவர் செல்லும்
அருவழி வானம் அதர்படக் கண்ட
ஆண்மை கொலோ ? அறியேன் நான் *
திருமொழி எங்கள் தேமலர்க் கோதை
சீர்மையை நினைந்திலை அந்தோ ! *
பெருவழி நாவற் கனியினும் எளியள்
இவளெனப் பேசுகின்றாயே. 10.9.5
அரக்கிய ராகம் புல்லென, வில்லால்
அணிமதி ளிலங்கையார் கோனைச்
செருக்கழித்து * அமரர் பணிய முன்னின்ற
சேவகமோ ?, செய்ததின்று *
முருக்கிதழ் வாய்ச்சி முன் கைவெண் சங்கம் கொண்டு
முன்னே நின்று போகாய் *
எருக்கிலைக்காக எரிமழு வோச்சல்
என் செய்வது ? எந்தை பிரானே ! 10.9.6
ஆழியந்திண் தேரரசர் வந்திறைஞ்ச
அலை கடலுலகம் முன்னாண்ட *
பாழியந் தோளோ ராயிரம் வீழப்
படை மழுப் பற்றிய வலியோ ? *
மாழை மென்னோக்கி மணிநிறம் கொண்டு வந்து
முன்னே நின்று போகாய் *
கோழி வெண் முட்டைக்கென் செய்வது ? எந்தாய் !
குறுந்தடி நெடுங்கடல் வண்ணா ! 10.9.7
பொருந்தலன் ஆகம் புள் உவந்தேற
வள்ளுகிரால் பிளந்து * அன்று
பெருந்தகைக் கிரங்கி வாலியை முனிந்த
பெருமை கொலோ ? செய்தது இன்று *
பெருந்தடங் கண்ணி சுரும்புறுகோதை
பெருமையை நினைந்திலை * பேசில்
கருங்கடல் வண்ணா ! கவுள் கொண்ட நீராம்
இவளெனக் கருதுகின்றாயே. 10.9.8
நீரழல் வானாய் நெடுநிலம் காலாய்
நின்ற நின் நீர்மையை நினைந்தோ ? *
சீர்கெழு கோதை என்அலது இலளென்று
அன்னதோர் தேற்றன்மை தானோ ? *
பார்கெழு பவ்வத் தாரமுதனைய
பாவையைப் பாவம் செய்தேனுக்கு *
ஆரழலோம்பும் அந்தணன் தோட்டமாக
நின் மனத்து வைத்தாயே. 10.9.9
வேட்டத்தைக் கருதாது அடியிணை வணங்கி
மெய்ம்மை நின்று எம்பெருமானை *
வாள்திறல் தானை மங்கையர் தலைவன்
மானவேல் கலியன் வாயொலிகள் *
தோட்டலர் பைந்தார்ச் சுடர்முடியானைப்
பழமொழியால் பணிந்துரைத்த *
பாட்டிவை பாடப் பத்திமை பெருகிச்
சித்தமும் திருவொடு மிகுமே. 10.9.10
