திருவாய்மொழி
பத்தாம் பத்து
மூன்றாம் திருவாய்மொழி
வேய்மரு தோளிணை மெலியுமாலோ !
மெலிவும் என் தனிமையும் யாதும் நோக்கா *
காமரு குயில்களும் கூவுமாலோ !
கணமயிலவை கலந்தாலுமாலோ ! *
ஆமருவின நிரை மேய்க்க நீ போக்கு
ஒரு பகல் ஆயிரமூழியாலோ *
தாமரைக் கண்கள் கொண்டு ஈர்தியாலோ !
தகவிலை தகவிலையே நீ கண்ணா ! 10.3.1
தகவிலை தகவிலையே நீ கண்ணா !
தடமுலை புணர்தொறும் புணர்ச்சிக்காராச் *
சுகவெள்ளம் விசும்பிறந்து அறிவை மூழ்க்கச் சூழ்ந்து,
அது கனவென நீங்கியாங்கே *
அகவுயிரகமகந்தோறும் உள்புக்கு
ஆவியின் பரமல்ல வேட்கை அந்தோ ! *
மிகமிக இனியுன்னைப் பிரிவையாமால்
வீவ நின் பசுநிரை மேய்க்கப் போக்கே. 10.3.2
வீவ நின் பசுநிரை மேய்க்கப் போக்கு
வெவ்வுயிர் கொண்டு எனதாவி வேமால் *
யாவரும் துணை யில்லை யான் இருந்து
உன்னஞ்சன மேனியை யாட்டம் காணேன் *
போவதன்று ஒரு பகல் நீயகன்றால்
பொருகயற் கண்ணிணை நீரும் நில்லா ? *
சாவது இவ்வாய்க் குலத்தாய்ச்சி யோமாய்ப் பிறந்த
இத்தொழுத்தையோம் தனிமை தானே. 10.3.3
தொழுத்தையோம் தனிமையும் துணை பிரிந்தார்
துயரமும், நினைகிலை கோவிந்தா ! * நின்
தொழுத்தனிற் பசுக்களையே விரும்பித்
துறந்து எம்மை யிட்டு அவை மேய்க்கப் போதி *
பழுத்த நல்லமுதின் இன்சாற்று வெள்ளம்
பாவியேன் மனமகந்தோறு முள்புக்கு
அழுத்த * நின் செங்கனிவாயின் கள்வப் பணிமொழி
நினைதொறும் ஆவி வேமால். 10.3.4
பணிமொழி நினைதொறும் ஆவி வேமால்
பகல் நிரை மேய்க்கிய போய கண்ணா !
பிணியவிழ் மல்லிகை வாடை தூவப்
பெருமத மாலையும் வந்தின்றாலோ ! *
மணிமிகு மார்வினின் முல்லைப் போது
என் வனமுலை கமழ்வித்து உன் வாயமுதம் தந்து *
அணிமிகு தாமரைக் கையை அந்தோ !
அடிச்சியோம் தலைமிசை நீ அணியாய். 10.3.5
அடிச்சியோம் தலைமிசை நீ அணியாய்
ஆழியங் கண்ணா ! உன் கோலப் பாதம் *
பிடித்தது நடு உனக்கு அரிவையரும் பலர்
அது நிற்க எம் பெண்மை யாற்றோம் *
வடித்தடங் கண்ணிணை நீரும் நில்லா
மனமும் நில்லா, எமக்கு அது தன்னாலே *
வெடிப்பு நின் பசு நிரை மேய்க்கப் போக்கு
வேம் எமதுயிர் அழல் மெழுகிலுக்கே. 10.3.6
வேம் எமதுயிர் அழல் மெழுகிலுக்கு
வெள் வளை மேகலை கழன்று வீழ *
தூமலர்க் கண்ணிணை முத்தம் சோரத்
துணைமுலை பயந்து என தோள்கள் வாட *
மாமணி வண்ணா ! உன் செங்கமல வண்ண
மென் மலரடி நோவ நீ போய் *
ஆமகிழ்ந்துகந்து அவை மேய்க்கின்று உன்னோடு
அசுரர்கள் தலைப் பெய்யில் எவன்கொல் ஆங்கே ? 10.3.7
அசுரர்கள் தலைப் பெய்யில் எவன் கொல் ஆங்கு ? என்று
ஆழும் என்னாருயிர், ஆன் பின் போகேல் *
கசிகையும் வேட்கையும் உள் கலந்து
கலவியும் நலியும் என் கை கழியேல் *
வசிசெயுன் தாமரைக் கண்ணும் வாயும்
கைகளும் பீதக வுடையும் காட்டி *
ஒசிசெய் நுண்ணிடை இளவாய்ச்சியர்
நீயுகக்கும் நல்லவரொடும் உழிதராயே. 10.3.8
உகக்கு நல்லவரொடும் உழிதந்து
உன்தன் திருவுள்ளம் இடர் கெடுந் தோறும் * நாங்கள்
வியக்க இன்புறுதும் எம் பெண்மை யாற்றோம்
எம்பெருமான் ! பசு மேய்க்கப் போகேல் *
மிகப் பல அசுரர்கள் வேண்டுருவங் கொண்டு
நின்று உழிதருவர் கஞ்சனேவ *
அகப்படில் அவரொடும் நின்னொடு ஆங்கே
அவத்தங்கள் விளையும் என் சொற் கொள் அந்தோ ! 10.3.9
அவத்தங்கள் விளையும் என் சொற் கொளந்தோ!
அசுரர்கள் வன்கையர் கஞ்சனேவத் *
தவத்தவர் மறுக நின்று உழிதருவர்
தனிமையும் பெரிது உனக்கு, இராமனையும் *
உவத்தலை உடன் திரிகிலையும் என்றென்று
ஊடுற என்னுடை ஆவி வேமால் *
திவத்திலும் பசுநிரை மேய்ப்பு உவத்தி
செங்கனி வாயெங்க ளாயர் தேவே ! 10.3.10
செங்கனி வாயெங்க ளாயர் தேவு
அத்திருவடி திருவடி மேல் * பொருநல்
சங்கணி துறைவன் வண்தென் குருகூர்
வண் சடகோபன் சொல்லாயிரத்துள் *
மங்கைய ராய்ச்சியர் ஆய்ந்த மாலை
அவனொடும் பிரிவதற்கு இரங்கித் * தையல்
அங்கவன் பசு நிரை மேய்ப்பொழிப்பான்
உரைத்தன * இவையும் பத்து அவற்றின் சார்வே. 10.3.11
