பெரிய திருமொழி
இரண்டாம் பத்து
மூன்றாம் திருமொழி
விற்பெரு விழவும் கஞ்சனும் மல்லும்
வேழமும் பாகனும் வீழச்
செற்றவன் தன்னைப் * புரமெரி செய்த
சிவன், உறு துயர் களை தேவை *
பற்றலர் வீயக் கோல் கையில் கொண்டு
பார்த்தன் தன் தேர் முன் நின்றானைச் *
சிற்றவை பணியால் முடி துறந்தானைத்
திருவல்லிக்கேணிக் கண்டேனே. 2.3.1 திருவல்லிக்கேணி
வேதத்தை வேதத்தின் சுவைப் பயனை
விழுமிய முனிவர் விழுங்கும்
கோதிலின் கனியை * நந்தனார் களிற்றைக்
குவலயத்தோர் தொழுதேத்தும்
ஆதியை * அமுதை என்னை யாளுடை
அப்பனை, ஒப்பவரில்லா
மாதர்கள் வாழும் மாட மாமயிலைத் *
திருவல்லிக்கேணிக் கண்டேனே. 2.3.2 திருவல்லிக்கேணி
வஞ்சனை செய்யத் தாயுருவாகி
வந்த பேய், அலறி மண் சேர
நஞ்சமர் முலையூடு உயிர் செகவுண்ட
நாதனைத், தானவர் கூற்றை *
விஞ்சை வானவர் சாரணர் சித்தர்
வியந்துதி செய்யப் பெண்ணுருவாகி *
அஞ்சுவை யமுதம் அன்றளித்தானைத்
திருவல்லிக்கேணிக் கண்டேனே. 2.3.3 திருவல்லிக்கேணி
இந்திரனுக்கு என்று ஆயர்கள் எடுத்த
எழில் விழவில் பழ நடை செய் *
மந்திர விதியில் பூசனை பெறாது
மழை பொழிந்திடத் தளர்ந்து * ஆயர்
எந்தம்மோடு இன ஆநிரை தளராமல்
எம்பெருமான்! அருளென்ன *
அந்தமில் வரையால் மழை தடுத்தானைத்
திருவல்லிக்கேணிக் கண்டேனே. 2.3.4 திருவல்லிக்கேணி
இன்துணைப் பதுமத்து அலர்மகள் தனக்கும்
இன்பன், நற்புவி தனக்கு இறைவன் *
தன் துணை ஆயர் பாவை நப்பின்னை
தனக்கு இறை, மற்றையோர்க் கெல்லாம்
வன் துணை * பஞ்ச பாண்டவர்க்காகி
வாயுரை தூது சென்றியங்கும்
என் துணை * எந்தை தந்தை தம்மானைத்
திருவல்லிக்கேணிக் கண்டேனே. 2.3.5 திருவல்லிக்கேணி
அந்தகன் சிறுவன் அரசர் தமரசற் கிளையவன்
அணியிழையைச் சென்று *
எந்தமக்குரிமை செய்யெனத் தரியாது
எம்பெருமான் ! அருளென்ன *
சந்தமல் குழலாள் அலக்கண் நூற்றுவர்தம்
பெண்டிரும் எய்தி நூலிழப்ப *
இந்திரன் சிறுவன் தேர் முன் நின்றானைத்
திருவல்லிக்கேணிக் கண்டேனே. 2.3.6 திருவல்லிக்கேணி
பரதனும் தம்பி சத்துருக்கனனும்
இலக்குமனோடு மைதிலியும் *
இரவும் நன்பகலும் துதி செய்ய நின்ற
இராவணாந்தகனை எம்மானைக் *
குரவமே கமழும் குளிர் பொழிலூடு
குயிலொடு மயில்கள் நின்றால *
இரவியின் கதிர்கள் நுழைதல் செய்தறியாத்
திருவல்லிக்கேணிக் கண்டேனே. 2.3.7 திருவல்லிக்கேணி
பள்ளியிலோதி வந்த தன் சிறுவன்
வாயில், ஓராயிர நாமம்
ஒள்ளியவாகிப் போத * ஆங்கதனுக்கு
ஒன்றுமோர் பொறுப்பிலனாகிப் *
பிள்ளையைச் சீறி வெகுண்டு தூண் புடைப்பப்
பிறை யெயிற் றனல் விழிப் பேழ்வாய்த் *
தெள்ளிய சிங்கமாகிய தேவைத்
திருவல்லிக்கேணிக் கண்டேனே. 2.3.8 திருவல்லிக்கேணி
மீனமர் பொய்கை நாள்மலர் கொய்வான்
வேட்கையினொடு, சென்றிழிந்த
கானமர் வேழம் கையெடுத்தலறக்
கரா அதன் காலினைக் கதுவ *
ஆனையின் துயரம் தீரப் புள்ளூர்ந்து
சென்று நின்று ஆழி தொட்டானைத் *
தேனமர் சோலை மாட மாமயிலைத்
திருவல்லிக்கேணிக் கண்டேனே. 2.3.9 திருவல்லிக்கேணி
மன்னுதண் பொழிலும் வாவியும் மதிளும்
மாட மாளிகையும் மண்டபமும் *
தென்னன் தொண்டையர் கோன் செய்த நல்மயிலைத்
திருவல்லிக்கேணி நின்றானைக்
கன்னி நல்மாட மங்கையர் தலைவன்
காமரு சீர்க் கலிகன்றி *
சொன்ன சொல் மாலை பத்துடன் வல்லார்
சுகமினிதாள்வர் வானுலகே. 2.3.10 திருவல்லிக்கேணி
