பெரிய திருமொழி
இரண்டாம் பத்து
ஐந்தாம் திருமொழி
பாராயது உண்டுமிழ்ந்த பவளத் தூணைப்
படுகடலில் அமுதத்தைப் பரிவாய் கீண்ட
சீரானை * எம்மானைத் தொண்டர் தங்கள்
சிந்தையுள்ளே, முளைத்தெழுந்த தீங்கரும்பினைப் *
போரானைக் கொம்பொசித்த போரேற்றினைப்
புணர் மருதமிற நடந்த பொற் குன்றினைக் *
காரானை இடர் கடிந்த கற்பகத்தைக்
கண்டது நான் கடல்மல்லைத் தலசயனத்தே. 2.5.1 திருக்கடல்மல்லை
பூண்டவத்தம் பிறர்க் கடைந்து தொண்டு பட்டுப்
பொய்ந் நூலை மெய்ந் நூலென்றென்று மோதி
மாண்டு * அவத்தம் போகாதே வம்மின்,
எந்தை என் வணங்கப் படுவானைக் * கணங்களேத்தும்
நீண்டவத்தைக் கருமுகிலை எம்மான் தன்னை
நின்றவூர் நித்திலத்தைத் தொத்தார் சோலைக் *
காண்டவத்தைக் கனலெரிவாய்ப் பெய்வித்தானைக்
கண்டது நான் கடல்மல்லைத் தலசயனத்தே. 2.5.2 திருநின்றவூர்,
திருக்கடல்மல்லை
உடம்புருவில் மூன்றொன்றாய் மூர்த்தி வேறாய்
உலகுய்ய நின்றானை * அன்று பேய்ச்சி
விடம் பருகு வித்தகனைக் கன்று மேய்த்து
விளையாட வல்லானை * வரை மீகானில்
தடம்பருகு கருமுகிலைத் தஞ்சைக்கோ இல்
தவநெறிக்கு ஓர் பெரு நெறியை * வையம் காக்கும்
கடம் பரிமேல் கற்கியை நான் கண்டு கொண்டேன்
கடிபொழில் சூழ் கடல்மல்லைத் தலசயனத்தே. 2.5.3 தஞ்சை மாமணிக் கோயில்,
திருக்கடல்மல்லை
பேய்த்தாயை முலையுண்ட பிள்ளை தன்னைப்
பிணைமருப்பிற் கருங்களிற்றைப் * பிணைமான் நோக்கின்
ஆய்த்தாயர் தயிர்வெண்ணெ யமர்ந்த கோவை
அந்தணர்தம் அமுதத்தை குரவை முன்னே
கோத்தானைக் * குடமாடு கூத்தன் தன்னைக்
கோகுலங்கள் தளராமல் குன்றமேந்திக்
காத்தானை * எம்மானைக் கண்டு கொண்டேன்
கடிபொழில்சூழ் கடல்மல்லைத் தலசயனத்தே. 2.5.4 திருக்கடல்மல்லை
பாய்ந்தானைத் திரிசகடம் பாறி வீழப்
பாலகனாய் ஆலிலையில் பள்ளியின்பம்
ஏய்ந்தானை இலங்கொளி சேர் மணிக்குன்றன்ன
ஈரிரண்டு மால்வரைத் தோள் அம்மான் தன்னைத் *
தோய்ந்தானை நிலமகள் தோள், தூதிற் சென்று அப்
பொய்யறை வாய்ப் புகப் பெய்து மல்லர் மங்கக்
காய்ந்தானை * எம்மானைக் கண்டு கொண்டேன்
கடிபொழில்சூழ் கடல்மல்லைத் தலசயனத்தே, 2.5.5 திருக்கடல்மல்லை
கிடந்தானைத் தடங்கடலுள் பணங்கள் மேவிக்
கிளர் பொறிய மறிதிரிய அதனின் பின்னே
படர்ந்தானைப் * படுமதத்த களிற்றின் கொம்பு
பறித்தானைப், பாரிடத்தை எயிறு கீற
இடந்தானை * வளைமருப்பின் ஏனமாகி,
இருநிலனும் பெருவிசும்பும் எய்தா வண்ணம்
கடந்தானை * எம்மானைக் கண்டு கொண்டேன்
கடிபொழில்சூழ் கடல்மல்லைத் தலசயனத்தே. 2.5.6 திருக்கடல்மல்லை
பேணாத வலியரக்கர் மெலிய, அன்று
பெருவரைத் தோளிற நெரித்து * அன்று அவுணர் கோனைப்
பூணாகம் பிளவெடுத்த போர் வல்லோனைப்
பொருகடலுள் துயிலமர்ந்த புள்ளூர்தியை *
ஊணாகப் பேய் முலை நஞ்சுண்டான் தன்னை
உள்ளுவா ருள்ளத்தே உறைகின்றானை *
காணாது திரிதருவேன் கண்டு கொண்டேன்
கடிபொழில் சூழ் கடல்மல்லைத் தலசயனத்தே. 2.5.7 திருக்கடல்மல்லை
பெண்ணாகி இன்னமுதம் வஞ்சித்தானைப்
பிறையெயிற்று அன்றடலரியாய்ப் பெருகினானைத் *
தண்ணார்ந்த வார்புனல் சூழ் மெய்யமென்னும்
தடவரைமேல் கிடந்தானைப், பணங்கள் மேவி
எண்ணானை * எண்ணிறந்த புகழினானை,
இலங்கொளி சேர் அரவிந்தம் போன்று நீண்ட
கண்ணானைக் * கண்ணாரக் கண்டு கொண்டேன்
கடிபொழில்சூழ் கடல்மல்லைத் தலசயனத்தே. 2.5.8 திருமெய்யம்,
திருக்கடல்மல்லை
தொண்டாயார் தாம் பரவும் அடியினானைப்,
படி கடந்த தாளாளற்கு ஆளாய் உய்தல்
விண்டானைத் * தென்னிலங்கை அரக்கர் வேந்தை
விலங்குண்ண, வலங்கை வாய்ச் சரங்களாண்டு *
பண்டாய வேதங்கள் நான்கும், ஐந்து
வேள்விகளும் கேள்வியோடு அங்கமாறும்
கண்டானைத் * தொண்டனேன் கண்டு கொண்டேன்
கடிபொழில்சூழ் கடல்மல்லைத் தலசயனத்தே. 2.5.9 திருக்கடல்மல்லை
படநாகத்தணைக் கிடந்து அன்று அவுணர் கோனைப்
படவெகுண்டு மருதிடை போய்ப் பழன வேலித் *
தடமார்ந்த கடல்மல்லைத் தலசயனத்துத்
தாமரைக் கண் துயிலமர்ந்த தலைவன் தன்னைக் *
கடமாருங் கருங்களிறு வல்லான், வெல் போர்க்
கலிகன்றி ஒலிசெய்த இன்பப் பாடல் *
திடமாக இவை யைந்துமைந்தும் வல்லார்
தீவினையை முதலரிய வல்லார் தாமே. 2.5.10 திருக்கடல்மல்லை
