திருவாய்மொழி

முதல் பத்து

ஆறாம் திருவாய்மொழி

பரிவதில் ஈசனைப் பாடி * விரிவது மேவலுறுவீர் *

பிரிவகை யின்றி நன்னீர் தூய்ப் * புரிவதுவும் புகை பூவே.             1.6.1

மதுவார் தண்ணந் துழாயான் * முதுவேத முதல்வனுக்கு *

எது ஏது? என்பணி ? * என்னா ததுவே, ஆட்செய்யு மீடே.       1.6.2

ஈடும் எடுப்பும் இல் ஈசன் * மாடு விடாது என் மனனே *

பாடும் என் நா அவன் பாடல் * ஆடும் என் அங்கம் அணங்கே.           1.6.3

அணங்கென ஆடும் எனங்கம் * வணங்கி வழிபடும் ஈசன் *

பிணங்கி அமரர் பிதற்றும் * குணங்கெழு கொள்கையினானே.       1.6.4

கொள்கை கொளாமை இலாதான் * எள்கல் இராகம் இலாதான்*

விள்கை விள்ளாமை விரும்பி * உள் கலந்தார்க்கு ஓரமுதே.       1.6.5

அமுதம் அமரர்கட்கீந்த * நிமிர்சுடர் ஆழி நெடுமால் *

அமுதிலும் ஆற்ற இனியன் * நிமிர்திரை நீள் கடலானே.      1.6.6

நீள்கடல்சூழ் இலங்கைக் கோன் * தோள்கள் தலை துணி செய்தான் *

தாள்கள் தலையில் வணங்கி * நாள்கடலைக் கழிமினே.       1.6.7

கழிமின் தொண்டீர்கள் ! கழித்துத் தொழுமின் அவனைத் தொழுதால் *

வழிநின்ற வல்வினை மாள்வித்து * அழிவின்றி ஆக்கம் தருமே.            1.6.8

தரும், அவரும் பயனாய * திருமகளார் தனிக்கேள்வன் *

பெருமையுடைய பிரானார் * இருமை வினை கடிவாரே.     1.6.9

கடிவார் தீய வினைகள் * நொடியாரும் அளவைக்கண் *

கொடியா அடுபுள் உயர்த்த * வடிவார் மாதவனாரே.           1.6.10

மாதவன் பால் சடகோபன் * தீதவமின்றி உரைத்த *

ஏதமில் ஆயிரத்து, இப்பத்து * ஓத வல்லார் பிறவாரே.      1.6.11