श्री वरवरमुनिप्रपत्तिः
शमदमगुणपूर्णं शेषभोगाच्छगात्रं
यतिपतिचरणाब्जन्यस्त-सर्वात्मभारम् ।
द्वयमननतदर्थ-ध्यानसंफुल्लवक्त्रं
वरवरमुनिवर्यं सत्त्वशुद्धं भजामः ।। (१) (सुदर्शनदासकृतिः)
वाग्भूषणं वकुळभूषणशास्त्रसारं
यो मादृशां च सुगमं व्यवृणोदयाळुः ।
रम्योपयन्तृमुनये यमिनांवराय
तस्मै नमश्शमदमादिगुणार्णवाय ।। (२) (प्रतिवादिभयङ्करम् अर्ण्णकृतिः)
मूलेऽवतीर्णमिह मूलमनूदितार्थ
तत्त्वावबोधसुखितां वसुधां विधातुम् ।
रामानुजार्य-चरणांबुज चञ्चरीकं
रम्योपयन्तृयमिनं शरणं प्रपद्ये ।। (३) (अज्ञातपूर्वाचार्यकृतिः)
श्रीमन् यतीन्द्रचरणप्रवणामलात्मन्
धीभक्तिशान्ति-करुणादिगुणामृताब्धे ।
सौम्योपयन्तृमुनिवर्य्य सतां जनानां
प्राप्यौ त्वदीयचरणौ शरणं प्रपद्ये ।। (४) (अभिरामवरार्यकृतिः)
रामानुजार्य-वरदर्शनधूर्वहेन्द्र
कामादिदोषगणमोषक-देशिकेन्द्र ।
सौम्योपयन्तृमुनिवर्य्य समस्तजीव-
बन्धो! तवैव चरणौ शरणं प्रपद्ये ।। (५) (अभिरामवरार्यकृतिः)
श्रीमत्पराङ्कुशवचोमृतसारपूर-
संसिद्धशौरि-चरणानुभवप्रवाह ।
सौम्योपयन्तृमुनिवर्य्य जगद्धिताय
भव्यौ त्वदीयचरणौ शरणं प्रपद्ये ।। (६) (अभिरामवरार्यकृतिः)
मुक्तिप्रदौ मुररिपोरिव पादपद्मे
भक्त्याद्युपायचरमस्य परं मुमुक्षोः ।
सौम्योपयन्तृमुनिवर्य्य विभो सुभोग्यौ
स्वामिंस्त्वदीयचरणौ शरणं प्रपद्ये ।। (७) (अभिरामवरार्यकृतिः)
मञ्जुप्रवाळसदृशौ मम पापिनोऽपि
संसार-सागर-समुद्धरणप्रवीणौ ।
सौम्योपयन्तृमुनिवर्य्य सदाऽनुभाव्यौ
नाथ त्वदीयचरणौ शरणं प्रपद्ये ।। (८) (अभिरामवरार्यकृतिः)
श्रीशैलवानगिरिभट्ट-मुनित्रयेण
श्रीदेवराजपरवादिभयङ्कराभ्याम् ।
वाधूलवर्यवरदेन तथेतराभ्यां
सेव्यौ तवार्य चरणौ शरणं प्रपद्ये ।। (९) (अज्ञातपूर्वाचार्यकृतिः)
देवी गोदा यतिपतिशठद्वेषिणौ रङ्गशृङ्गं
सेनानाथो विहगवृषभः श्रीनिधिस्सिन्धुकन्या ।
भूमानीळागुरुजनवृतः पूरुषश्चेत्यमीषाम्
अग्रे नित्यं वरवरमुनेरङ्घ्रियुग्मं प्रपद्ये ।। (१०) (देवराजगुरुकृतिः)
प्रादुर्भूतप्रचुरमतयो ये परब्रह्मसाम्यात्
पश्यन्तः त्वत्पदमनुपमं ये पुनश्शुद्धसत्त्वाः ।
सर्वैरेतैः वरवरमुने शश्वदभ्यर्चितं ते ।
काङ्क्षत्येतत् कथमयमहो कामकामः पदाब्जम् ।। (११) (देवराजगुरुकृतिः)
भृत्यैर्द्वित्रैः प्रियहितपरैः अर्चिते भद्रपीठे
तुङ्गं तूलासनवरमलङ्कुर्वतः सोपधानम् ।
अङ्घ्रिद्वन्द्वं वरवरमुनेरब्जपत्राभिताम्रं
मौळौ वक्त्रे भुजशिरसि मे वक्षसि स्यात्क्रमेण ।। (१२) (देवराजगुरुकृतिः)
अग्रे पश्चादुपरि परितो भूतलं पार्श्वतो मे
मौळौ वक्त्रे वपुषि सकले मानसांभोरुहे च ।
दर्शं दर्शं वरवरमुने! दिव्यमङ्घ्रिद्वयं ते
नित्यं मज्जन् अमृतजलधौ निस्तरेयं भवाब्धिम् ।। (१३) (देवराजगुरुकृतिः)
वरवरमुनिवरचरणौ तरुणसरोजात-जठरकमनीयौ ।
अपि मम शिरस्यकस्मात् करुणापरिणामदापितौ कलये ।। (१४) (वेङ्कटलक्ष्मणमुनिकृतिः)
वरवरनुनिवरचरणा-वेवाशरणस्य मे शरणम् ।
इति मनुमनुकलमनुसर मम मन इदमेव तेऽनुगुणम् ।। (१५) (वेङ्कटलक्ष्मणमुनिकृतिः)
तिरुनक्षत्र–तनियन्
पाथोभावं गतायां कलियुगशरदि श्रद्धराये शकाब्दे
वर्षे साधारणेऽर्के समधिगततुले वासरे तीरसङ्ख्ये ।
वारे जैवे चतुर्थ्यां समजनि च तिथौ शुक्लपक्षे सुकर्मा
भ्रजन्मूलाख्यतारे यतिपतिरपरो रम्यजामातृनामा ।।
चरमश्लोकः
कुंभं भास्वति याति तत्सुतदिने पक्षे वळर्क्षेतरे
द्वादश्यां श्रवणर्क्षभाजि रुधिरोद्गाराख्यसंवत्सरे ।
धीभक्त्यादिगुणार्णवो यतिवराधीनाखिलात्मस्थितिः
श्रीवैकुण्ठमकुण्ठवैभवमगात् कान्तोपयन्ता मुनिः ।।
