श्रीमते निगमान्तमहादेशिकाय नमः
श्रीमान् वेङ्कटनाथार्यः कवितार्किककेसरी ।
वेदान्ताचार्यवर्यो मे संनिधत्तां सदा हृदि ।
श्रीपरमार्थस्तुतिः
श्रीमद्गृध्रसरस्तीरपारिजातमुपास्महे ।
यत्र तुङ्गैरतुङ्गैश्च प्रणतैर्गृह्यते फलम् ॥ 1 ॥
गुरुभिः त्वदनन्यसर्वभावैः
गुणसिन्धौ कृतसंप्लवस्त्वदीये ।
रणपुङ्गव वन्दिभावमिच्छन्
अहमस्म्येकमनुग्रहास्पदं ते ॥ 2 ॥
भुवनाश्रयभूषणास्त्रवर्गं
मनसि त्वन्मयतां ममातनोतु ।
वपुराहवपुङ्गव त्वदीयं
महिषीणामनिमेषदर्शनीयम् ॥ 3 ॥
अभिरक्षितुमग्रतः स्थितं त्वां
प्रणवे पार्थरथे च भावयन्तः ।
अहितप्रशमैरयत्नलभ्यैः
कथयन्त्याहवपुङ्गवं गुणज्ञाः ॥ 4 ॥
कमला निरपायधर्मपत्नी
करुणाद्याः स्वयमृत्विजो गुणास्ते ।
अवनं श्रयतामहीनमाद्यं
स च धर्मस्त्वदनन्यसेवनीयः ॥ 5 ॥
कृपणाः सुधियः कृपासहायं
शरणं त्वां रणपुङ्गव प्रपन्नाः ।
अपवर्गनयादनन्यभावाः
वरिवस्यारसमेकमाद्रियन्ते ॥ 6 ॥
अवधीर्य चतुर्विधं पुमर्थं
भवदर्थे विनियुक्तजीवितः सन् ।
लभते भवतः फलानि जन्तुः
निखिलान्यत्र निदर्शनं जटायुः ॥ 7 ॥
शरणागतरक्षणव्रती मां
न विहातुं रणपुङ्गवार्हसि त्वम् ।
विदितं भुवने विभीषणो वा
यदि वा रावण इत्युदीरितं ते ॥ 8 ॥
भुजगेन्द्रगरुत्मदादिलभ्यैः
त्वदनुज्ञानुभवप्रवाहभेदैः ।
स्वपदे रणपुङ्गव स्वयं मे
परिचर्याविभवैः परिष्क्रियेथाः ॥ 9 ॥
विमलाशयवेङ्कटेशजन्मा
रमणीया रणपुङ्गवप्रसादात् ।
अनसूयुभिरादरेण भाव्या
परमार्थस्तुतिरन्वहं प्रपन्नैः ॥ 10 ॥
कवितार्किकसिंहाय कल्याणगुणशालिने।
श्रीमते वेङ्कटेशाय बेदान्तगुरवे नमः ॥
